Hechos 18 - Bible in Tzeltal de Oxchuc y Tenejapa

Ay ta lum Corinto te Pabloe

¹ Patil te Pablo la yijq'uitay te lum Atenas, bajt' ta lum Corinto.

² Tey la sta jtul judio-winic te Aquila sbiil te ja' slumal te sq'uinal Ponto. Ach' to nax loc' tel ta sq'uinal Italia soc yinam te Priscila sbiile, ta scaj smandal te muc' ajwalil César te Claudio sbiile, yu'un ma la sc'anix te Claudio te ya x'ainic xan tey a ta lum Roma te judioetique. Jich te Pabloe ba yil.

³ Te bit'il pajal yat'elinejic spasel nailpac', jich la sjoin sbaic ta at'el soc ta nainel.

⁴ Ta jujun sc'aalelal te cux-o'tane, te Pablo bajt' ta sinagoga te banti la yaanbey yaiyic te lec yach'il c'op te judioetique soc te griegoetique.

⁵ Te c'alal julic te Silas soc te Timoteo te jilemic ta Macedonia, te Pablo ja' nax caj yat'elin yalel te lec yach'il c'ope. Jamal la yalbey te judioetic te ja' Cristo te Jesuse.

⁶ Ja'uc me to, te judioetic jajch' scontroinic te Pabloe soc la stoybac'optayic. Te Pablo jich la yal ta slilanel te sc'u'e: —Ay ta awenta atuquelic teme ch'ayel ya xbaexe. Te jo'one, ma jwentauc ya xc'ot. Ta ora to, ja' ya xba calbey yaiy lec yach'il c'op te jyanlumetique —la yut jilel.

⁷ Jich la yijq'uitay te sinagogae. Bajt' ta bay sna jtul winic Justo sbiil te yich'oj ta muc' te Diose te nopol ay soc sinagoga te snae.

⁸ Te Crispo te jwolwanej yu'un te sinagogae, la xch'uun Cajwaltic soc spisil te mach'a ay yu'un ta snae. Soc ay tsobol corintoetic te la xch'uunic, soc la yac' sbaic ta ich'ja'.

⁹ Te Pablo c'oponot ta ajc'ubal ta stelemal yilel yu'un te Cajwaltique. Jich albot yu'un: —Ma me xiwat, c'opojan me. Ma me x'acom aba,

¹⁰ melel joinejat. Ma'yuc mach'a ya xyal sc'ab te ay bila amen ya spasbate, yu'un ay bayal ta jtul te mach'a cu'un li'to ta bay in lum to —utot yu'un.

¹¹ Jich ain olil xcheb ja'wil ta lum Corinto te Pabloe te la yac'bey snopic te sc'op Diose.

¹² Ja'uc me to, te c'alal och ta ajwalil te Galión ta sq'uinal Acaya, te judioetic la stsob sbaic ta scontroinel te Pabloe. Jich la yiq'uic bael ta bay te chajbajibal yu'un te Galione.

¹³ Jich la yalbeyic te ajwalile: —Ja' in winic to, ya suj ta xch'uunel Dios te ants-winiquetique, ma jichuc te bit'il ya yal te mandalile —xiic.

¹⁴ Te Pablo c'an jajch'uc ta c'op, ja'uc me to, te Galione la sc'opon ta ora te judioetique: —Ja'ex te judioexe, te lajuc xc'axintaybey smandal ajwalil in winic to, soc te ayuc muc' mulil staoje, puersa me ya jchajban te jichuque.

¹⁵ Yan te bit'il swenta nax c'opetic soc biililetic soc te mandalil awu'unique, chajbana atuquelic, yu'un ma jc'an cac' jba ta juez ta xchajbanel in aiyejetic to —xi'.

¹⁶ Jich la yac' ta tenel loq'uel ta bay te chajbajibal yu'une.

¹⁷ Jich ta spisil te griegoetique la stsaquic te Sóstenes te jwolwanej yu'un te sinagogae, soc la smajic tey a ta bay te chajbajibale. Ja'uc me' to, te Galione xujt' ma'yuc bila la yal yu'un.

Sujt' bael ta Antioquía te Pabloe te tey jajch' ta beel ta yoxebal buelta

¹⁸ Te Pabloe jil xan bayal c'aal tey a ta bay lum Corinto. Patil la sc'opon jilel te quermanotactique. Jich och ta barco, bajt' ta sq'uinal Siria. Sjoinej bael te Priscila soc te Aquilae. La yac' ta joxel sjol ta bay lum Cencrea, yu'un ay bi yaloj ta stojol Dios te ya sc'an ya spase.

¹⁹ Te c'alal c'ot ta lum Efeso, tey la yijq'uitay jilel a te Priscila soc te Aquilae. Te Pabloe bajt' ta bay te sinagogae. Tey ayanic soc a te judioetic te stsoboj sbaique.

²⁰ La yalbeyic wocol te yacuc sjoinic tey a, ja'uc me to, ma la xch'uun.

²¹ Jich la sc'opon jilel soc la yalbey yaiyic: —Ya sc'an te ayon ta Jerusalén ta spasel te q'uin te nopolixe, ja'uc me to, teme jich ya sc'an te Diose, ya me xtal quilex yan buelta —la yut jilel. Och ta barco, la yijq'uitay jilel te lum Efeso.

²² Te c'alal c'ot ta loq'uel ta lum Cesarea te Pabloe, mo bael ta Jerusalén ta spatbeyel yo'tanic te jch'uunjeletique. Patil bajt' ta lum Antioquía.

²³ Ay c'aal jalaj tey a. Jich loc' bael yan buelta. Xmelmon c'ax yil chajbalchajp te jch'uunjeletic te ayic ta sq'uinal Galacia soc ta Frigia. La yac'bey yip yo'tanic spisil te jnopojeletique.

La yal sc'op Dios ta lum Efeso te Apolose

²⁴ Jich ora c'ot ta lum Efeso jtul judio-winic te Apolos sbiil te ja' slumal te lum Alejandría. Te winique la sna' c'op ta lec, soc ya sna' ta lec te Sjun Diose.

²⁵ Snopojix ta lec te be yu'un te Cajwaltique soc bin nax yo'tan ya xc'opoj. Toyol yo'tan la yac' ta nopel te bit'il ay sc'oplal te Jesuse. Ja'uc me to, ja' nax ay ta yo'tan te bit'il ay te ich'ja' te la yac' te Juane.

²⁶ Ma ba xiw ta c'op ta bay te sinagogae. Te Priscila soc te Aquila la yaiyix stojol te bila la yale. Jich la yiq'uic bael ta q'uejel, soc la xcholbey xan yaiy ta jamal te bit'il ay te be yu'un te Diose.

²⁷ Te Apolose la sc'an yo'tan te ya xbajt' ta sq'uinal Acaya. Te quermanotactique lec la yaiyic te ya xbajt'e, soc la spasbeyic scarta te jch'uunjeletic te ayic ta sq'uinal Acaya te yacuc yiq'uic ta stojolique. Te c'alal c'ot ta sq'uinal Acaya te Apolose, bayal la yich'ic xan coltayel yu'un te mach'atic xch'uunejiquix ta swenta nax yutsil yo'tan te Diose.

²⁸ Melel te Apolose, bayal yip te sc'ope. Tulan la yalbey ta jamal ta comonsitil te judioetique, soc la yac'bey yil te bila ts'ibubil ta Sjun Dios te ja' Cristo te Jesuse.