Malaquías 1 - Bible in Tzeltal de Oxchuc y Tenejapa

Xc'uxul yo'tan Dios ta stojol Israel

¹ Ja' sc'op Cajwaltic te la yalbey te lum Israel ta swenta Malaquías.

² Te Cajwaltic ya yal: —Jo'on c'uxex ta co'tan —xi'. Ja'uc me to, ya ajojc'oyic: —¿Bit'il ya jna'tic teme c'uxotic ta awo'tane? —xaex. Te Cajwaltic ya sjac': —C'uxex ta co'tan, jich nix bit'il c'uxbaj ta co'tan te Jacob;

³ yan te Esaú ma lecuc co'tan yu'un stuquel. Te slumal Esaú witstiquil te sq'uinale; ja'uc me to, la jc'atp'un ta jochol taquin q'uinal. Jich te sq'uinal sts'umbal Esaú ja' nax lec yu'un yawil te ja'mal ts'i'etic —xi' te Cajwaltique.

⁴ Te mach'a edometic te sts'umbal Esaú, teme jich ya yalic: —La quich'tic jinel; ja'uc me to, ya jcha'pastic xan te jlumaltic —teme xiique. Te Cajwaltic te Spisil ya xju' yu'un, jich me ya sjac': —Ya niwan xcha'pasic xan; ja'uc me to, ya jcha'jinbey xan. Te slumal jich me ay te sbiil: “Slumal mulil” soc “Nación te sbajt'el q'uinal ilinem Cajwaltic yu'un”, xi' me sc'oplal.

⁵ Te ja'ex ya me awilic soc asitic, jich me ya awalic yu'un: “Te Cajwaltic mero muc' ta jyalel, c'axem to smuc'ul stuquel a te bit'il smuc'ul sq'uinal Israel”, xaex me yu'un —xi'.

Cajwaltic la scom te sacerdoteetic

⁶ Te Cajwaltic, te Spisil ya xju' yu'un, ya yalbey te sacerdoteetic: —Te nich'aniletic ya yich'ic ta muc' te statique; te abatetic ya nix yich'ic ta muc' te yajwalique. Te bit'il jo'on Atatonic, ¿bi yu'un te ma x'awich'onic ta muc' jiche? Te bit'il jo'on awajwalonic, ¿bi yu'un te ma'yucon ta ich'el ta muc' awu'unique? Te ja'exe ma'yuc jc'oplal ta awo'tanic, jich yu'un ya awalic: “¿Bila a te ma'yuc ac'oplal ta co'tantic yu'un ya awale?” xaex.

⁷ Te ja'ex ya awich'bonic tel we'elil boloben te ya awac'bonic ta scajtijib jmajt'ane; ja'uc me to, yacalex ta yalel: “¿Bila a te ma ba quich'ojticat ta muc' yu'un?” xaex. Ja' ma x'awich'on ta muc' a te ma'yuc sc'oplal ta awo'tanic te scajtijib jmajt'an,

⁸ te ma'yuc bila amen ta ac'opic a te ya awac'bonic ma'sit chambalametic, coxoetic, soc te ay xchamelic. Baan, ilawilic, ich'beya bael te ajwalil awu'unic, ya me awilic teme bin nax yo'tan ya stsacbat smajt'anine —xi' te Cajwaltique.

⁹ Ya ac'anbeyic Dios te yacuc sna'botic yo'bolil jbatique; ja'uc me to, teme ya awaq'uic majt'anil te ma lecuque, ma me xacuyic te bin nax yo'tan ya stsacbeyex te Diose. Te Cajwaltic te Spisil ya xju' yu'un jich ya yal:

¹⁰ —Ayuc jtuluquex te ya amacbeyic yochibal sti' te templo, swenta yu'un ma tojoluc ya sujt'ex tel ta spasel c'ajc' ta bay scajtijib te jmajt'ane. Melel ma ba bin nax co'tan awu'unic, ni ma ba ya jtsacbat te majt'anil awu'unique.

¹¹ Ta spisil nacionetic ta balumilal ay mach'atic te yich'ojonic ta muq'ue; ta bayuc ta spisil ya xchiq'uic pom ta swenta quich'jibal ta muc', soc ya yac'bonic majt'aniletic te lequique.

¹² Yan te ja'exe, ma'yucon ta ich'el ta muc' awu'unic; ma'yuc sc'oplal ta awo'tanic te scajtijib jmajt'ane, ja' te mesa cu'une, soc ma'yuc sc'oplal ta awo'tanic te we'elil tey a.

¹³ Te ja'ex jich ya awalic: “Lubenotiquix yu'un spisil”, xaex. Ma'yuquix jc'oplal ta awo'tanic. Ya to awalic te ya xbujts'naj co'tan yu'un ta ac'opic te c'alal ya xtal awac'bonic jmajt'anin elc'anbil chambalam, o teme jcojt' coxo, o teme ay ta chamele.

¹⁴ Ch'aybil me ya xc'ot te mach'a ya xlo'laywan te ya yal ta jamal te lec ayic ta sc'op te xchamsbalam te ya xtal smilbonic te bolobene. Jo'on te muc' Ajwalilon, jo'on xi'bilon yu'un spisil te nacionetic —xi' te Cajwaltic te Spisil ya xju' yu'une.