1 Samuel 16 - Tuntu i mPue ri Basa Taa

Sarita Tempo i Pue Yawe Mangampilis i Daud Damawali Makole

¹ Wali i Samuel ia mawo kojo rayanya mampobuuka i Saul tamo masipato mawali makole nto Israel. Pei re’e seo i Pue Yawe manganto’oka ia, to’oNya, “Aku roomo mangandolika tangongKu yako resi i Saul, see naka Aku tamo singkonong ia mawali makole. Wali ne’emo mampomawo ia. Kasimbalinya yako etu, oko tampa to raika yako tondu to rapamposaka minya pei banangika minya nsaitun. Roo see inta njo’u kota Betlehem pei pago ngkai to sanganya i Isai. I Isai etu, ia re’e bara sawei mba’a ananya to langkai. Wali naka pei Aku mampokau korom yau resi i Isai apa samba’a ananya etu, ia semo to ipilisingKu damawali makole.” Etu semo to nato’oka i mPue Yawe i Samuel.

² Pei i Samuel ia meka kojo rayanya. See naka ia mangansono, ia manganto’o, “Gete, i Pue, aku taa kukurang mangika palaong to etu. Apa ane aku yau mangokotaka tau to yusa damawali wo’u makole to mangabolos i Saul, ane ewa see matantu re’e tau to damangansaritaka resi i Saul. Wali see naka i Saul damaja’a kojo rayanya pei damampopate yau aku!” Etu semo sono i nSamuel. Wali i Pue Yawe manganto’oka ia, to’oNya, “Tempo korom yau, keni samba’a ana nsapi to tina. Panewa ane rata nja’u kota Betlehem, to’oka tau ri kota etu, ‘Aku ma’i damangika pampue mampakabae i Pue Yawe.’

³ Wali ane room manganto’oka gombo to etu, panewa pokau tau yau mangalo’a i Isai pei mangansale ia yau mangansabi seja tempo mangika pampue etu. Yako etu panewa Aku damampaponsanika korom kesaa wo’u to danuika. Aku damangansuduka korom tau to ipilisingKu damawali makole. Wali tau etu danupalasika minya nsaitun ri wo’onya mangika tondong ia semo tau to ipilisingKu mawali makole.” Wali etu semo paposia i mPue Yawe resi i Samuel.

⁴ Wali i Samuel mangaluluka anu to nato’oka i mPue Yawe resi ia etu, see naka ia yau njo’u Betlehem. Rata nja’u ria, ma’i tau tu’a ntau to maroo ri Betlehem ma’i mangantomu ia. Tau etu sakarongko apa meka kojo raya nsira mampobuuka bara kesaa sabanya naka pei to pantuntu tuntu i mPue Allah rata resi sira etu. Wali sira mampotanaka resi i Samuel, sira manganto’o, “Wimba Pa’a, komi bara ma’i ri kasanang ndaya ngkomi?”

⁵ Wali i Samuel mangansono, ia manganto’o, “Iya, aku si’i ma’i ri kasanang ndaya. Aku naka nama’i damangika pampue mampakabae i Pue Yawe. Wali pakayongongika ruyu koro ngkomi mangalulu ada ngkita see mayongo komi ri pangkita i mPue Allah, panewa lulu aku see kita damangika pampue etu sindara-ndara.” Etu semo sono i nSamuel resi tau tu’a nto Betlehem etu. Roo see ia yau resi i Isai sira sana panewa i Samuel mangika ada to see sira seja mayongo ri pangkita i mPue Allah. Yako etu ia mangansale sira yau seja mangansabi pampue etu. Wali sira yau.

¹¹ Wali yako etu, ojo pangkita i nSamuel samparia ana i Isai to rata sindara-ndara pei pa’anya etu, ia mampotanaka resi i Isai, to’onya, “Wimba, bara tiroo re’e anamu to langkai to tawa rata rire?” Sono i Isai, “Tiroo re’e. Jamo ana lei to tawa rata, apa ia re’e mangkampang domba.” Wali i Samuel manganto’oka ia, to’onya, “Pokau tau yau mangalo’a ngkai see pei sale mai, apa kita tawa damatunda mangkoni sindara-ndara ane ia tawa rata.”

^12-13 Wali i Isai mampokau tau yau mangalo’a ananya etu, pei mangansale resi sira. Wali ana i Isai to ana lei etu, sanganya i Daud. Ia ngkai to damangurawa to maroro kojo ta’anya. Lionya mawaa pasi matanya magaya kojo. Wali i Pue Yawe manganto’oka i Samuel, to’oNya, “Si’i semo tau to ipilisingKu! Inta pei palasika ia minya nsaitun mangika tondong to mampakanasaka tau ia semo to damawali makole nsira.” Etu semo to nato’o i mPue Yawe. Wali i Samuel mangoko tampa to raika yako tondu to la’u minya nsaitun la’u rayanya panewa ia mampalasika minya etu ri wo’o i Daud ri tango mata ntukakanya. Wali tempo etu semo Nosa i mPue Yawe tudu resi i Daud pei mangkuasang ia, wali yako ri tempo etu Ia tamo mampiyaika i Daud. Wali yako etu, i Samuel mangika pampue mampakabae i Pue Yawe panewa roo see ia mampiyaika kota Betlehem pei yau muni njo’u kota Rama.