1 Samuel 8 - Tuntu i mPue ri Basa Taa

Sarita Tempo To Israel Mamporapi Makole to Damamporentang Sira

^1-2 Wali to pobotus, i Samuel, ia dua ananya to langkai, to tu’anginya sanganya i Yoel, pasi tua’inya sanganya i Abia. Wali tempo i Samuel tu’amo, tempo etu ia mangokotaka ngananya dua mba’a etu see sira mawali seja to pobotus nto Israel. Wali sira dua mawali to pobotus nja’u lipu to rato’oka Bersyeba.

³ Pei sira dua taa mangaluluka lengko ngkatuwu mpa’a nsira. Kasimbalinya yako etu, sira dua ojo rani sugi. Wali see naka tempo sira mangabotus sa’e, re’e tau to mangamomis sira. Tau etu re’e to mangawaika yami sira doi bara sora to yusa, see naka sira damangika botu to taa masipato. Sira ojo mangika botu to singkonong pei pamporani ntau to mangabayar sira etu.

⁴ Wali see naka samparia tau tu’a nto Israel siromu ruyu panewa yau sindara-ndara njo’u kota Rama mangampago i Samuel.

⁵ Rata nja’u ria, sira mampotango i Samuel pei manganto’oka ia, to’o nsira, “Pa’a, padongeka gombo mami si’i. Komi tu’amo si’i-si’i, pasi ana ngkomi to dua etu, sira taa kojo mangaluluka lengko ngkatuwu ngkomi. Wali to tao-tao ane komi mangokotaka samba’a tau to damawali makole ngkita sewaju ewa naika nu bansa-bansa to yusa to re’e ri tana to singkenta pei tana ngkita. Wali tau to mawali makole ngkita etu, ia semo to damamporentang kita.” Etu semo to naporapika ntau tu’a nto Israel resi i Samuel.

⁶ Pei i Samuel ia masusa rayanya mangandonge gombo nsira to mangewa songka i mPue Yawe pei ojo mamporapi makole damamporentang sira etu. See naka ia makai-kai resi i Pue Yawe mampotanaka resi Ia bara kesaa to matao daraika.

⁷ Wali i Pue Yawe mangansono, Ia manganto’o, “Waika sira ewa wimba naporapi nsira etu. Apa si’a korom to napobo’o nsira, Aku semo to napobo’o nsira apa sira tamo rani Aku mawali Makole to mamporentang sira.”