Wongeela Maatewos 14 - WAADAA LAMMATAA

Du'uu Yohaannisii Cuupha'aa

¹ Bara san bulchaan kutaa arfaffa'aa Heroodis seenaa Yesuusii dhagayee,

² Hojjattoota ufiitiin, «Kun Yohaannisii cuupha'atu du'aa ka'eera. Kanaaf hujiin maalaleen kun isaan hojjatamte» jedhe.

³ Heroodis sababaa Heroodiyaadaa haadha manaa obboleessa ufii ta Filiphoosiitiif jedhee, Yohaannisiin qabsiisee mana hidha'aatitti hiisisee ture.

⁴ Yohaannis Heroodisiin «Haadha manaa obboleessa keetii fuudhuun seeraa miti» jedheenii ture.

⁵ Heroodiis, Yohaannisiin ajjeesisuu barbaade, gumiin ammoo akka raagaatitti waan isa laalaniif sodaate.

⁶ Haata'uu ammoo guyyaa ayyaana dhaloota Heroodiisii mucattiin Heroodiyaada'aa isaan jiddu'utti sirbiteeti, Heroodiisiin guddiftee gammachiifte.

⁷ Kanaafuu Heroodiis waan isiin isa kadhatte maraa kennu'uufiif kaku'uun waadaa galeef.

⁸ Isiinillee haadhaan gorfamtee, «Ammuma mataa Yohaannisii cuupha'aa qorii keessa kaayii naa kenni» jette.

⁹ Mootiinillee hin gadde; Haata'uu ammoo waan dura kakatee fi namoota isa woliin jiraniif jedhee, mataa Yohaannisii muranii akka isi'ii kennan ajaje.

¹⁰ Innillee nama gara mana hidha'aatitti ergee, mataa Yohaannisii mursiise.

¹¹ Mataa isaallee muranii Qorii keessa kaayanii fidanii mucatti'ii kennan; Isiinillee fuutee gara haadha ufii fidde.

¹² Darasoonni Yohaannisii cuupha'aa dhaqanii, reeffa isaa fidanii awwaalanii deebi'anii Yesuusitti odeessan.

¹³ Yesuusillee du'a Yohaannisii hennaa dhagaye, hulee sanii ka'ee hojja ufii yabalaan gara lafa udume'ee dhaqe.

¹⁴ Baniinillee akka inni deeme hennaa dhagayan, qachaa keessaa bayanii miilaan isa faanaa deeman. Yesuus yabala keessaa bayee banii heddu argee, isaaniif gaddee dhibamtoota isaaniillee fayyise.

¹⁵ Hennaa lafti dhiite, darasoonni gara isaa dhiyaatanii, «Lafti udume'e, laftillee dhiiteerti kanaaf gara gandootaa dhaqanii waan nyaatan akka bitatan gumii kana gad dhiisi» jedhaniin.

¹⁶ Yesuus ammoo, «Dhaquu isaan hin barbaachisu, isinuu waan nyaatan kenna'aaf!» isaaniin jedhe.

¹⁷ Isaanillee deebisanii, «Nu xoroshoo shanii fi qurxummii lamaa malee, asii womaa hin qabnu» jedhaniin.

¹⁸ Yesuus, «Sanuma as fidaa'a!» jedhe.

¹⁹ Achiin maayessa inni gumiin marga irra akka taa'an ajaje. Xoroshoo shanii fi qurxummii lamaa fuudhee, gara sami'ii ol laalee, galateeffatee xoroshoo caccabsee, darasootatti kenne; darasoonnillee gumi'iif kennan.

²⁰ Gumiin martinuu nyaatanii quufanii; hambaa irraa hafe, xoroshoo gindoo kudha lama guutuu fuudhan.

²¹ Worri nyaate dubarti'ii fi ijoolleen uduu hin laakkayamin, dhiirti callaan kuma shan.

Yesuus Bisaan Irra deeme

²² Yesuus uduu gumii geegessa'aaru darasoonni isaa yabala keessa seenanii gara gamaa akka isa firrisanii bayan isaanitti hime.

²³ Yesuus gumii haga geegesseen maayii, faateeffachu'uuf hojjuma ufii gara gaaraa ol baye. Hennaa galgaloofte, inni hojjuma ufii achi ture.

²⁴ Hennaa san yaballi ammoo, galaana edduu uduu deema'aartu bubbeen waan gara afo'ootiin bubbisa'aa tureef, dambali'iin asii fi achi raafamte.

²⁵ Halkan keessa gara iyya lukkuu lammaffa'aa Yesuus galaana irra deema'aa gara isaanii dhufe.

²⁶ Darasoonni isaa uduu inni galaana irra deemu arganii, bararraaqanii, «Kun ekera'a» jedhanii sodaatanii iyyan.

²⁷ Hennama san Yesuus ammoo, «Jabaadhaa'a! anaa, hin sodaatinaa'a!» jedhee dubbate.

²⁸ Pheexroosillee deebisee, «Gooftaa'a, yoo si taate, gara kee bisaan irra akka dhufu na ajaji» jedheen.

²⁹ Yesuus deebisee, «Koottu!» jedheen. Maarre Pheexroos yabala keessaa bu'ee gara Yesuusii dhaqu'uuf, bisaan irra deeme.

³⁰ Haata'uu ammoo, hunna bubbe'ee hennaa arge, sodaatee liqimfamuu jalqabee jennaan, «Gooftaa'a, na oolchi.» jedha'aa iyye.

³¹ Yesuus yoma san harka ufii hiixatee, isa qabee, «Ati bada nama amantaa dhidhu'uu! Maaf mamte?» jedheen.

³² Hennaa Yesuusii fi Pheexroos yabala keessa seenan qilleensi cadhise.

³³ Worri yabala keessa turan, «Dhugamaan ati Ilma Rabbiiti» jedhanii sagadaniif.

Yesuus Genesaarexitti Worra Dhibame Fayyise

³⁴ Yesuusii fi darasoonni isaa hennaa gama ceeyan, lafa Genesaarexi jedhamtu gayan.

³⁵ Worri hulee san jiran Yesuusiin ta'uu haga beekan, gara biyya naannaya isaanii jiran marattuu erganii, dhukkubsattoota maraa gara isaa fidan.

³⁶ Qaccema uffata isaa callaa tuqanii fayyu'uuf isa kadhatan. Worri isa tuqe maruu hin fayye.