Wongeela Maarqoos 4 - WAADAA LAMMATAA

Mammaaka Waan Nama Sanyii Facaasuu

¹ Yesuus ammallee galaana Galiila'aa biratti barsiisuu jalqabe. Namoonni hedduu isa biratti waan wolitti qabamaniif inni yabala gubbaa bayee galaana irra ta'e. Baniin maruu qarqara galaanaa lafa irra turan.

² Inni waan hedduu mammaakaan barsiisa'aa ture. Hennaa barsiisullee akkana isaaniin jedhe:

³ «Dhagayaa'a! Namichi tokko sanyii facaasu'uuf baye.

⁴ Hennaa faacaasullee tokko tokko daangaa kara'aa irratti bu'ee simbirroonni dhufanii nyaatan.

⁵ Ka biraallee lafa biyyee guddaa hin qabne ka jalli isaa dhaka'aa irra bu'e; biyyeen gadi fageenna waan hin qabneef yoma san mute.

⁶ Hennaa aduun baate ammoo hin qoore, hiddalle waan hin godhanneef goge.

⁷ Ka biraallee qoree eddu'utti bu'ee sanyii hin godhanne.

⁸ Ka biraa ammoo lafa mishaa irratti bu'ee mutee guddatee, sanyii kenne. Gariin soddoma, gariin jahaatama, gariinillee sanyii dhibba kenne.»

⁹ Achiin maayessa Yesuus, «Ka gurra dhagayu qabu, haa dhagayuu» jedhe.

Mammaanni Maaf Akka Mammaakame

¹⁰ Hennaa Yesuus hojja jirutti worri hulee sanii darasoonni kudha lamaa waan mammaaka kanaa isa gaafatan.

^11-12 Inni akkana isaaniin jedhe: «Dhossaa jeennata Rabbii beekuun isinii kennameera. Worra diida jiraniif ammoo wonti maruu mammaakaan himama. Sababaanillee, ‹Uduma laalan horoma akka hin argineef; uduma dhageeffatan horoma akka hin hubanneef, gara Rabbiillee deebi'anii, cubbuun isaaniillee akka isaanii hin dhiifamne› »

¹³ Achiin maayessa Yesuus akkana isaaniin jedhe: «Mammaaka kana hin hubannee? Eegasuu attamitti mammaaka biraa beettan ree?

¹⁴ Namichi facaasu dubbii Rabbii facaasa.

¹⁵ Sanyiin karaa irratti harca'e, mammaaka worra akkuma dubbii Rabbii dhagayaniin Seexanni dubbii dhagayan san isaan keessaa fudhatuuti.

¹⁶ Sanyiin lafa dhagaa irratti harca'e, mammaaka worra dubbii Rabbii akkuma dhagayaniin gammachu'uun fudhatanii ti.

¹⁷ Isaan ammoo hidda gad fagaatu waan hin qabneef, hennaa diqqo'oof dhaabatan; maayii sababa dubbii Rabbiitiif rakkinninii fi miidhaan yoo dhufe yoosuu gufatan.

¹⁸ Sanyiin qoree keessatti bu'e mammaaka worra dubbii Rabbii dhagayaniiti;

¹⁹ haa ta'uu ammoo yaaddawu'uun jireenna adunyaa tanaa, durumma'aan sobamu'uu fi halchi waan adda addaa itti seentee, dubbii Rabbii huutee uduu sanyii hin godhanne hafan.

²⁰ Sanyiin lafa mishaa irratti bu'e ammoo, mammaaka worra dubbii Rabbii dhagayanii fudhatanii, gariin sanyii soddoma, gariin sanyii jahaatama, gariinillee sanyii dhibba godhatan» jedhe.

Mammaaka Waan Ifa Gombisaa Jalaa

²¹ Yesuus akkana isaaniin jedhe: «Ibsaa fidanii gombisaa yookiin siree jala hin kaayanii ree? Kololee irra kaayanii mii?

²² Wonti dhokate mudhatuun, wonti golgame ifatti bawuun isaa hin hafu.

²³ Ka gurra dhagayu qabu yoo jiraate haa dhagayuu.»

²⁴ Yesuus akkana isaaniin jedhe: «Waan dhageettan qalbifadhaa'a! Bikkituu isin itti bikkitanitti isiniif bikkama; ka san caalutu isinii eda'ama.

²⁵ Ka qabuuf eda'amee kennamaaf, ka hin qabneef ammoo ta qabu sunuu irraa fudhatamti.»

Mammaaka Waan Sanyii Ufumaan Guddatuu

²⁶ Yesuus ammallee akkana jedhe: «Jeennanni Rabbii nama maasa'atti sanyii facaasu fakkaatti.

²⁷ Namichi halkan hin rafa, guyyaa hin ka'a; inni attam akka ta'e uduu hin beenne sanyiin mutee guddata.

²⁸ Ardii sanyiin ufumaan mutee akka guddatu gooti. Dura mutee hudha, itti aansee hin daraara, achiin maayii tumee gaya.

²⁹ Hennaa sanyiin gayee goge, haamaan waan gayeef yoosuu worri haamu haamaa jalqaba.»

Mammaaka Waan Sanyii Sanaaficaa

³⁰ Yesuus akkana jedhe: «Jeennata Rabbii maali'iin wol fakkeessina? Yookiin mammaaka attamiitiin himna?

³¹ Isiin akka sanyii Sanaaficaati. Isiinillee hennaa lafatti facaasan sanyii lafa irra jiru maraa irra diqqo'o.

³² Hennaa facaafamte muttee guddatti; biqiltuu maraa ta caaltu taati; dameewwan gugurdaa baafatti. Simbirroonnille dhufanii gaaddisa damee isi'ii jalatti maandhee ijaaratan.» jedhe.

³³ Yesuus mammaaka hedduu ka kanniin fakkaatuun haga hubannaa isaaniititti dubbii isaanitti hima'aa ture.

³⁴ Inni waa maraa mammaakaan isaanitti hime. Hennaa darasoota ufii woliin hojja jiran ammoo, inni waa maraa isaanii ibsa'aa ture.

Yesuus Danbalii Cadhisiise

³⁵ Gaafas hennaa aduun dhiite Yesuus, «Beenaa, galaana gama ceenaa» isaaniin jedhe.

³⁶ Darasoonni isaa Banii achitti dhiisanii akkuma Yesuus durumaan yabala keessa taa'eeruun isa fuudhanii deeman. Yaballan biraallee isa woliin turan.

³⁷ Bubbeen jabaan bubbisee dambaliin bisaanii haga yabala guututti itti seena'aa ture.

³⁸ Innillee yabala san keessaa gara duubaatiin boraatii boraafatee rafee ture. Darasoonni isaa isa dammassanii, «Barsiisaa'a! Baduun keenna garaa si hin nyaatuu?» jedhaniin.

³⁹ Innillee dammaqee bubbee san teedeffate; dambali'iinillee, «Cadhisi! Hin socho'in!» jedhe; bubbeenillee hin cadhise, hin sokossinelle'e.

⁴⁰ Achiin maayii darasoota ufiitiin, «Maaf akkana sodaattan? Haga ammaallee amantii hin qabdanii» isaaniin jedhe.

⁴¹ Guddisanii waan sodaataniif, «Ka bubbeenii fi dambaliin ajajamuuf kun eennu inni?» woliin jedhan.