Esaya 21 - BIBELE Mahungu Lamanene

Tiko ra Babilona ri ta wa

¹ Lawa i mahungu hi tlhelo ra “Mananga-ya-le-Lwandle”, ri nga tiko ra Babilona: Khombo leri fanaka ni mabubutsa ya le dzongeni, ra ta, ri ta hi le tlhelo ra le mananga, ri huma etikweni ro chavisa swinene.

² Xikwembu xi ndzi tivisile swilo swo chavisa hi xivono, xi ku: “Vanhu lava va tihanyi va ha endla swa tihanyi ni sweswi, vadlayi na vona va ha dlaya; hikokwalaho, va tlhandlukeleni n'wina va le Elamu, n'wina Vameda, yanani mi ya va rhendzela; mintirho ya vona hinkwayo ya tihanyi, ndzi lava ku yi herisa.”

³ Timhaka leti ti ndzi hete matimba, ti ndzi vangele switlhavi, wonge ndzo va wansati loyi a lavaka ku tintshunxa; a ndza ha koti ku ololoka, ni ku twa a ndza ha twi, swi ndzi tshukise ngopfu, lero a ndza ha koti na ku vona nchumu.

⁴ Nhloko ya mina a ya ha twisisi, ndza rhurhumela hi ku chava; ku pela ka dyambu loku a ndzi ku navela, ku lo ndzi pfumata vurhongo ntsena.

⁵ Swakudya swi vekiwile etafuleni, ni minkumba yi andlaleriwile eswitshan'wini, va karhi va dya, va nwa. Kan'we-kan'we ku twala ku: “N'wina tindhuna, sukani mi yima! Lulamisani switlhangu swa n'wina!”

⁶ N'wini wa hinkwaswo ú ndzi byerile, a ku: “Yana u ya veka munhu wo rindza, loyi a nga ta ku tivisa leswi a nga ta swi vona.

⁷ Loko a vona vanhu va famba ha vambirhi-mbirhi, va gade tihanci, kumbe va gade timbhongolo kumbe tikamela, ú fanele ku tikarhata, a va xiyaxiya swinene!”

⁸ Hiloko murindzi a huwelela, a ku: “We n'wini wanga, vusiku ni nhlekanhi, ndzi yimile exihondzeni xa varindzi, a ndzi sukanga laha a ndzi vekiwile kona.

⁹ Vonani! Ku ta vanhu lava gadeke tihanci, va famba hi vambirhi-mbirhi.” Kutani ku twala rito leri nge: “Wu wile muti wa Babilona, wu wile! Swifaniso hinkwaswo swa swikwembu swa vona swi wele hansi swi fayeka.”

¹⁰ Vaisraele va ka hina, n'wina mi biweke ku fana ni koroni exivuyeni, ndzi mi tivisa leswi ndzi byeriweke swona hi HOSI ya matimba hinkwawo, Xikwembu xa Israele.

Mahungu hi tlhelo ra Vaedomu

¹¹ Lawa i mahungu ehenhla ka Edomu. Ndzi twa munhu la ndzi vitanaka a ri eSeyira, a ku: “We murindzi, u ri yini hi vusiku, xana byi ta hela rini ke?”

¹² Ndzi hlamula, ndzi ku: “Dyambu ri ta xa, kambe na byona vusiku byi ta vuya. Ku vutisa, a swi bihanga, mi nga ha tlhela mi ta vutisa.”

Ta ku hlaseriwa ka tiko ra Arabiya

¹³ Lawa i mahungu hi tlhelo ra tiko ra Arabiya: N'wina vaxavisi lava humaka eDedani, mi ta gova eswihlahleni leswo tlhuma etikweni ra Arabiya.

¹⁴ N'wina lava tshamaka eTemani, yisani mati eka lava balekeke, hikuva va ni torha va hlanganiseni mi ri ni swakudya.

¹⁵ Vanhu va le ku balekeni, va chava mafumu, fumu ri le ku vangameni; va tsutsuma vurha lebyi kongiweke, nyimpi ya kona a yi tiyiseleki.

¹⁶ N'wini wa hinkwaswo ú ndzi byerile, a ku: “Loko ku nga si hundza lembe rin'we, wu nga nkarhi wo ringana ni lowu muthoriwa a tirhaka wona, hinkwaswo leswi vaaki va muti wa Kedari va tidzunisaka ha swona, swi ta nyamalala.

¹⁷ Tinhenha ta muti wa Kedari leti tivaka ku lwa hi miseve, ti ta sala ti ri titsongo swinene. Mina HOSI, Xikwembu xa Israele, ndzi vurisa sweswo.”