Swivuriso 13 - BIBELE Mahungu Lamanene

¹ N'wana la tlhariheke ú yingisa swiletelo swa tata wa yena, kasi musandzi a nga twi ku tshinyiwa.

² Leswi munhu lonene a swi vulavulaka, swi n'wi vuyerisa mihandzu leyinene, kambe vakanganyisi va navela ku endla nsele ntsena.

³ Munhu loyi a nga vulavuriki ngopfu, ú hlayisa vutomi bya yena, kasi loyi a phyaphyarhaka, ú weriwa hi khombo.

⁴ Lolo ri fa hi ku navela, kambe a ri kumi nchumu; munhu wa migingiriko yena, ú dya a xurha.

⁵ Munho wo lulama ú venga mavunwa, kasi lowo homboloka a nga nyumi ku endla swa manyala ni tingana.

⁶ Ku lulama swi sirhelela munhu wo tshembeka, kambe vudyoho byi lahlekisa lavo homboloka.

⁷ Vanhu van'wana va tiendla swigwili, kasi a va na nchumu; van'wana va tiendla swisiwana, kasi va fumile ngopfu.

⁸ Van'wankumi va tisirhelela hi rifuwo ra vona, kasi swisiwana a swi na mhaka na ku chavisiwa.

⁹ Rivoni ra lavo lulama ri pfurha minkarhi hinkwayo, kambe ra lavo homboloka ri ta timeka.

¹⁰ Ku tikurisa, swi vanga madzolonga ntsena, kasi vutlhari i bya lava pfumelaka ku tsundzuxiwa.

¹¹ Rifuwo leri kumiwaka hi siku rin'we, a ri hlweli ku dzudzeka, kasi leri taka hi kutsongo-tsongo, ra khomelela.

¹² Loko munhu a nga kumi lexi a xi languteleke, ú twa mbilu ku vava, kasi loko a kuma lexi a xi navelaka, swi fana ni loko a kumile murhi lowu nyikaka vutomi.

¹³ Loyi a solaka switsundzuxo, ú tivangela rifu, kasi loyi a yingisaka nawu, wa vuyeriwa.

¹⁴ Dyondzo leyi humaka eka lowo tlhariha i xihlovo xa vutomi, lexi nga ponisaka munhu entlhan'wini wa rifu.

¹⁵ Munhu wa miehleketo leyinene wa tsakeriwa, kasi vakanganyisi va lovisiwa hi mikhuva ya vona.

¹⁶ Loyi a ehleketaka, a nga welaweli swilo, kambe xiphunta xi paluxa vuphukuphuku bya xona.

¹⁷ Murhumiwa wo biha mbilu, ú nghenisa vanhu ekhombyeni, kasi loyi a tshembekaka, ú tisa ku rhula.

¹⁸ Loyi a alaka ku layiwa, ú tivangela vusiwana ni tingana, kasi loyi a pfumelaka ku tshinyiwa, wa dzunisiwa.

¹⁹ Loko munhu a kuma leswi a swi navelaka, wa tiphina, kambe ku hambana ni leswo biha, swa yila eka xiphunta.

²⁰ Loyi a tolovelanaka ni lavo tlhariha, wa tlhariha, kambe munghana wa swiphunta, ú ta wela ekhombyeni.

²¹ Makhombo ma wela vadyohi, kambe lavo lulama va hakeriwa hi leswinene.

²² Munhu lonene ú siyela vatukulu va yena endzhaka, kasi rifuwo ra mudyohi, ri salela lavo lulama.

²³ Mafusi ya swisiwana ma nga swi humesela ntshovelo lowunene, kambe swi ta tekeriwa wona hikwalaho ka milawu leyi nga lulamangiki.

²⁴ Loyi a nga xupuliki n'wana wa yena, wa n'wi venga, kasi loyi a rhandzaka n'wana wa yena, ú tikarhatela ku n'wi tshinya.

²⁵ Munhu wo lulama ú dya a xurha, khwiri ra lowo homboloka rona, ri etlela ni ndlala.