Eclesiastés 11 - Bible in Tzeltal de Oxchuc y Tenejapa

¹ Ac'a bael ta ja' te awaje, ta patil ya me ata xan.

² Puca me te bay c'alal ya xju' awu'un te bitic ay awu'une; melel ma na'biluc awu'un te bi ma lecuc ya xtal ta stojol te lumq'uinale.

³ Teme ay bayal ya'lel te tocale, ya me yac' ja'al ta lumq'uinal. Manchuc me ya xyal bael ta norte te te'e, manchuc me ya xyal bael ta sur, ta bayuc ya xyal bael, pero tey me ya xjilix a.

⁴ Te mach'a ja' ya yil te bi ya spas te iq'ue, ma ba ya yaiy ts'unbajel; soc te mach'a ja' ya yil te tocaletique, ma ba ya stsobey sit te sts'unube.

⁵ Jich te bit'il ma ba ya ana' banti ya xbajt' te iq'ue, soc jich te bit'il ma ba ya ana' bit'il ya xchajbaj ta xch'ujt' sme' te alale, ja' nix jich ma xju' awu'un sna'el te bila ya spas te Diose, ja' te mach'a la spas spisil te bitic aye.

⁶ Ts'una te ats'unub ta sabe, soc ts'una xan ta mal c'aal, melel ma xju' awu'un sna'el bay lec ya xc'ot, teme ja' lec ya xc'ot te neel la ats'une o ja' te patilix la ats'un, o teme lec ya xc'ot xchebalique.

⁷ Buen t'ujbil ta aiyel te saquil q'uinale, soc buen lec ya yil jsitic te c'aale.

⁸ Pero manchuc me ya xcuxinotic bayal ja'wil, soc ya caiybeytic yutsilal ta spisilic, pero ya me sc'an ya jna'tic te bayal c'aal te ainel ta muquenal ta ijc' q'uinale. Spisil te bitic quechel ta talele, mero tojol ta jyalel.

Tojtesel ta stojol ach'ixetic queremetic

⁹ Mulanbeya yutsil acuxlejal jch'ieletic, aiybeyaic yutsilal te ach'ielique; melel buen lec to xan ayat, soc ya to xju' awu'un. Pasbeya te bi ya smulan te awo'tane, soc ta spisil te bitic ya awile. Pero ya me sc'an te ya ana' te Dios ya yich'bat ta wenta spisile.

¹⁰ Loq'uesa ta ajol te bitic ya yac' mel-o'tane, soc ch'oja loq'uel te chujc'ul c'opetique. Melel te yutsilal te ach'iele, c'axel nax ay, mero tojol ta jyalel.