Wongeela Maatewos 21 - WAADAA LAMMATAA

Yesuus Ulfinna Gudda'aan Yeruusaalemiin Seene

¹ Hennaa Yeruusaalemitti dhiyaatan, gaara Ejersaatitti hulee Betafaagee jedhamtu gayan, Yesuus darasoota ufii keessaa nama lamaa akkana jedhee isaan erge.

² «Gara ganda isin afoo jirtuu dhaqaa'a, achitti harree ilmoo woliin hidhamteertu takka hin argitan; hiika'aa naa fidaa'a.

³ Eennullee yoo waa isiniin jedhe, ‹Goofta'atu barbaada, inni uduu hin turin deebisa› jedhaa'a» isaaniin jedhe.

^4-5 Wonti raattichi raage akka raawwatamuuf kun ta'e; wonti raattichi raagellee, «Intala Xiyooniitiin, ‹Kunoo, mootiin kee gad uf qabee, harre'ee fi ilmoo harre'ee irra taa'ee, gara kee dhufa'aara› jedha'aan» ka jedhu.

⁶ Darasoonni dhaqanii akkuma Yesuus isaan ajaje godhan;

⁷ Isaan harree sanii fi ilmoo harre'ee san fidan, uffata ufii irra kayan; innillee irra taa'e.

⁸ Gumiin guddaan uffata ufii karaa irratti afan; kuuwwanillee baala mukaa cira'aa karaa irratti afa'aa turan.

⁹ Gumiin afo'oo fi duuba isaatiin deeman iyya'aa, «Hosaanaa Ilma Daawitiitiif jedha. Ka maqaa Goofta'aatiin dhufu ka eebbifame! Hosaanaa samii irratti!» jedha'aa turan.

¹⁰ Yesuus hennaa Yeruusaaleem seene, qachaan guutuun raafamee, «Kun eennu?» jedhan.

¹¹ Gumiin isa woliin deema'aaran, «Kun Yesuusii raatticha qachaa Naazireetii ka lafa Galiila'aa keessatti argamuu dhufe» jedhan.

Yesuus mana woyyuu Qulqulleesse

¹² Yesuus gara mana woyyu'uu seenee, namoota mana woyyuu keessatti bitatuuf gurguratu maraa gad yaase; worra birrii sharafuu fi teessoo worra handarii gurguratuu garagalchee,

¹³ «Manni kiyya mana itti faateffatan jedhama jedhamee barreeffameera; isin ammoo goda shiftootaa gootan» isaaniin jedhe.

¹⁴ Mana woyyuu keessatti balloonninii fi hokkoloonni gara Isaa dhufan, innillee isaan fayyise.

¹⁵ Haata'uu ammoo bulchoonni gadootaatii fi barsiisonni Seera Muuse'ee baasaa fi maalalee inni mana woyyuu keessatti godheef, hennaa ijoolleen, «Hoosaanaa Ilma Daawitiitiif» jedha'aa iyyan arganii aaran.

¹⁶ Kanaaf Yesuusiin, «Ati waan ijoolleen tun jettu hin dhageettuu?» jedhaniin. Yesuus, «Ee hin dhagaya; isin sirimaa, ‹Afaan ijoolle'eetii fi daa'imman harma hootu irraa galata ufiif qopheeffatte› ka jedhu hin dubbifnee?» isaaniin jedhe.

¹⁷ Achiin maayessa gara qachaa Biitaaniya'aa deemee achi bule.

Yesuus Muka Hurbu'uu Tokko Abaare

¹⁸ Yesuus ganama barii, hennaa gara qacha'aa deebi'u beelayee,

¹⁹ Karaa irratti muka hurbu'uu argee, gara isi'ii goree yoo laalu baala malee, womaa irratti hin argine. Achiin maayessa inni hurbuu saniin, «Horomaa deebi'ee sanyiin sirratti hin argamin» jedheen. Yoma san munni hurbu'uu sun goge.

²⁰ Darasoonni isaallee kana arganii attamitti yoosuu godde? jedhanii maalalan.

²¹ Yesuusillee deebisee, «Ani dhugamaan isiniin jedha, isin yoo amantaa qabaattani, mamuu yoo baattan, waan muka hurbu'uu irratti ta'e qofa hin gootan; isin gaara kanaanillee, ‹Asii buqqa'ii gara galaanaatitti darbam› yoo jettan, hin ta'a.

²² Amanta'aan yoo faateffattan waan faateffattaniif san maraa hin argattan» isaaniin jedhe.

²³ Gara mana woyyuu seenee uduu barsiisu, bulchoonni gadootaa, manguddoonninii fi gumiin gara isaa dhiyaatanii, «Ati baallii maali'itiin waan kana goota? baallii kana eentu sii kenne?» jedhaniin.

²⁴ Yesuus deebisee, «Anillee gaafii tokko isin gaafadha; isin yoo deebii naa deebiftan, achiin maayii anillee baallii maali'iitiin waan kana akka godhu isinitti hima.

²⁵ Cuuphaan Yohaannis cuuphe Rabbiin irraa dhufe moo, yookiin nama irraa dhufe?» isaaniin jedhe. Isaanillee wol mormanii, « ‹Rabbiin irraa dhufe› yoo jenne, inni, ‹Isin maaf isa hin amanne ree?› nuun jedha;

²⁶ ‹Nama irraa› yoo jenne, martinuu akka raagaatitti waan Yohaannisiin laalaniif, gumii sodaanna» jedhan.

²⁷ Maarre isaan deebisanii, Yesuusiin, «Nu hin beennu» jedhan. Yesuusillee, «Baallii maali'iitiin waan kana akka godhu isinitti hin himu» isaaniin jedhe.

Mammaaka Waan Ilmaan Haadhaa Lamaanii

²⁸ Yesuus isaaniin, «Maal isinitti fakkaata? Namichi tokko ijoollee lama qaba; inni gara hangaftichaa dhaqee, ‹Ilma kiyya, adha hulee woyini'ii dhaqii huji› jedheen.

²⁹ Innillee deebisee, ‹Ani hin dhaqu› jedhe; maayessa ammo gaabbee deeme.

³⁰ Abbaan gara ilma lammaffa'aallee dhaqee akkasuma jedhe; ilmi lammaffa'aallee, ‹Hin dhaqa, abbaa kiyya!› jedhe. Inni ammo hin dhandhe.

³¹ Isaan lamaan kanniin keessaa kamtu waan abbaan barbaade hojjate?» jedheen. Isaan, «Hangafticha» jedhan. Yesuus, «Ani dhugamaan isiniin jedha. Worri qaraxa guuruu fi seebartoonni jeennata Rabbii galu'uun isin firrisan» isaaniin jedhe.

³² Yohaannis karaa qajeellumma'aatiin isinii dhufe. Isin ammoo itti hin amanne. Qaraxxoonninii fi seebartoonni ammoo itti amanan. Isin kana argitaniillee, aagii galtanii itti hin amanne.

³³ Yesuus ammallee, «Mammaaka biraa dhagayaa'a!, Namicha biqiltuu woyini'ii dhaabe tokkotu ture. Dallawa dhaga'aan itti ijaaree, boolla woyinii itti cuunfanillee qotee, siree irra taa'anii eegan ijaaree qotee bultootatti kireessee gara biyya biraa deeme.

³⁴ Hennaa woyiniin sun gaye, midhaan fudhachu'uuf hojjattoota ufii gara worra biqiltuu woyini'ii eeganii erge.

³⁵ Qonnaan bultoonni isaa sun hojjattoota isaa keessaa nama tokko qabanii dhaanan, kaan hin ajjeesan, kaan ammoo dhaka'aan tuman.

³⁶ Worra hojjattoota duraa laakkobsaan caalan isaanitti erge. Sanniinillee akkuma kaawwanii godhan.

³⁷ Maayessa ammo, «Ilma kiyya hin kabajjan.» jedhee, Ilma ufii isaanitti erge.

³⁸ Qonnaan bultoonni sun ammoo, Ilma isaa hennaa argan, ‹Ka dhaalu kanaa; koottaa, isa ajjeefnee ristii fudhannaa.› woliin jedhan.

³⁹ Isaan Ilma isaa qabanii, biqiltuu woyini'ii keessaa baasanii ajjeesan.

⁴⁰ Eegasuu Abbaan biqiltuu woyinii sanii hennaa dhufe, qonnaan bultoota san waan maal godhu seetan?» isaaniin jedhe.

⁴¹ Isaan deebisanii, «Inni worra hamoota hammeenna isaaniitiin isaan ajjeesa. Biqiltuu woyini'ii kana, qonnaan bultoota biraa hennama henna'aan yoo midhaan gaye isaa fidaniifiititti kenna.» jedhaniin.

⁴² Yesuus, «Isin barreeffama Woyyuu keessatti, ‹Dhagaan worri mana ijaaru tuffate, inni dhagaa dhagaa maraa caalaa barbaadamu ta'e; kun Goofta'an ta'e, Ija keennaafillee waan baasaa ti!› Ka jedhu horomaa hin dubbifnee?

⁴³ «Kanaaf, akkana isiniin jedha, jeennanni Rabbii isin irraa fudhatamtee, banii daraaraa godhatuuf kennamti. [

⁴⁴ Ka dhakaa kana irratti kufu hin caccaba. Namni dhakaan kun irratti kufe maruu hin bututa.]»

⁴⁵ Bulchoonni gadootaatii fi Fariisonni hennaa mammaaka dhagayan, akka inni waan isaanii dubbata'aaru hubatan.

⁴⁶ Isa qabuu barbaadanii, gumiin akka raagaatitti waan isa laaluuf isaan sodaatanii isa dhiisan.