Wongeela Maarqoos 5 - WAADAA LAMMATAA

Yesuus Nama Jinniin Dhaye Fayyise

¹ Yesuusii fi darasoonni isaa gara galaana gama gara biyya Gergessooni dhaqan.

² Hennaa Yesuus yabala keessaa baye, namichi ayyaanni battiin dhayeeru tokko awwaallan jiddu'uu bayee gara isaa dhufe.

³ Namichi kunillee bakka awwaalaa jiraata'aa ture; eennulle sansalaataan isa hidhuu hin dandeenne.

⁴ Hennaa hedduu sansalaataa fi gaadii sibiilaatiin hidhama'aa ture. Haata'uu ammoo sansalaata ufirraa kukkuta'aa, gaadii sibiilaallee caccabsa'aa ture. Namni danda'ee isa gad qabu tokkolle hin jiru.

⁵ Hennaa maraa halkanii fi guyyaa awwaallan jiddu'uu fi gaarran irra naannaya'aa iyya'aa, nafa ufiillee dhaka'aan duguuga'aa ture.

⁶ Inni hennaa Yesuusiin fago'otti arge gara isaa fiigee, jilbiiffatee sagadeefii,

⁷ laagaa gudda'aan iyyee, «Yesuus, Ilma Rabbii Ol'aana'aa! Maal narraa qabda? ani Rabbiin si wogee na hin rakkisin» jedheen.

⁸ Yesuus, «Ayyaana battii, nama kana keessaa bayi» waan isaan jedheeruuf.

⁹ Yesuus, «Maqaan kee eennu?» jedhee isa gaafate. Inni, «Nu heddu waan taaneef maqaan kiyya duula» jedhee isaa deebise.

¹⁰ Biyya san keessaa akka isaan hin baafneef inni jabeessee isa kadhate.

¹¹ Ededa gaara achi jiruu irra gobbuun booyye'ee heddu bobbayanii waan turaniif,

¹² «Gara booyyotaa akka gallu nu ergi» jedhanii kadhatan.

¹³ Yesuusillee, «Maarre» isaaniin jedhe. Ayyaanonni battiin sunniinillee namicha keessaa bayanii gara booyyotaa galan. Gobbuun booyye'ee ka haga kuma lamaa gayan, afaan qilee irraa gara galaanaa gadi gugatanii liqimfaman.

¹⁴ Jarri tisse'eellee dheessanii, waan ta'e san qacha'aa fi baadiyyaa keessatti odeessan. Namoonnillee, waan ta'e san laalu'uuf dhufan.

¹⁵ Hennaa Yesuusiin bira gayan, namichi duula jinni'iitiin dhayamee ture sun, uffata uffatee, qalbiinillee deebiteefii ka taa'eeru arganii sodaatan.

¹⁶ Namoonni isa argan sun, waan namichi jinniin dhaye sun ta'ee fi waan booyyotaa bani'itti odeessan.

¹⁷ Achiin maayii akka Yesuus biyya isaanii dhiisee deemu Isa kadhatan.

¹⁸ Hennaa Yeuus achii deemu'uuf yabala yaabbata'aaru namichi jinniin dhaye sun, «Ani si woliin deema» jedhee isa kadhate.

¹⁹ Yesuus ammoo didee, «Gara mana keetii deebi'ii galii, waan guddaa attamii akka Gooftaan sii godhee fi attamitti akka inni siif garaa nyaattaye worra keetitti himi!» jedheen.

²⁰ Namichillee deemee, waan guddaa attamii akka Yesuus isaa godhe biyya qachoota kudhan jedhamu maratti odeesse. Baniin dhagaye maruu hin maalalfate.

Mucattii Duutee Fi Dubartii Uffata Yesuusii Tuxxe

²¹ Yesuus galaana gama yabalaan haga ceeyeen maayii namoonni heddu wolgayanii gara isaa dhufan. Innillee qarqara galaanaa ture.

²² Iyaayiroosi namni jedhamu itti gaafatamaan Mana sagada Yihuudotaa tokko dhufee, hennaa Yesuusiin arge luka isaa jalatti kufee,

²³ «Mucattiin tiyya diqqoon dhibamtee afaan du'aa jala waan jirtuuf, akka fayyitee lubbu'uun jiraattu, koottuu harka kee isii irra kaayi» jedhee jabeessee kadhate.

²⁴ Achiin maayii Yesuus isa woliin deeme; namoonni hedduullee isa faanaa deemanii gara maraan isa hucuucan.

²⁵ Dubartiin dhiinni isi'ii woggaa kudha lamaaf jigu'uun rakkattu takka achi turte.

²⁶ Isiin ogeeyyii qorichaa biratti yaalama'aa birrii ufii fixattullee, dhibeen itti jabaate malee, womaa isi'ii hin cabne.

²⁷ Isiin hennaa gurra Yesuusii dhageette, isa duubaan gumii jiddu'uun dhuftee uffata isaa tuxxe.

²⁸ Isiin, «Ani uffata isaa yoo tuqe hin fayya» jettee garaa ufiititti yaaddee turte.

²⁹ Yomasan dhiinni isi'ii jiguu dhiisee, isiinillee dhibee ufii irraa akka fayyite ufirratti beette.

³⁰ Yesuusillee yoosuu hunniti fayyumsaa isa irraa akka baye beekee, gumii jiddu'utti ufirra garagalee, «Uffata kiyya eentu tuqe?» jedhe.

³¹ Barattoonnillee, «Uduu akka gumiin si dhidhiiba'aaru argitu, ‹Eentu na tuqe?› jettee gaafattaa?» jedhaniin.

³² Yesuus ammoo nama isa tuqe argu'uuf ufirra garagalee laale.

³³ Dubartittiin ammoo waan isi'ii godhame beettee sodaata'aa, hollata'aa, dhuftee luka isaa jalatti kuftee, dhugaa maraa itti himte.

³⁴ Innillee, «Intala tiyya, amantaan kee si fayyiseera; nagayaan deem; dhibee kee irraallee fayyi» isi'iin jedhe.

³⁵ Innillee uduma dubbata'aaru namoonni tokko tokko mana Iyaayiroosii bulchaa Mana sagada Yihuudotaatii dhufanii, «Intalti tee duuteertii, maaf barsiisaa dadhabsiifta?» jedhaniin.

³⁶ Yesuus ammoo waan isaan jedhan san nafaan didee, bulchaa Mana sagada Yihuudotaatiin, «Amani malee, hin sodaatin!» jedheen.

³⁷ Yesuus: Pheexroosiin, Yaaqoobii fi obboleessa Yaaqoobii Yohaannisii achi, eennullee akka isa faanaa deemu hin barbaanne.

³⁸ Hennaa mana bulcha'aa san bira gayan, Yesuus namoonni iyya'aa, woca'aa, uduu booyan arge.

³⁹ Inni mana seenee, «Maaf woca'aa boottan? Mucattiin hin rafteerti malee, hin duune» isaaniin jedhe.

⁴⁰ Isaan ammoo itti kolfan. Achiin maayii inni isaan maraa manaa baasee, abba'aa fi haadha mucatti'ii, darasoota isa woliin jiranillee qabatee gara gola reeffi mucatti'ii jiru san seene.

⁴¹ Harka mucati'iillee qabee, «Xaliitaa quumii!» jedheen. Hiikkaanillee, «Mucattii diqqoo'o! Ol ka'i!» jechu'u.

⁴² Mucattiinnillee yoosuu kaatee dhaabattee deddeemte. Isiin nama woggaa kudha lamaati. Waan ta'e san guddisanii maalalfatan.

⁴³ Yesuus waan ta'e kana eennuttillee akka hin himne jabeessee isaan seere; waan nyaattullee akka isi'ii kennan itti hime.