Wongeela Maarqoos 7 - WAADAA LAMMATAA

Seera Rabbiitii Fi Aadaa Abbootaa

¹ Fariisonninii fi barsiisonni Seeraa worri Yeruusaalemii dhufan gari gariin Yesuusiin biratti wolgayan.

² Darasoota isaa keessaa gari gariin uduu hin dhiqanne harka xuri'iitiin xoroshoo uduu nyaatan arganii,

³ Fariisonninii fi Yihuudonni maruu seera manguddootaa eegu'uuf harka ufii midhaasanii uduu hin dhiqatin hin nyaatan.

⁴ Gabaya'aa yoo deebi'an uduu ufi hin qulqulleesin hin nyaatan. Aadaan isaan kabajjan ka biraallee heddutu jira; isaanillee kobbee, ottee, qorii waan akka sibiilaa irraa hojjatamee fi siree fa'a dhiqu'u.

⁵ Kanaaf Fariisonninii fi barsiisonni Seeraa, «Darasoonni tantee akka aadaa manguddootaatitti jiraatuu dhiisaanii harka xuri'iitiin maaf hurbaata nyaatan?» jedhanii Yesuusiin gaafatan.

⁶ Inni ammoo deebisee, «Bada fakkeessitoota, Isaayyaas waan keessan raagee, ‹Baniin kun afaaniin na kabajjan, garaan isaanii narraa fago'o.

⁷ Aadaa namaa akka ajaja Rabbiititti barsiisa'aa, na kaddaamuun isaanii gatii hin qabu› ka jedhe dhuga'a.

⁸ Isin ajaja Rabbii dhiiftanii xuwwe'ee fi ottee dhiqu'uun seera namaa eeddan. Kanaaf waan kana fakkaatu waan biraallee waan heddu gootan» isaaniin jedhe.

⁹ Yesuusillee akkana isaaniin jedhe: «Aadaa teessan jabeessu'uuf jettanii ajaja Rabbii guddiftanii tuffattan.

¹⁰ Muuseen, ‹Haadhaa fi abbaa kee kabajji!›, ‹Haadhaa fi abbaa ufii ka abaaru haa ajjeefamuu› jedhee ajajeera.

¹¹ Isin ammoo namni tokko haadhaa fi abbaa ufiitiin, ‹Wonti isinii kennuu na barbaachisu, Rabbiif kennameera› yoo jedhe,

¹² Achiin maayii haadhaa fi abbaa ufiitiif waan tokkollee akka godhu hin hoffolchitan.

¹³ Aadaa teessan ta wolitti dabarsitan sanniiniif, dubbii Rabbii diiddan. Akkasuma kanniin ka fakkaatu waan heddu gootan.

Waan Nama Batteessu

¹⁴ Akkasuma baniillee waamee, «Isin martinuu na dhageeffadhaa'a; qalbeeffadhalle'e.

¹⁵ Wonti nama batteessu waan keessa namaatii bayu malee, ka diidaa gara gara'aa seenu tokkollee nama hin batteessu.

¹⁶ [Ka gurra dhagayu qabu yoo jiraate haa dhagayuu]» isaaniin jedhe.

¹⁷ Banii keessaa gara manaa hennaa seene darasoonni isaa waan mammaaka sanii isa gaafatan.

¹⁸ Inni, «Isinillee kana maraa worra hin qalbeeffannee? diidaa gara afaanii ka seenu sirimaa akka nama hin batteessine hin argitanii?

¹⁹ Gara gara'aa seenee gara diidaa baya malee, gara qalbi'ii hin seenu» isaaniin jedhe. Yesuus akkana jechu'uun nyaanni martinuu qulqulluu akka ta'e ibse.

²⁰ Yesuus itti aansee akkana jedhe: «Waan garaa namaa keessaa bayutu nama batteessa.

²¹ Wonti garaa namaa keessaa bawu: Yaada hamaa, seebaruu, hanna, ajjeesuu,

²² seebaruu, luqunuu, hammeenna, sobuu, hoossuu, hinaaffaa, maqaa balleessuu, uf jaju'uu fi ceem'uu fa'a.

²³ Hamtuun kun martuu keessa namaatii bayee nama batteessa.»

Amantii Dubartii Takkaa

²⁴ Yesuus achii ka'ee gara biyya Xiroosiitii fi Siidoona'aa dhaqee gara mana tokkoo seene. Akka inni achi jiru eennullee akka beeku hin barbaanne; haa ta'uu ammoo dhokachuu hin dandeenne.

²⁵ Dubartiin takka ta mucattiin isi'ii ayyaana batti'iin qabamteertu, gurra Yesuusii dhageettee dhuftee, luka isaa jalatti jidde.

²⁶ Dubartittiin sun nama Giriikii ti; isiin biyya Sooriya'aa keessatti hulee Finiiqee jedhamtutti dhalatte. Isiin akka mucattii isi'ii keessaa jinnii baasuuf Yesuusiin kadhatte.

²⁷ Yesuus ammoo, «Mee dura ijoolleen nyaattee haa quuftuu; nyaata ijoolle'ee fuudhanii sariinii darbuun sirri'ii miti» jedheen.

²⁸ Isiinillee deebiftee, «Ee, Gooftaa'a, sariinillee waanuma qorii ijoolle'ee irraa harca'e nyaatanii mii!» jetteen.

²⁹ Innillee isi'iin, «Dubbima kee kanaafuu jinniin mucattii tee keessaa bayeera; gara mana keetii gali» jedheen.

³⁰ Isiin hennaa gara manaa deebitee galte, jinniin mucattii keessaa bayee, mucattiinillee ta siree irra ciifteertu argite.

Yesuus Namicha Gurraa Fi Afaan Duude Fayyise

³¹ Achiin maayii Yesuus qachaa Xiroosiitii bayee, karaa Sidoona'aatiin lufee, biyya qachoota kudhanii jedhamtu keessa bayee gara galaana Galiila'aa dhaqe.

³² Jarri tokko namicha gurra duuda'aa ka afaan wolhidhu gara Yesuusii fidanii, akka inni harka ufii isa irra kawuuf kadhatan.

³³ Yesuus namicha san gumii keessaa adda isa baasee, quba ufiillee gurra isaa keessa kaaye. Achiin maayii tufee arraba isaa tuqe.

³⁴ Gara sami'ii ol jedhee laalee, hafuura guddaa baafatee, «Efaataa» jedheen. Akkas jechuun, «Banami!» jechu'u.

³⁵ Yoosuu gurri isaa banamee, arrabni isaallee hiikkamee qajeelchee dubbate.

³⁶ Yesuus eennuttillee akka hin himne isaan seere. Isaan ammoo uduu inni isaan seeru, guddisanii odeessan.

³⁷ Worri dhagayan maruu waan kana hagaa olitti maalalfatan, «Wonti inni godhe martuu misha'a; worri gurra duude akka dhagawu, worri afaan duude akka dubbatu hin godha» jedhan.