San Mateo 18 - Bible in Tzeltal Bachajón

¿Mach'a a te muc' sc'oblal?

¹ Ta hich ora te jnopojeletic tal ta stojol Jesús, hich la sjoc'obeyic: ¿Mach'a a te c'ax hich muc' sc'oblal a te bin ut'il yantic ta banti ay te cuentahinel yu'un te ch'ulchane? xchihic.

² Te Jesús la yic' tal jtuhl alal, la stehc'ambe ta yohlilic,

³ hich la yal: Jamal ya calbeyex, teme ma ba hich yac ap'is abahic te bin ut'il alaletic, ma xhu' ya x'ochex ta banti ay te cuentahinel yu'un te ch'ulchan.

⁴ Ha yu'un mach'ayuc a te peq'uel ya yac' sba hich te bin ut'il te alal ini, ha muc' sc'oblal ya xc'oht yu'un spisil yantic ta banti ay te cuentahinel yu'un te ch'ulchane.

⁵ Soc mach'ayuc a te ta scuenta jbihil ya yic' jtuhluc alal hich te bin ut'il te alal ini, ho'on me la yic'on abi.

Te yahlel ta mulil

⁶ Mach'ayuc a te ya yac' yahluc jtuhluc ha'i alaletic ini te sch'uhunejonic, ha lec te yacuc yich' chucbeyel cha' ta snuc' soc ya x'etanot cohel ta sc'ubulil mar.

⁷ ¡Ay me swocol te bahlumilal yu'un te bintic ya x'ac'awan ta yahlel ta mulil! Ay c'ohchinojibaletic, pero ¡ay me swocol te mach'a ya yac' te c'ohchinojibaletique!

⁸ Ha yu'un teme ha ya ya'bat ale amul te ac'ab o te awoc, boja loq'uel, ch'aya bahel: ha lec xan a te nol-oc o nolc'ab a yac awich' acuxlejal te bin ut'il teme schebal ac'ab o schebal awoc a ya xch'ojotat ochel ta c'ahc' te sbahtel q'uinal ay.

⁹ Soc teme ha ya ya'bat ale amul te asite, loq'uesa, ch'aya bahel: ha lec xan a teme jun xanix asit a yac awich' acuxlejal te bin ut'il teme schebal asit a ya xch'ojotat ochel ta c'ahc' yu'un infierno.

Sloc'ombahil c'op yu'un ch'ayem tuminchij

¹⁰ Tsahtaya me abahic te ma ba yac ap'ajic jtuhluc ha'i alaletic ini; como ya calbeyex, te ch'ul a'batetic yu'unic ta ch'ulchan spisil ora yac yilbelic sit te Jtat ay ta ch'ulchan;

¹¹ como te Nich'anil ay ta scuenta winic ha talem scoltaybel te mach'a ch'ayeme.

¹² ¿Bin xchihex yu'un? Teme ay mach'a ay ho'winic (100) ta coht stuminchij, teme ay jcoht ya xhowiy bahel, ¿ma bal yacuc yihquitay hilel ta wits te balunlajuneb yo'winic (99) ta coht, ya xbaht sle te jcoht ch'ayem hilel?

¹³ Teme la stahe, ya calbeyex te c'ax hich yutsil yo'tan yu'un a te bin ut'il yutsil yo'tan yu'un te balunlajuneb yo'winic (99) ta coht te ma ba ch'ayic stuquelic.

¹⁴ Ha nix hich te Atatic ay ta ch'ulchan ma sc'an te ya xch'ay jtuhluc ha'i alaletic ini.

Bin ut'il ya sc'an yac apasbe perdón awermano

¹⁵ Ha yu'un teme ay la sta smul ta atojol te awermano, bahan, a'beya sna' te smul ta stuquel. Teme lec la ya'iybat te ac'ope, lec ayat soc a te awermanohe.

¹⁶ Pero teme ma ba ya ya'iybat te ac'ope, ic'a bahel cha'oxtuhl yantic scuenta yu'un ha testigo ya xc'ohtic yu'un te jayp'ahl c'op yac awalbe abahic.

¹⁷ Teme ma ba ya ya'iybe te sc'opique, halbeya te iglesia; teme ma ba ya ya'iybe sc'op te iglesia, hich me ya xc'ohtix awu'un a te bin ut'il jyanlum o jc'an-patan.

¹⁸ Jamal ya calbeyex, spisil bintic yac achuquic ta bahlumilal, ha nix hich ya yich' chuquel ta ch'ulchan; soc spisil bintic yac atilic ta bahlumilal, ha nix hich ya yich' tilel ta ch'ulchan.

¹⁹ Yan buelta ya calbeyex, teme chebex yac achap ac'opic ta bahlumilal yu'un te biluc yac ac'anic, hich ya xpasbotex yu'un te Jtat ay ta ch'ulchan,

²⁰ como te banti ay stsoboj sbahic cha'oxtuhl ta scuenta jbihil, tey ayon ta yohlilic a, xchi te Jesús.

²¹ Hich te Pedro nohpoj tal ta stojol te Jesús, hich la sjoc'obe: Cajwal, ¿jayeb buelta ya jpasbe perdón te quermano teme ya sta smul ta jtojole? ¿Ha bal huqueb buelta? xchi.

²² Halbot yu'un te Jesús: Ma ba ya calbat te ha nax huqueb buelta, ha to huqueb buelta ta lajlajuneb schanwinic (70), xchi.

Cheb mach'atic ay sbetic

²³ Te cuentahinel yu'un te ch'ulchan hich c'ohem te bin ut'il jtuhl ajwalil te la sc'an la spas cuenta soc te a'batetic yu'une.

²⁴ C'alal hahch yich' cuenta te betiletic, ay jtuhl mach'a ay jpic soc ho'bahc' (10,000) talento te sbete.

²⁵ Te bin ut'il ma ba hu' yu'un stojel te sbete, la yal mandar te yajwal te ya yich' chonel soc yihnam soc yal-snich'nab soc spisil bintic ay yu'un scuenta stojel te sbete.

²⁶ Pero te a'bat la spahcan sba ta stojol, la yalbe bayel wocol: Cajwal, mahliybon, ya jtojbat spisil, xchi.

²⁷ Na'bot yo'bolil sba yu'un te yajwale, hich la sch'aybe te sbet soc la scoltay bahel.

²⁸ Pero c'alal loc' bahel te a'bate, la sta jtuhl smohlol ta a'batil te ay ho'winic (100) denario sbet yu'un; c'oht stsac, la spit' ta snuc', la yalbe: Tojbon te abete, la yut.

²⁹ Te smohlol ta a'batil la spahcan sba ta ye'tal yoc, la yalbe wocol: Mahliybon, ya jtojbat spisil, xchi.

³⁰ Pero ma ba la sc'an, ha baht yac' ta otsesel ta cárcel ha to c'alal la stoj te sbete.

³¹ C'alal la yilic bin c'oht ta pasel te yantic smohlol ta a'batil, bayel la smel yo'tanic yu'un, hich baht yalbeyic ya'iy te ajwalil yu'unic spisil te bin c'oht ta pasel.

³² Ha yu'un te a'bat ic'ot tal yu'un te yajwal, hich halbot yu'un: ¡Chopol a'batat! Spisil la jch'aybat abet yu'un la awalbon wocol.

³³ ¿Ma bal hichuc la sc'an te la ac'uxultay te amohlol ta a'batil hich te bin ut'il la jc'uxultayat te ha'ate? la yut.

³⁴ Ha yu'un ilin te yajwal, la ya'be ta sc'ab mach'atic scuentahinejic yaq'uel castigo ha to c'alal la stoj spisil te sbete.

³⁵ Ha nix hich ya spasbeyex te Jtat ay ta ch'ulchan teme ma spisiluc awo'tan yac apasbe abahic perdón ta tuhlutuhl soc awermanotac, xchi te Jesús.