Wongeela Maarqoos 8 - WAADAA LAMMATAA

Yesuus Namoota Kuma Afurii Nyaachise

¹ Hennaa san gumiin guddaan Yesuusiin biratti wolgayan. Sababaa isaan waan nyaatan dhabaniif Yesuus darasoota gara ufii waamee,

² «Baniin kun na woliin guyyaa sadihii waan turaniiraniif; waan nyaatan waan hin qabneef garaa na nyaatan.

³ Isaan keessaa gari gariin lafa fago'oo waan dhufaniiraniif uduu isaan waa hin nyaachifne gara manaa deema'aa galaa yoo jenne, karaa irratti laafanii kufan» jedheen.

⁴ Darasoonni isaa deebisanii, «Lafa gammoojjii akkanaatitti nyaata namoota haganaatii gayu eessaa fuuna» jedhaniin.

⁵ Innillee, «Xoroshoo hagam qabdan?» jedhe isaan gaafannaan, «Xoroshoo torba» jedhaniin.

⁶ Inni gumii saniin, «Lafa taa'aa'a» jedhee, xoroshoo torbaa san fuudhee, Rabbiin galateeffateeti, caccabsee, gumi'ii akka qoodan darasoota ufiititti kenne; isaanillee gumii taa'e sanii qoodan.

⁷ Akkasuma isaan qurxummii didiqqoo hagoo qaban; Yesuus qurxummii saniifillee Rabbiin galateeffatee, akka gumi'ii qoodan darasoota ufiititti kenne.

^8-9 Gumiin namoota kuma afurii sun haga nyaatee quufeen maayessa, hambaa hafe gindoo gugurdaa torba guutuu isaan jalaa kaasan. Yesuus akkuma gumii ufirraa galcheen,

¹⁰ darasoota woliin gara aanaa Dalmaanuta'aa dhaqe.

Worri Fariisotaa Malkata Gaafatan

¹¹ Fariisonni qoru'uuf bayanii malkata samii irraa akka itti mudhisu isarraa barbaadanii isaan wol mormuu jalqaban.

¹² Inni hafuura guddaa baafatee, «Dhaloonni kun maaf malkata barbaadan? Dhuga'aan isiniin jedha, dhaloota kanaaf malkanni hin kennamuuf» jedhe.

¹³ Achiin maayessa, inni achumatti isaan dhiisee yabala keessa seenee gama ceeye.

Raacitii Fariisotaatii Fi Heroodisii

¹⁴ Darasoonni dhalee qabachuu waan irraanfataniif xoroshoo tokkottii malee yabala keessaa womaa hin qaban.

¹⁵ Yesuus isaaniin, «Laalladhaa'a! raacitii Fariisotaatii fi Heroodiisii irraa uf-eeggadhaa'a» jedhee isaan seere.

¹⁶ Isaan, «Waan nu dhalee hin qabneef akkana nuun jedha» jedhanii woliin qaaqan.

¹⁷ Yesuus yaada isaanii beekee akkana isaaniin jedhe, «Maaf waan dhalee dhabuu keessanii woliin qaaxxan? Isin Haga ammaa hin beennee yookiin hin hubannee? Qalbiin teessan duuda'a?

¹⁸ Ija uduu qabdan hin argitanii? Gurra uduu qabdan hin dhageettanii? hin qaabattanii?

¹⁹ Hennaa ani xoroshoo shanii namoota kuma shaniif caccabse, hambaa hafe gindoo hagamii kaaftan?» isaanillee «Kudha lama» jedhanii deebisaniif.

²⁰ Yesuus itti aansee, «Xoroshoo torba namoota kuma afuriif hennaa caccabse, hambaa hafe Gindoo hagam guutuu kaaftan?» Isaaniin jedhe. Isaanillee, «Torba» jedhaniin.

²¹ Inni, «Isin haga ammaallee hin hubannee?» isaaniin jedhe.

Yesuus Nama Ballaa tokko Fayyise

²² Yesuusii fi darasoonni isaa gara Beetasaayidaa dhufan. Jarri tokko namicha ballaa tokko gara isaa fidanii akka inni harkaan qaqqabu kadhatan.

²³ Yesuus namicha ballaa san harkaan qabee ganda san keessaa baasee, ija isaatitti tufee, harka ufii irra kaayee, «Waa arga'aartaa?» jedhee gaafate.

²⁴ Namichi ol jedhee laalee, «Ee, namoota arga'aara; haata'uu ammoo akka muka deemuu na fakkaatan» jedhe.

²⁵ Yesuus ammallee harka ufii ija namichaa irra kaaye. Hennaa san namichi guuttatee laale. Ijji isaa fayyitee waa maraa midhaassee arge.

²⁶ Achiin maayessa Yesuus, «Ganda keessa hin deddeemn, eennuttillee hin himin» jedhee namicha gara mana isaa erge.

Pheexroos Yesuus Eennuun akka ta'e Hime

²⁷ Yesuusii fi darasoonni isaa gara ganda Filiphoos Qeesaariya'aa bayanii, inni uduu deema'aaran karaa irratti «Namoonni naan eennu jedhan?» jedhee darasoota gaafate.

²⁸ Isaanillee, «Gariin Yohaannisii cuupha'a, gariin Eeliyaas, kuuwwan ammoo raattota keessaa tokko siin jedhan» jedhanii deebisaniif.

²⁹ Yesuus, «Isin hoo eennu naan jettan?» jedhee isaan gaafate. Pheexroosillee, «Ati Kiristoos» jedhee deebise.

³⁰ Waan isaa eennuttillee akka hin himne isaan seere.

Yesuus Waan Rakkinaa Fi Du'a Ufii Dubbate

³¹ Achiin maayii Yesuus, «Ilmi Namaa manguddoota biyyaa, bulchoota gadootaatii fi barsiisota Seera Muuse'eetiin guddisee rakkata. Inni hin jibbama, hin ajjeefama; guyyaa sadihiin maayii hin ka'a» jedhee isaan barsiisuu jalqabe.

³² Inni waan kana ibsee dubbate. Pheexroos Yesuusiin ufitti sissee isa teedeffatuu jalqabe.

³³ Inni ammoo garagalee darasoota laalee, Pheexroosiin, «Seexana nana, na biraa fagaadhu; Ati waan namaa malee, ka Rabbii hin yaaddu» jedhee teedeffate.

³⁴ Achiin maayii Yesuus gumii'ii fi darasoota ufitti waamee, «Namni na faanaa deemuu barbaadu yoo jiraate, uf haa waakkatuu; fannoo ufiillee baadhatee na faana haa deemuu.

³⁵ Namni lubbuu ufii hambifachuu barbaadu maruu hin balleeffata; waan kiyyaa fi waan Oduu Nagayaatiif lubbuu ufii ka balleeffatu maruu ammoo hin oolfata.

³⁶ Namni waan adunyaa tanaa maraa qabaatee, lubbuu ufii yoo dhabe ammoo maal isaa godha?

³⁷ Namni bikka lubbuu ufii maal kennuu danda'a?

³⁸ Namni kamuu dhaloota seebaruu fi cubbamaa kana keessatti, naa fi dubbii kiyyatti yoo saalfate, Ilmi namaa ulfinna Abbaa ufiitii fi maleekkota Woyyuu woliin hennaa dhufu isatti saalfata» jedhe.