Luka 6 - BIBELE Mahungu Lamanene

Ta vadyondzisiwa loko va tshova min'oko hi siku ra Savata

¹ Hi siku ra Savata, Yesu a hundza exikarhi ka masimu. Kutani vadyondzisiwa va yena va tshova min'oko ya koroni, va swoswa tindzhoho hi mandla, va dya.

² Kambe Vafarisi van'wana va ku: “Hikwalaho ka yini mi endla leswi nga pfumeleriwiki hi Savata xana?”

³ Yesu a va hlamula a ku: “Xana a mi hlayanga leswi nga endliwa hi Davhida, siku a nga twa ndlala, yena ni lava a va ri na yena ke?

⁴ Ú nghenile endlwini ya Xikwembu, a teka swinkwa swa magandzelo leswi nga fanelangiki ku dyiwa hi vanhu van'wana, loko ku nga ri hi vaprista ntsena, kutani a dya, a tlhela a nyika ni lava a va ri na yena.”

⁵ Kutani a ku ka vona: “N'wana-wa-Munhu i hosi ya Savata.”

Ta munhu loyi a khwanyaleke voko

⁶ Hi siku rin'wana ra Savata a nghena esinagogeni a dyondzisa; kutani a ku ri ni munhu kona loyi voko ra yena ra xinene a ri khwanyarile.

⁷ Vatsari ni Vafarisi va xiya Yesu, ku vona loko kumbe a ta hanyisa munhu hi siku ra Savata, leswaku va ta kuma lexi va nga ta n'wi hehla ha xona.

⁸ Kambe yena a a tiva miehleketo ya vona, kutani a ku ka munhu wa voko ro khwanyala: “Suka u yima u ta la xikarhi la!” Yena a suka a yima.

⁹ Yesu a ku ka vona: “Ndza mi vutisa, xana leswi lulameke ku endliwa hi siku ra Savata hi swihi ke: Ku endla leswinene kumbe ku endla leswo biha, ku ponisa munhu kumbe ku n'wi lovisa xana?”

¹⁰ A va languta swinene hinkwavo kutani a ku ka munhu loyi: “Tshambuluta voko ra wena!” A ri tshambuluta, kutani voko ra yena ri tlhela ri ololoka.

¹¹ Vatsari ni Vafarisi va hlundzuka swinene, kutani va ya twanana hi leswi va nga ta swi endla eka Yesu.

Ta Yesu loko a hlawula vaapostola va khume na vambirhi

¹² Emasikwini lawa Yesu a ya entshaveni ku ya khongela; kutani a tshama vusiku hinkwabyo a ri karhi a khongela Xikwembu.

¹³ Loko ri xile, a vitana vadyondzisiwa va yena, kutani exikarhi ka vona a hlawula khume na vambirhi, a va thya vaapostola va yena.

¹⁴ Lava hlawuriweke i Simoni loyi Yesu a n'wi thyeke vito ra Petro, ku landza Andriya makwavo, na Yakobo, na Yohane, na Filipi, na Bartolomi,

¹⁵ na Matewu, na Tomasi, na Yakobo n'wana Alfiya, na Simoni la nga vuriwa Muhiseki,

¹⁶ na Yuda n'wana Yakobo, na Yudasi Iskariyota, la nga hundzuka muxengi.

Ta Yesu loko a pfuna ntshungu lowukulu

¹⁷ Loko Yesu a rhelerile na vona hi le ntshaveni, a ya yima erivaleni; kutani ku ta vunyingi lebyikulu bya vadyondzisiwa va yena, ni ntshungu lowukulu wa vanhu lava humaka hinkwako eYudiya, ni le Yerusalema, ni le tikweni ra Tiri na Sidoni leri nge kusuhi ni lwandle,

¹⁸ va ta ku ta n'wi yingisa ni ku hanyisiwa hi yena; lava karhatiwaka hi mimoya ya thyaka, na vona a a va hanyisa.

¹⁹ Ntshungu hinkwawo a wu ringeta ku n'wi khumba, hikuva matimba a ma huma eka yena, ma va hanyisa hinkwavo.

Minkateko ni makhombo

²⁰ Kutani Yesu a languta vadyondzisiwa va yena, a ku: “Mi katekile n'wina swisiwana, hikuva Mfumo wa Xikwembu wu le ka n'wina.

²¹ Mi katekile n'wina mi twaka ndlala sweswi, hikuva mi ta dya mi xurha. Mi katekile n'wina mi rilaka sweswi, hikuva mi ta hlekelela.

²² “Mi katekile loko vanhu va mi venga, loko va mi hlongola ni ku mi rhuketela, ni loko va sola vito ra n'wina wonge hi loko ri bihile, hikwalaho ka N'wana-wa-Munhu.

²³ Esikwini rorero tsakani mi tsakisisa, hikuva hakelo ya n'wina yi ta va leyikulu etilweni; naswona vatata wa vona va endlisile sweswo eka vaprofeta.

²⁴ “Kambe mi ni khombo n'wina vafuwi, hikuva mi kumile ku chaveleriwa ka n'wina.

²⁵ Mi ni khombo n'wina mi dyaka mi xurha sweswi, hikuva mi ta twa ndlala. Mi ni khombo n'wina mi hlekaka sweswi, hikuva mi ta rila mi kolola.

²⁶ “Mi ni khombo n'wina loko vanhu hinkwavo va mi dzunisa, hikuva vatata wa vona va endlisile sweswo eka vaprofeta va mavunwa.

Ta ku rhandza valala

²⁷ “Kambe eka n'wina lava mi ndzi yingisaka ndzi ri: Rhandzani valala va n'wina, mi endla leswinene eka lava va mi vengaka.

²⁸ Katekisani lava va mi rhukanaka, mi khongelela lava va mi karhataka.

²⁹ Loko munhu a ku makala rhama, n'wi kangatelele ni lerin'wana; la ku vutlelaka jasi, u nga n'wi aleli ni baji.

³⁰ Nyika mani na mani la kombelaka eka wena; ni loko munhu a ku tekela swa wena, u nga n'wi londzi.

³¹ Leswi mi lavaka leswaku vanhu va mi endla swona, va endleni swona na n'wina,

³² hikuva loko mi rhandza lava va mi rhandzaka ntsena, mi nga langutela ku nkhensiwa xana? Vadyohi na vona va rhandza lava va va rhandzaka.

³³ Kutani loko mi endla leswinene ntsena eka lava va mi endlaka leswinene, mi nga langutela ku nkhensiwa xana? Vadyohi na vona va endlisa sweswo.

³⁴ Ni loko mi lomba ntsena lava mi tshembaka leswaku mi ta tlhela mi swi kuma eka vona, mi nga langutela ku nkhensiwa xana? Vadyohi na vona va lomba vadyohi-kulobye leswaku va ta tlhela va kuma swo fana eka vona.

³⁵ Kambe n'wina, rhandzani valala va n'wina, mi endlela vanhu leswinene; lombani mi nga languteli ku tlheriseriwa, kutani hakelo ya n'wina yi ta va leyikulu; mi ta va vana va Loyi-a-nge-henhla-henhla, hikuva yena ú ni tintswalo eka lava nga tiviki ku nkhensa ni ka lavo biha.

³⁶ Mi va ni nsovo kukota leswi Tata wa n'wina na yena a nga ni nsovo.

Ta ku avanyisa van'wana

³⁷ “Mi nga avanyisi, kutani a mi nga avanyisiwi; mi nga veki van'wana emilandzu, kutani a mi nga vekiwi milandzu; rivalelani, kutani mi ta rivaleriwa.

³⁸ Nyikani, mi ta nyikiwa; endzeni ka nkhancu lowu mi wu hakarhaka exifuveni, ku ta cheriwa mpimo lowu tivikanaka, lowu gandliweke, lowu hlunguhliweke, lowu khapaka; hikuva mpimo lowu mi pimelaka van'wana ha wona, mi ta pimeriwa ha wona na n'wina.”

³⁹ A engeta a va byela xifaniso a ku: “Xana lowo-fe-mahlo a nga kota ku fambisa un'wana la feke mahlo ke? A va nga weli ekheleni hi vumbirhi bya vona xana?

⁴⁰ Mudyondzisiwa a nga tluli mudyondzisi wa yena; kambe mudyondzisiwa un'wana ni un'wana la dyondzekeke swinene, ú ta va tanihi mudyondzisi wa yena.

⁴¹ “U langutela yini xilavi lexi nge tihlweni ra makwenu ke? Kasi wena u ni ntsandza etihlweni ra wena, lowu u nga wu voniki!

⁴² U nga vurisa ku yini eka makwenu u ku: ‘Makwerhu, ndzi tshike ndzi susa xilavi etihlweni ra wena’, kambe u nga voni ntsandza lowu nge tihlweni ra wena ke? Mukanganyisi! Rhanga u susa ntsandza lowu nge tihlweni ra wena; hi kona u nga ta vona swinene, u kota ku susa xilavi lexi nge tihlweni ra makwenu.

Murhi wu tiviwa hi mihandzu ya wona

⁴³ “A ku na murhi lowo nandziha lowu vekaka mihandzu leyo biha, naswona a ku na murhi lowo biha lowu vekaka mihandzu leyo nandziha.

⁴⁴ Kunene murhi wun'wana ni wun'wana wu tiviwa hi mihandzu ya wona. Makuwa ma nga ka ma nga khiwi emitweni, ni xichocho xa vhinya xi nga ka xi nga khiwi eswigatlwini.

⁴⁵ Munhu lonene ú humesa leswinene exumeni lexinene xa mbilu ya yena, ni munhu lowo biha ú humesa leswo biha exumeni lexo biha xa mbilu ya yena, hikuva nomo wa munhu wu vula leswi mbilu ya yena yi teleke swona.

Tindlela timbirhi ta masungulele ya tindlu

⁴⁶ “Xana mi ndzi vulela yini: ‘Hosi, Hosi’ xana, kasi a mi endli leswi ndzi mi byelaka swona!

⁴⁷ Un'wana ni un'wana loyi a taka eka mina, a yingisa marito ya mina ni ku famba ha wona, ndzi ta mi komba loyi a fanaka na yena.

⁴⁸ Ú fana ni munhu la akaka yindlu; ú cerile a ya hansi swinene kutani a veka masungulo eribyeni; loko ndhambi yi ta, boboma ri ba yindlu leyi, kambe ri tsandzeka ku yi tsekatsekisa, hikuva yi akiwile swinene.

⁴⁹ Kambe loyi a twaka, kutani a nga endli, ú fana ni munhu la akeke yindlu ehenhla ka sava, yi nga ri na masungulo layo tiya; loko boboma ri ba yindlu leyi, yi hatla yi wa, kutani ku onhaka ka yindlu ya kona ku va lokukulu.”