Pisalema 101 - BIBELE Mahungu Lamanene

Mufumi wa tiko ú tiboha ku hanya hi ku lulama

Pisalema ya Davhida.

¹ We HOSI, ndzi lava ku yimbelela risimu ndzi ku dzunisa, ndzi twarisa ku tshembeka ka wena ni ku lulama ka wena;

² ndzi navela ku famba hi ndlela leyi nkhensekaka. Xana u ta ndzi endzela rini xana? Emutini wa mina, ndzi ta rhandza ku hanya hi mbilu leyi tengeke,

³ ndzi tshika mintirho hinkwayo leyo hombokoka. Lava landzulaka Xikwembu, ndzi ta lwa na vona, ndzi nge pfuki ndzi twananile na vona!

⁴ Lavo biha timbilu a va ve kule na mina! A ndzi nga lavi ku twa nchumu hi vanhu lavo homboloka.

⁵ La hlevaka van'wana ni ku va lumbeta, ndzi ta n'wi herisela makumu; munhu wa manyunyu ni ku tikukumuxa, a ndzi nga twanani na yena.

⁶ Vaaki va tiko lavo tshembeka, ndzi ta va tsakela, ndzi va rhurhela emutini wa mina; vanhu va mahanyelo lamanene, hi vona lava ndzi nga ta va hlawula leswaku va ndzi tirhela.

⁷ Kasi mukanganyisi a nge tshami emutini wa mina, munhu wa vuheveheve, ndzi nge hanyisani na yena.

⁸ Siku rin'wana ni rin'wana ndzi ta herisa lavo homboloka etikweni, ndzi hlongola lava endlaka leswo biha, va suka emutini wa HOSI Xikwembu.