2 Samuel 7 - Tuntu i mPue ri Basa Taa

Sarita Tempo i Makole Daud Rani Mangikaka i Pue Allah Banua

¹ Wali yako etu i Makole Daud nawaika i mPue Yawe sangkodi tempo to masanang apa bansa-bansa ntau to maroo ri tana to singkenta pei tana nto Israel tare to mangamusung sira. Tempo etu i Daud ia re’e banuanya to bou.

² Wali re’e seo ia re’e mampogomboka to pantuntu tuntu i mPue Allah to sanganya i Natan. Ia manganto’oka i Natan etu, to’onya, “Lo’aja banuangku si’i to raika yako kaju aras. Banua si’i magaya pasi maroso. Pei peti to la’u parajanji i mPue Allah ojo raposaka nja’u raya ntenda. Wali taa kojo masipato!”

³ Wali i Natan manganto’oka resi i Makole Daud, to’onya, “I Pue Yawe re’e resi komi, Pa’a, wali bara kesaa songka ngkomi, ikam.” Etu semo to nato’oka i Natan resi i Makole Daud.

⁴ Pei yako etu, ntongo wuri etu semo, i Pue Yawe rata resi i Natan ri raya mpangkitanya pei manganto’oka ia,

⁵ “Inta pago i Makole Daud, to papolaongingku etu. To’oka ia, ‘Si’a korom to damangikaka Aku banua daKukaroo.

^12-13 Yako tempo si’i korom damawali tu’amo panewa damate yau pei darapongkeli yau ri awe nu bue-buemu. Wali tempo korom mate yau etu, tempo etu Aku damangokotaka samba’a ana ngkorom to langkai to damawali wo’u makole damangabolos korom. Wali anamu etu, ia semo to damangawanguka Aku banua. Pasi Aku damangansawang ia see naka ia damawali makole to maroso, pasi wiyaanya damawali seja makole rataka ri singkasaenya.

¹⁴ Wali Aku damawali ewa pa’anya pasi ia damawali ewa anangKu. Pasi ane ia mangika palaong to maja’a, ane ewa see Aku damangahuku ia see ia damajea. Palaong etu raporapaka ewa pa’a mangampake beka mangampedas ananya to sala.

¹⁵ Pei Aku tiroo damamporayang ia. Aku taa damangandolika tangongKu yako resi ia ewa inikangKu resi i Saul tempo Aku mangayali yau kuasanya pei mangawaika wo’u resi korom.

¹⁶ Wali korom mawali makole si’i si’i, pasi Aku semo to mampakatantu see naka wiyaamu seja damawali makole rataka ri singkasaenya.’” Wali etu semo gombo to nato’oka i mPue Yawe resi i Natan see ia damamporata resi i Makole Daud.

¹⁷ Wali yako etu i Natan yau wo’u resi i Makole Daud pei mangansaritaka resi ia mangkonong pangkitanya etu. Pasi ia mamparata resi i Daud samparia gombo to nato’o i mPue Yawe etu.