Swivuriso 19 - BIBELE Mahungu Lamanene

¹ Xisiwana lexi tshembekeke, xi tlula xiphunta lexi tivulavulelaka swo huma ndleleni.

² Ku gingirika, munhu a nga ri na vutivi, a swi pfuni nchumu, ku tsutsuma, swi tlula hi ku famba khwatsi.

³ Munhu ú lahla hi vuphukuphuku bya yena, kambe a lumbeta HOSI Xikwembu.

⁴ N'wankumi ú kuma vanghana vo tala, kasi xisiwana, hambi va ri vanghana va xona va xi tshika.

⁵ Mbhoni ya mavunwa yi nge phonyoki, yi ta biwa, munhu wo hemba a nga ka a nga poni.

⁶ Vanhu vo tala va rhandza ku tsakeriwa hi lava va nga ni swa le mandleni, un'wana ni un'wana ú lava ku va munghana wa loyi a hananaka.

⁷ Leswi xisiwana xi nyenyiwaka ni hi vamakwavo wa xona, xana vanhu ntsena, vona, va nga tshinerisa ku yini kusuhi na xona ke? Loko xi lava ku vulavula na vona, vo hambana na xona.

⁸ Loyi a kumaka vutlhari, ú rhandza vutomi bya yena, ni loyi a tikarhatelaka ku twisisa, ú ta humelela.

⁹ Mbhoni ya mavunwa yi nge phonyoki, yi ta biwa, munhu wo hemba ú tivangela rifu.

¹⁰ Leswi xiphunta xi nga fanelangiki ku tshama emafurheni, nandza yena, a nga fumisa ku yini n'wini wa yena xana?

¹¹ Munhu wa miehleketo, ú hlwela ku hlundzuka, loko a hoxeriwile, ú swi ba hi makatla.

¹² Loko hosi yi karihile, yi fana ni nghala leyi bongaka, kasi ku tsakeriwa hi yona, swi fana ni mberha ebyanyini.

¹³ N'wana wo tiarisa, ú nghenisa tata wakwe etimhakeni; ku va ni nsati wo kariha, i ku tshama ndlwini yo pfuta yi nga yimi.

¹⁴ Muti ni rifuwo i ndzhaka leyi munhu a siyeriwaka yona hi vatswari va yena, kasi nsati wa miehleketo, i nyiko yo huma eka HOSI Xikwembu.

¹⁵ Munhu wo loloha, ú tshama a etlele, loyi a tshamaka hi mavoko, ú ta fa hi ndlala.

¹⁶ Loyi a hlayisaka nawu, ú hlayisa vutomi bya yena, loyi a solaka switsundzuxo, ú tivangela rifu.

¹⁷ Ku nyika xisiwana, i ku lomba HOSI Xikwembu, kutani HOSI Xikwembu xi ta ku tlherisela hinkwaswo.

¹⁸ Tshinya n'wana a ha ri ntsongo, kambe loko u n'wi ba, u nga beli ku dlaya.

¹⁹ Munhu wa ximbilwa-mbilwana, ú fanele ku riha milandzu ya yena hi yexe, hikuva loko u n'wi pfuna, wa n'wi vanga.

²⁰ Yingisa switsundzuxo, u amukela ni swiletelo, leswaku u ta kuma vutlhari lebyi nga ta ku pfuna eminkarhini leyi taka.

²¹ Makungu ya mbilu, a hi ku tala ka wona, kambe ku ta endleka ntsena leswi HOSI Xikwembu xi swi tsakelaka.

²² Lexi lavekaka eka munhu, i ku tshembeka, ku va xisiwana, swa antswa, ku ri na ku va munhu wo hemba.

²³ Munhu loyi a chavaka HOSI Xikwembu, ú khome ndlela ya vutomi, kutani ú ta hlayiseka ni makhombo ma nge n'wi humeleli.

²⁴ Munhu wo loloha, ú hoxa voko exinkambaneni, kambe a tsandzeka ni ku ri yisa enon'weni.

²⁵ Loko u ba musandzi, swi nga nyika dyondzo eka lava pfumalaka vutivi, loko u laya munhu wo twisisa, swi n'wi pfuna ku engetelela vutlhari.

²⁶ Munhu la xanisaka tata wa yena ni ku hlongola mana wa yena, i n'wana la nyumisaka ni ku khomisa tingana.

²⁷ Hiswona n'wananga, u nga ha pfala tindleve loko u dyondzisiwa, kambe tiva leswaku u ta lahlekeriwa hi vutivi lebyi u dyondzisiweke byona.

²⁸ Mbhoni leyi hembaka yi onha maavanyisele ya timhaka, emilon'weni ya lavo homboloka, ku pfelela leswo biha ntsena.

²⁹ Vasandzi va yimeriwile hi ku avanyisiwa, swiphunta swi nge poni, swi ta biwa.