Proverbios 5 - Bible in Tzeltal de Oxchuc y Tenejapa

Ya yac'otic ta ch'ayel te mulweje

¹ Jnich'an, ich'bon me ta wenta te sp'ijil jc'ope; ja' me xanopbon te sp'ijil jol yacon ta stuuntesele.

² Jich me ya ana' stsajtayel aba ta lec a; soc na'biluc me awu'un ta lec te bila ya awal te c'alal ya xc'opojate.

³ Melel te yan antse, ay xchi'il te bila ya yale, te sc'ope c'ax jich sc'unil a te bit'il sc'unil aceite;

⁴ pero te slajibale, c'axem jich xch'aal ya xc'ot a te bit'il ch'aal wamale, soc c'axem jich ya xlajinwan a te bit'il puñal te xcha'jejch'el ay ye.

⁵ Teme ya acap aba soc te antse, ya me yic'at bael ta sbelal lajel; te juju-jtejc' te yacane, toj ya xbajt' ta muquenal ch'en.

⁶ Te ants jich yat'ele, ma'yuc sc'oplal ta yo'tan te sbelal cuxlejale; ni ja'uc ya xbajt' ta yo'tan yilel teme ma lequil beuc te banti yac ta baele.

⁷ Ja' yu'un, jnich'an, aiybon me awaiy ta lec te jc'ope; ma me xach'aybon ta awo'tan te p'ijubtesel cu'une.

⁸ Ma me x'alac' bael te yan antse; ma me xawal te ya xnoptsajat bael ta sti' sna,

⁹ swenta yu'un jich ma'yuc mach'a yantic ya awac'bey a te ac'ulejale soc ma'yuc mach'a jyanlumil te ya awac'bey slajinbat te awutsile;

¹⁰ swenta yu'un ma yanticuc mach'atic ya snojes xch'ujt'ic a te bitic ya ata te ay awocol ta at'el yu'une.

¹¹ Teme ma ba ya ach'uune, c'alal ta slajibal ya me x'oc'at yu'un, jich me yac ta c'un lajel bael a te abaq'uetale.

¹² Soc jich me ya awal: “¿Bi yu'un te la jch'ay te tojtesele? ¿Bi yu'un te la jch'ay te tac'uyele?

¹³ Ma ba la jc'an la caiybey te sc'op maestroetic cu'une; ma ba la quich' ta wenta te jp'ijubteswanejetic cu'une.

¹⁴ Jteb xanix sc'an sta yorail te ma ba lec ya xc'oon ta stojol spisil te jlumale”, xaat me ta patil.

¹⁵ Ja' nix me xawajts'es awo'tan a te ja' ya xloc' ta pozo c'oem te ja'at nix awu'une.

¹⁶ Ma me x'amal te ja' ya xloc' ta sloq'uibja' awu'une; ma me x'awixlan ta tojol malel ta calle.

¹⁷ Melel ja'at awu'un te pozo soc nix te ya'lele, ma'yuc mach'a yan yu'un; ma me xawac'bey yantic.

¹⁸ Bayal me yutsil te sloq'uibja' te ja'at awu'une. Aiybeya yutsil soc te mach'a ajoy ta ch'iele,

¹⁹ jich bit'il ch'in antsil chij te buen jc'uxtaywaneje. Spisiluc me ora ya yutsinat, spisiluc me ora ya spotsat ta xc'uxul yo'tan.

²⁰ Jnich'an, ¿bi stuc ya awac' spotsbat awo'tan te yan antse? ¿Bi stuc te ya amey apet aba soque?

²¹ Te Cajwaltic ya me yil te bit'il ya yac' sba te winique; ma xch'ay ta sit te jujun buelta ya sjim te yacane.

²² Te mach'a amen yo'tane ja' nix ya stsacot yu'un te sbolile; ja' nix ya xchucot yu'un jichuc lazo te smule.

²³ Scaj te ma tojuc ya yac' sba te ya xbajt' ta lajele; ja' nix te smuc'ul sbolil te ya x'ic'ot bael ta ch'ayel yu'une.