Proverbios 11 - Bible in Tzeltal de Oxchuc y Tenejapa

¹ Te Cajwaltic ma lecuc yo'tan yu'un te ma ts'acaluc ya slic te kilo; ja' lec yo'tan yu'un stuquel teme ts'acal licbile.

² Te toybail ya xch'ay ich'el ta muc' yu'un; yan te p'ijil-o'tanile, ja' yich'ojic te mach'atic peq'uel yac'oj sbaique.

³ Te mach'atic toj yo'tanic, toj ya x'ainic yu'un; yan te mach'atic te ma tojuc yo'tanique, ja' ya xlajinotic yu'un.

⁴ Ma xtuunix c'ulejalil a ta yorail te castigoe; yan te toj-o'tanile ya x'ac'awan ta libre yu'un te lajele.

⁵ Te mach'a toj yo'tan, ja' ya xtojob ta beel yu'un; yan te mach'a amen yo'tane, ja' nix ya xyalesot yu'un te bila amen ya spase.

⁶ Te stojil chajbanele ya yac' ta libre yu'un te mach'atic toj yo'tanique; yan te mach'atic jbic'tal-o'tanetique, ja' ya x'ac'otic ta chuquel yu'un te bila ya smulanique.

⁷ C'alal ya xlaj bael te mach'a amen yo'tane, pajal ya xlaj bael soc te bila yac ta smaliyel, soc ya xch'ay spisil te bila bayal sc'oplal ta yo'tane.

⁸ Dios ya yac' ta libre yu'un swocol te mach'a toj yo'tane; ja' ya yac'bey sjelolin ta wocol te mach'a amen yo'tane.

⁹ Te c'opetic yu'un te mach'a amen yo'tane, ya sjin te spat-xujq'ue; yan te sp'ijil sjol te mach'a toj yo'tane, ya xcoltaywan.

¹⁰ Teme lec ay te mach'atic toj yo'tanique, ay yutsil yo'tanic yu'un te yajwal lume; teme ya xlaj te mach'atic amen yo'tanique, ya x'awun yu'un yutsil yo'tanic.

¹¹ Te bendición yu'un te mach'atic toj yo'tanic, ya xmuc'ub slumal yu'un; yan te sc'op te mach'atic amen yo'tanique, ya xjin slumal yu'un stuquel.

¹² Te mach'a ma sna' q'uinal, ma lecuc sc'oplal yu'un te spat-xujq'ue; yan te mach'a ay sp'ijile, ma'yuc bi ya yal stuquel.

¹³ Te mach'a buen jle-c'op, spisil ya xchol ta alel; yan te mach'a ya scanantay ta yo'tan te c'ope, ma xchicnantes stuquel.

¹⁴ Teme ma'yuc lequil ajwalil yu'un te nación, ya xch'ay; ja' lec ya xc'ot teme ay tsobolic te mach'atic ya xcoltaywanic ta snopele.

¹⁵ Ma lecuc ya xc'ot te mach'a ya stejc'an sba ta c'op yu'un sbet te mach'a ma sna'bey sbae; yan te mach'a ma stejc'an sba ta c'ope, jun nax me yo'tan ay stuquel.

¹⁶ Te ants te ay yutsil yo'tane, ya sta ich'el ta muc' yu'un; te tulan winic ya sta sc'ulejal.

¹⁷ Te mach'a ya xc'uxtaywan, mero lec bila ya spasbey sba; yan te mach'a amen yo'tane, ja' nix ya sjajch'es te bila ma lecuc ya xc'ot ta stojole.

¹⁸ Te mach'a amen ya x'at'ej, ya slo'laybey staq'uin yajwal; yan te mach'a toj ya x'at'eje, jun yo'tan ya yich' stojol stuquel.

¹⁹ Te mach'a ya st'un te bila toj ta pasele, ay me ta sbelal cuxlejal; yan te mach'a ya st'un te bila amene, ja' me ay ta sbelal lajel stuquel.

²⁰ Te Cajwaltic ya yilay te j'ixta-o'tanetic; yan te mach'atic toj yo'tanique, bin nax yo'tan yu'un stuquel.

²¹ Te mach'atic amen yo'tanic, ya me yich'ic castigo ta mero melel, yan te mach'atic toj yo'tanique, libre ya xc'otic.

²² Ch'ocowil oro ay ta sni' chitam, jich c'oem te ants te ja' nax buen t'ujbil ta ilel te ma sna' q'uinale.

²³ Te bila ya sc'an te mach'a toj yo'tane, puersa lec ya xc'ot ta loq'uel; yan te mach'a amen yo'tanic te ya stoy sbae, ja' nax ya sjajch'es ilimba stuquel.

²⁴ Ay mach'a ya spuc sbiluc, ja'uc me to, ya x'ac'bot xan bayal a te bit'il ya yaq'ue; yan te mach'a scaj st'ut'il ya scom jilel sbiluque, ja' ya x'och ta me'bail yu'un.

²⁵ Te mach'a ma p'isbiluc nax ya yaq'ue, ya me x'esmantesbot xan te sbiluque; melel te mach'a ya yaq'ue, jich nix ya yich' xan.

²⁶ Te mach'a ya sq'uej strigo, ya xbolc'optayot yu'un te ants-winiquetic; yan te mach'a ya xchone, ya x'albot lec sc'oplal stuquel.

²⁷ Te mach'a ya yac' puersa ta spasel te bila leque, lec ya x'ilot; yan te mach'a ma xyac' puersa ta spasel te bila leque, ma lecuc ya xc'ot ta loq'uel stuquel.

²⁸ Te mach'a ja' smuc'ulinej yo'tan te sc'ulejale, jich ya xch'ay te bit'il ya xlubaj coel yabenal te'; yan te mach'a toj yo'tane, jich ya xyaxub te bit'il sc'ab te'.

²⁹ Te mach'a ma scanantay ta lec te mach'atic ay yu'une, jochol me ya xjil te snae; te mach'a ma sna' q'uinale, spisil ora ya smozoinot yu'un te mach'a ay sp'ijile.

³⁰ Te toj-o'tanil ya yac' cuxlejal; yan te mach'a jach-c'ope, ya xpojbot xcuxlejal.

³¹ Teme ya x'ac'bot stojol sc'ab ta balumilal te mach'a toj yo'tane; ja' nix jich ya x'ac'bot stojol ta castigo te mach'a amen yo'tane soc te jmulawile.