Eclesiastés 8 - Bible in Tzeltal de Oxchuc y Tenejapa

¹ ¿Mach'a ya spaj sba soc te mach'a ay sp'ijile? ¿Mach'a ya sna'bey swentail te bitic aye? Te p'ijil-o'tanile ya sacubtesbey q'uinal ta stojol te winique; ya stse'en sit-yelaw ya xc'ot yu'un soc ya xlecub sit-yelaw yu'un.

Xch'uunel smandal muc' ajwalil

² Ch'uunbeya me spasel te smandal te muc' ajwalile, melel jich me awaloj ta jamal ta stojol Dios.

³ Ma me tulanuc ya xloc'at bael ta stojol. Ma me xawac' aba a te bila ya xchajbanic te mach'atic amenique, melel te muc' ajwalil ya xju' ya spas te bila ya sc'an yo'tan stuquel.

⁴ Te sc'op muc' ajwalil, ja' slajibal ya spas mandal stuquel, ma'yuc mach'a ya x'ich'bot ta wenta te yat'ele.

⁵ Te mach'a ya sc'otes ta pasel te mandalile, ma me ayuc bi amen ya xc'ot ta swenta stuquel. Te mach'a ay sp'ijile, ya sna' bi ora soc bi ya yut ya yac' c'otuc ta pasel stuquel.

⁶ Ta mero melel, ay yorail soc ay swentail ta pasel spisil te bila ya sc'an pasele. Pero te bi mero ay swocol yu'un te winique,

⁷ ja' te ma xju' yu'un sna'el bi ora ay bi ya xc'ot ta pasele, soc ma'yuc mach'a ya xju' ya x'albot yu'un.

Ma'yuc mach'a ay yu'el ta stojol cuxlejal soc lajel

⁸ Ma'yuc mach'a ay yu'el ta stojol te cuxlejal yu'un ya yac' jalajuque, soc ja' nix jich ma'yuc mach'a ay yu'el ta stojol te lajele. Ma'yuc mach'a ya xju' ya scoltay sba ta sc'ab te swocolile. Te mach'a amene, ma xcoltayot yu'un te mach'a c'ax amene.

⁹ Spisil la quil te c'alal mero la cac' co'tan ta sna'el te bitic yac ta pasel ta balumilale, soc la quil te ay yip te winic ta yuts'inel te sjoy ta winiquile.

Ay bitic te ma'yuc swentaile.

¹⁰ Soc quiloj te ay ants-winic te amen yo'tane, te c'ubul la yac' sbaic ta stojol te ch'ul templo, pero te c'alal laje, bayal yutsil sc'oplal yu'unic la smuquic. Ta lum te banti la spas te bila amene, ma'yuc mach'a ya sna'ix te bila la spase. Ja' me te ma'yuc swentaile,

¹¹ melel te bit'il ma ba la yich' castigo ta ora yu'un te bila amene, ay me mach'a ja' ya xbajt'ix yo'tan ta spasel te bila amene.

¹² Jich ya xc'ot ta swenta te mach'a yacal ta sleel smule, bayal ja'wil cuxulic ta sleel smul. (Te bi jna'oje, ja' te mach'atic ya xch'uunic te Diose, soc te ya yich'ic ta muq'ue, buen lec ya xc'otic.

¹³ Yan te mach'atic amen yo'tanique, amen nanix stuquelic a. Te xcuxlejalique jich nax ya xc'ax te bit'il axinale, melel ma ba la yaq'uic ta ich'el ta muc' Dios stuquelic.)

¹⁴ Jich ya xchicnaj ta balumilal te bila ma'yuc swentail: Ay swocolic te mach'atic lequique, jich bit'il ay swocolic te mach'atic amene. Jich nix te winiquetic te mero amenique: Ja' bin nax yo'tanic, pajal soc te mach'atic lequique. ¡Jo'on ya cal, te ma'yuc swentail c'oeme!

¹⁵ Ja' yu'un te jo'one ya cal te ja' ya jmulan te yutsil-o'tanile. Te bila ya sc'an ya spas te mach'a jayeb c'aal ay xcuxlejal yu'un Dios ta balumilale, ja' te we'el, uch'el soc yaiybeyel yutsilal te ainel ta balumilale, te ja' nix ac'bot yu'un te yat'el te jayeb c'aal ac'bot cuxlejal ta q'uinal yu'un te Diose.

^16-17 Te c'alal la cac' co'tan ta snopel soc ta sna'el, soc ta stsajtayel ta lec spisil te bitic yac ta pasel ta balumilale, tey la jna'bey swentail a te ma xc'ot ta yo'tan ni jtuluc winic te bi ya spas te Diose, soc ni ja'uc te yac ta chicnajel ta balumilale. Te jo'one mero la cac' puersa ta sleel sujt'ib, asta ma ba och jwayel yu'un, pero ma ba la jtabey te sujt'ibe. Manchuc me ya yal te mach'a ay sp'ijile te ya sna'e, pero ta mero melel ma ba staoj.