2 Samuel 5 - Tuntu i mPue ri Basa Taa

Sarita Tempo i Daud Mawali Makole nto Israel

¹ Wali yako etu, re’e seo i Daud ia nja’u nja’u kota Hebron. Tempo etu ma’i samparia tau tu’a nu suku-suku ntau Israel, ma’i mangampago i Daud nja’u ria. Ojo karata nsira, sira manganto’oka i Daud, to’onya, “Lo’a, kami si’i paka ja’i ngkomi.

² Wali seore, tempo i Saul tiroowa mawali makole ngkita, tempo etu mandudu ngkani kita yau mamusu. Pei ponto ngkani tentara ngkita yau mamusu etu komi semo to mangkepalang sira. Apa i Pue Yawe roomo mamparajanjika komi seore, Ia manganto’o, ‘Korom semo to damangararamaka to Israel, taungKu, ewa naika nto pangkampang ndomba mangararamaka dombanya. Pasi korom semo to damamporentang sira.’ Etu semo parajanji i mPue Yawe resi komi seore.” Wali etu semo gombo ntau tu’a nto Israel mampatiendoka i Daud mangkonong songka i mPue Yawe resi ia.

³ Wali ojo pangandonge i Daud gombo nsira etu, ia mangika parajanji resi samparia sira, pasi i Pue Yawe semo mawali matamanasa mparajanjinya etu. Wali ia mamparajanjika yununya to Israel etu ia manganto’o, “Monso pu’u aku damangararamaka pasi mamporentang komi singkonong ewa wimba to nato’oka i mPue Yawe aku.” Wali ojo karoonya i Daud manganto’o gombo etu, tempo etu tau tu’a nto Israel mampalasika minya nsaitun ri wo’o i Daud mangika tondong sira singkonong ia mawali makole nsira.

⁴ Wali tempo i Daud mawali makole, tempo etu ia togo mpuyumo to’unya. Panewa yako etu, opo mpuyu nto’u kasaenya i Daud mawali makole nto Israel.