Yoxuwa 17 - BIBELE Mahungu Lamanene

Tindhawu ta va ka Manase

¹ Kutani va ka Manase mativula ya Yosefa va averiwa tiko ra vona. Makiri mativula ya Manase ú averiwile tiko ra Giliyadi ni ra Baxani, hikuva a a ri nghwazi.

² Va ka Manase lavan'wana, va averiwile ndzhaka ya vona hi ku ya hi mindyangu ya vona, yi nga leyi: Ndyangu wa ka Abiezere, ni wa ka Heleke, ni wa ka Asiriele, ni wa ka Xikeme, ni wa ka Hefere, ni wa ka Xemida. Lava hi vona vatukulu va xinuna va Manase n'wana Yosefa hi ku ya hi mindyangu ya vona.

³ Selofihada n'wana Hefere wa Giliyadi, wa Makiri, wa Manase, a a nga ri na vana va xinuna, kambe a a ri ni vana va xisati ntsena, va nga lava: Mahela, na Nowa, na Hogila, na Milika, na Tirisa.

⁴ Siku rin'wana va ya byela muprista Eliyazara na Yoxuwa n'wana Nuni ni varhangeri, va ku: “HOSI Xikwembu xi lerisile Muxe leswaku a hi nyika ndzhaka ya hina exikarhi ka va ka hina.” Kutani va nyikiwa ndzhaka ya vona exikarhi ka va ka vona, hilaha HOSI Xikwembu xi leriseke hakona.

⁵ Kutani va ka Manase va nyikiwa tindhawu ta 10, ehandle ka tiko ra Giliyadi na Baxani leri nga ntsungeni wa nambu wa Yordani,

⁶ hikuva vatukulu va Manase va xisati va kumile ndzhaka ya vona exikarhi ka vatukulu va yena va xinuna. Tiko ra Giliyadi ri averiwile va ka Manase lavan'wana.

⁷ Tiko ra va ka Manase ri navile ku sukela le Axere, ri ya fika emutini wa Mikimeta lowu nga evuxeni bya Xikeme. Kutani ndzilekana wu kongoma eYabixi-Eni-Tapuwaka.

⁸ Tiko ra Tapuwaka i ra va ka Manase, kambe muti wa Tapuwaka lowu nga ndzilekaneni wa tiko ra va ka Manase, i wa va ka Efrayimi.

⁹ Kutani ndzilekana wu rhelela wu kongoma exinkobyaneni xa Kana. Miti leyi nga dzongeni ra xinkobyana, exikarhi ka miti ya va ka Manase, i ya va ka Efrayimi. Ndzilekana wa tiko ra va ka Manase wu ya emahlweni wu kongoma tlhelo ra n'walungu ra xinkobyana, wu ya helela elwandle.

¹⁰ Tiko leri nga dzongeni i ra va ka Efrayimi, kasi leri nga n'walungwini i ra va ka Manase. Ndzilekana wa kona i lwandle. Hi tlhelo ra n'walungu ndzilekana wu fika le Asere, kasi hi tlhelo ra le vuxeni ndzilekana wu fika le Isakara.

¹¹ Etikweni ra Isakara ni ra Asere, va ka Manase va ni muti wa Beta-Xeyani, ni swimitana swa wona, na muti wa Yibileyamu ni swimitana swa wona, na muti wa Dori ni swimitana swa wona, na muti wa Taanaka ni swimitana swa wona, na muti wa Megido ni swimitana swa wona. Ndhawu ya vunharhu i xifundzha xa Dori.

¹² Vakanana a va sukanga, kambe va tshamile emitini leyi, hikuva va ka Manase a va swi kotanga ku va tekela yona.

¹³ Hambiloko Vaisraele va hlurile Vakanana, a va va hlongolanga etikweni, kambe va va rhwexile mintirho leyo tika.

Va ka Efrayimi ni va ka Manase va kombela ku engeteleriwa tiko

¹⁴ Va nyimba ya ka Yosefa va ya eka Yoxuwa va fika va ku: “Hikwalaho ka yini u hi nyika xindhawana xitsongo leswaku xi va ndzhaka ya hina xana? Hina hi tele, hikuva HOSI Xikwembu xi hi katekisile.”

¹⁵ Kutani Yoxuwa a ku ka vona: “Loko mi tele, tlhandlukani mi ya exihlahleni, mi fika mi titshetshela ndhawu etikweni ra va Vaperesi ni Varefayimi, hikuva tiko ra le magangeni ya Efrayimi i ritsongo, a ri mi ringani.”

¹⁶ Va nyimba ya ka Yosefa va ku: “Tiko leri nga emagangeni i ritsongo, kambe naswona, Vakanana hinkwavo lava tshamaka erivaleni va ni makalichi ya nsimbhi, hinkwavo lava tshamaka emutini wa Beta-Xeyani ni le swimitaneni swa wona, ni lava nga eka Nkova wa Yizriele.”

¹⁷ Kutani Yoxuwa a byela va ka Yosefa, va nga va ka Efrayimi ni va ka Manase, a ku: “Mi tele ngopfu, mi tlhela mi va ni matimba swinene, a mi fanelanga ku va ni xiphemu xin'we ntsena xa tiko.

¹⁸ Tiko ra le magangeni ri ta va ra n'wina, hambileswi ri nga ni swihlahla; mi ta ri tshetsha, ri basa, mi ri teka ri va ra n'wina ku ya fika emakumu ka rona. Mi ta hlongola Vakanana va suka etikweni leri, hambileswi va nga ni makalichi ya nsimbhi, va tlhela va tiya swinene.”