Swivuriso 10 - BIBELE Mahungu Lamanene

Swivuriso swa Solomoni (10:1 – 22:16) Lavo lulama ni lavo homboloka

¹ Swivuriso swa Solomoni hi leswi: N'wana la tlhariheke, ú tsakisa tata wa yena, kambe la tiarisaka i nhlomulo eka mana wa yena.

² Xuma lexi kumiweke hi tindlela to homboloka a xi pfuni nchumu, kambe ku lulama swi ponisa vutomi bya munhu.

³ HOSI Xikwembu a xi tshiki lowo lulama a sika, kambe xi tsona lavo biha leswi va swi navelaka.

⁴ Ku tshama hi mavoko swi chela vusiwana, migingiriko yona ya fumisa.

⁵ N'wana wa miehleketo, ú huma a ya pfuna eku tshoveleni, kasi la salaka a etlele, ú nyumisa vatswari.

⁶ Minkateko yi wela lowo lulama, kambe ku vulavula ka lovo homboloka ku fihla tihanyi.

⁷ Munhu wo lulama wa nkhensiwa, a nga rivariwi, kasi vito ra lowo homboloka ra bola.

⁸ Munhu wa miehleketo wa twa loko a tsundzuxiwa, kambe xihanya-nomo xona xi ta ya eku loveni.

⁹ Ku hanya eku tshembekeni i ku hanya eku hlayisekeni, kambe loyi tindlela ta yena ti gombonyokeke, ú ta kumiwa.

¹⁰ Munhu la tshunyetaka hi tihlo, ú pfuxa minkitsikitsi, kambe la nga chaviki ku tshinya van'wana, ú tisa ku rhula.

¹¹ Marito ya munhu la lulameke i xihlovo xa vutomi, kambe ku vulavula ka lavo homboloka ku fihla tihanyi.

¹² Rivengo ri pfuxa madzolonga, kambe rirhandzu ri endla leswaku vanhu va rivalelana.

¹³ Enon'wini wa la twisisaka, ku huma marito ya vutlhari, kambe la nga ehleketiki swinene, wo fanela hi nkhavi.

¹⁴ Lavo tlhariha va tihlayisela vutivi, kambe loko xiphukuphuku xi jakatseka, khombo ri le kusuhi.

¹⁵ Khokholo ra n'wankumi i rifuwo ra yena, kasi swisiwana swi herisiwa hi vusweti bya swona.

¹⁶ Hakelo ya munhu la lulameke i vutomi, kasi lowo homboloka ú dya mihandzu ya xidyoho.

¹⁷ Loyi a twaka ku byeriwa, ú khome ndlela ya vutomi, kasi ma-ka-tindleve wa lahleka.

¹⁸ Munhu la fihlaka rivengo, ú hemba ngopfu, la lumbetaka van'wana, i xiphunta.

¹⁹ Ku tata marito, swi vanga swihoxo, kambe loyi a kotaka ku tikhoma, ú ni mianakanyo leyinene.

²⁰ Marito ya munhu wo lulama i silivhere leyo saseka, kasi miehleketo ya lavo homboloka a yi pfuni nchumu.

²¹ Leswi humaka enon'wini wa munhu wo lulama i swakudya swa lavo tala, kambe swiphukuphuku swi ticelela masirha hi ku ka swi nga ehleketi.

²² Minkateko ya HOSI Xikwembu yi fumisa vanhu, ku tikarhata ka munhu ku nga ka ku nga yi engeteli.

²³ Xiphunta xi hungasa hi ku endla swa manyala, kasi munhu la twisisaka ú hungasa hi mintirho ya vutlhari.

²⁴ Lowo biha ú teriwa hi swilo leswi a swi chavaka ngopfu, kambe lavo lulama va nyikiwa leswi va swi navelaka.

²⁵ Loko ku hundza bubutsa, lavo homboloka a va sali, kambe lavo lulama, vona va sala va lo tíkítìkì!

²⁶ Lolo ri dyisa loyi a ri rhumaka embitsi, ku fana ni loko munhu a nwa ntsuvi, kumbe a tlunyiwa hi musi.

²⁷ Munhu la chavaka HOSI Xikwembu ú engeteleriwa masiku ya ku hanya, kambe lavo homboloka va hatla va hundza emisaveni.

²⁸ Ku tshemba ka lavo lulama ku hela hi ntsako, kambe leswi lavo homboloka va swi langutelaka, swi helela empfhukeni.

²⁹ HOSI Xikwembu i khokholo ra munhu la tshembekeke, kambe xi herisa lava dyohaka.

³⁰ Munhu wo lulama a nga ka a nga rhurhisiwi, kambe lavo homboloka va ta susiwa etikweni.

³¹ Enon'wini wa munhu wo lulama ku huma marito ya vutlhari; loyi a vulavulaka mavunwa, ú ta tsemiwa ririmi.

³² Munhu la lulameke ú vulavula leswi nga swona, kasi lavo homboloka va vulavula mavunwa ntsena.