Luka 10 - BIBELE Mahungu Lamanene

Ta ku rhumiwa ka vadyondzisiwa va 72

¹ Endzhaku ka sweswo Hosi yi veka van'wana va 72 yi va rhuma ha vambirhi-mbirhi, leswaku va yi rhangela emahlweni, emitini hinkwayo ni hinkwako lomu yi anakanyaka ku hundza hi kona.

² Yi ku ka vona: “Ku tshovela i kukulu, kambe vatirhi a va talanga; hikokwalaho, khongelani n'wini wa ntshovelo leswaku a rhuma vatirhi eku tshoveleni ka yena.

³ Yanani ke; maswivo ndza mi rhuma, mi fana ni swinyimpfana exikarhi ka timhisi.

⁴ Mi nga teki xinkwamana xa mali, kumbe nkwama wa timbuva, kumbe tintanghu; mi nga xewetani na munhu endleleni.

⁵ Emutini wihi ni wihi lowu mi nga ta nghena eka wona, rhangani mi ku: ‘Ku rhula a ku ve ni ndyangu lowu!’

⁶ Kutani loko munhu wo rhula a ri kona kwalaho, ku rhula ka n'wina ku ta va ka yena; kambe loko swi nga ri tano, ku ta tlhelela eka n'wina.

⁷ Tshamani emutini wolowo, mi dya ni ku nwa leswi va mi nyikaka swona, hikuva la tirhaka ú lulameriwe hi hakelo ya yena. Mi nga rhurharhurhi hi miti.

⁸ “Loko mi nghena emutini, kutani vanhu va kona va mi amukela, dyanani leswi vekiwaka emahlweni ka n'wina;

⁹ hanyisani vavabyi va kona, mi ku ka vona: ‘Mfumo wa Xikwembu wu mi tshinelele.’

¹⁰ Kambe loko mi nghena emutini wun'wana kutani va nga mi amukeli, humani mi ya emintsendzeleni ya wona, mi ku:

¹¹ ‘Ntshuri wa muti wa n'wina lowu wu hi namarheleke milenge, ha wu phumunha wu sala na n'wina; hambiswiritano, tivani leswaku Mfumo wa Xikwembu wu tshinerile.’

¹² Ndza mi byela leswaku Sodoma ú ta vevukiseriwa ku tlula muti wolowo hi siku ra ku avanyisiwa.

Ta ku tshinyiwa ka miti leyi nga hundzukiki

¹³ “U ni khombo, wena Korazini, na wena Betsayida, hikuva mahlori lama endliweke eka n'wina, loko onge ma endliwile le Tiri na Sidoni, ingi miti leyi yi hundzukile khale yi ambele swiambalo leswo khwaxa, yi tshamile enkumeni.

¹⁴ Nisweswi miti ya Tiri na Sidoni yi ta vevukiseriwa ku tlula n'wina hi siku ra ku avanyisiwa.

¹⁵ Na wena Kapernawume: “ ‘Xana u ta tlakusiwa ku ya fika etilweni ke? E-e, u ta tsongahatiwa ku fikela eTiheleni.’

¹⁶ “Loyi a mi yingisaka, wa ndzi yingisa; ni loyi a mi fularhelaka, wa ndzi fularhela. Loyi a ndzi fularhelaka, ú fularhela Loyi a ndzi rhumeke.”

Ta ku vuya ka vadyondzisiwa va 72

¹⁷ Lava 72 va vuya hi ku tsaka, va ku: “Hosi, na wona mademona ma hi yingisa, loko hi tirhisa vito ra wena.”

¹⁸ Yesu a ku ka vona: “Ndzi vonile Sathana, a wa hi le tilweni tanihi rihati.

¹⁹ Vonani, ndzi mi nyika matimba ya ku kandziyela tinyoka ni swipame, ni ya ku hlula ntamu hinkwawo wa Nala; kutani a ku na nchumu lowu nga ta mi vavisa.

²⁰ Hambiswiritano, mi nga tsaki hi leswi mimoya yi mi yingisaka; kambe tsakani hi leswi mavito ya n'wina ma tsariweke etilweni.”

Ta Yesu loko a tala hi ku tsaka

²¹ Enkarhini wolowo Moya lowo Kwetsima wu n'wi tshukatshukisa hi ku tsaka, a ku: “Ndza ku nkhensa Tatana, Hosi ya tilo ni misava, hikuva timhaka leti, u ti fihlele lavo tlhariha ni lava mano, kambe u ti pfuletele lavatsongo. Ina, Tatana, u swi lavise sweswo.

²² “Tatana ú vekile swilo hinkwaswo emavokweni ya mina; kutani a ku na loyi a tivaka N'wana leswaku i mani, loko a nga ri Tatana; naswona a ku na loyi a tivaka Tatana leswaku i mani, loko a nga ri N'wana, ni loyi N'wana a lavaka ku hlavutela Tatana eka yena.”

²³ Kutani a hundzuluka a languta vadyondzisiwa va yena, a ku ka vona hi tlhelo: “Ma katekile mahlo lama vonaka leswi mi swi vonaka!

²⁴ Hikuva ndza mi byela leswaku vaprofeta lavo tala ni tihosi leto tala, va naverile ku vona leswi mi swi vonaka, kambe a va swi vonanga; hambi ku ri ku twa leswi mi swi twaka, a va swi twanga.”

Xifaniso xa Musamariya wa musa

²⁵ Kutani mudyondzisi un'wana wa Nawu a ta ku ta n'wi ringa a ku: “Mudyondzisi, ndzi ta endla yini ku kuma vutomi lebyi nga heriki?”

²⁶ Yesu a ku ka yena: “Ku tsariwile yini eNawini? U hlaya yini kona?”

²⁷ A hlamula a ku: “ ‘Rhandza Hosi Xikwembu xa wena hi mbilu ya wena hinkwayo, ni moya wa wena hinkwawo, ni matimba ya wena hinkwawo, ni ku anakanya ka wena hinkwako.’ Naswona: ‘Rhandza munhu-kuloni kukota loko u tirhandza.’ ”

²⁸ Yesu a ku ka yena: “U hlamule swinene, endla sweswo, u ta hanya.”

²⁹ Kambe yena, hi ku navela ku tiendla la lulameke, a ku ka Yesu: “Munhu-kulorhi i mani xana?”

³⁰ Kutani Yesu a hlamula, a ku: “Munhu un'wanyana a a rhelela hi le Yerusalema, a ya eYeriko, kutani a wela emavokweni ya swigevenga, swi n'wi hluvula swiambalo, swi n'wi ba, kutani swi suka swi famba, swi n'wi siya a ri kusuhi ni ku fa.

³¹ Kutani ku tshuka ku humelele muprista, a rhelela hi ndlela yoleyo; loko a n'wi vona, a papalata.

³² Ku ta fika Mulevhi kwalaho, kutani loko a n'wi vona, na yena a papalata.

³³ Kambe Musamariya un'wana loyi na yena a a ri eriendzweni, a fika laha munhu loyi a nga kona; loko a n'wi vona, a n'wi twela vusiwana,

³⁴ a ta kusuhi na yena, a n'wi chela mafurha ni vhinyo etimbangeni, a bohelela, a n'wi gadisa xifuwo lexi a a famba ha xona, a n'wi yisa endlwini ya vaendzi, kutani a n'wi tshungula kona.

³⁵ Nimixo a humesa mali leyi laviwaka, a nyika n'wini wa yindlu, a ku ka yena: ‘N'wi tshungule; hinkwaswo leswi u nga ta swi humesa ku tlula mali leyi, ndzi ta ku tlherisela swona, siku ndzi vuyaka.’

³⁶ Hi ku vona ka wena, xana i mani, eka lavanharhu lava, la nga va munhu-kulobye wa munhu loyi a weleke emavokweni ya swigevenga xana?”

³⁷ Yena a ku: “Hi loyi a n'wi endleleke tintswalo.” Yesu a ku ka yena: “Famba, u ya endlisa sweswo na wena.”

Ta Yesu loko a endzela Marta na Mariya

³⁸ Loko Yesu a ri karhi a hundzela emahlweni na vadyondzisiwa, a nghena emutini wun'wana, kutani wansati loyi a va ku i Marta, a n'wi rhurhela.

³⁹ Marta a a ri ni makwavo, loyi a va ku i Mariya, loyi a nga ta a ta tshama emilengeni ya Hosi, a yingisa marito ya yona.

⁴⁰ Kambe Marta a a khomekile ngopfu hi mintirho yo lunghisela vayeni; hiloko a ta eka Yesu, a ku: “Hosi, xana a hi nchumu eka wena loko makwerhu a ndzi tshika ndzi tirhela vayeni ndzi ri ndzexe? N'wi byele a ndzi pfuna.”

⁴¹ Kambe Hosi yi n'wi hlamula, yi ku: “Marta, Marta, u vilela ni ku tikarhata hi leswo tala;

⁴² kasi xilo lexi lavekaka ngopfu i xin'we ntsena, kutani Mariya ú tihlawulele ku averiwa lokunene, loku a nga ta ka a nga tekeriwi kona.”