1 Vakorinto 11 - BIBELE Mahungu Lamanene

¹ Tekelelani mina, kukotisa leswi na mina ndzi tekelelaka Kriste.

Ta ku funengela nchumu enhlokweni eku gandzeleni

² Ndza mi nkhensa, hikuva ma ndzi tsundzuka minkarhi hinkwayo, naswona mi hlayisa milawu hilaha ndzi nga mi dyondzisa yona hakona.

³ Kambe ndzi lava leswaku mi tiva leswi: Kriste i nhloko ya wanuna un'wana ni un'wana, wanuna i nhloko ya wansati, Xikwembu i nhloko ya Kriste.

⁴ Wanuna un'wana ni un'wana la khongelaka, kumbe la vulaka Rito a tifunengetile nhloko, ú sorisa Kriste loyi a nga nhloko ya yena.

⁵ Kambe wansati un'wana ni un'wana la khongelaka, kumbe la vulaka Rito a nga funengelanga nchumu enhlokweni, ú sorisa nuna wa yena, la nga nhloko ya yena; swi fana ni loko onge ú byewuriwile.

⁶ Loko wansati u nga funengeli nchumu enhlokweni, a a tsemete ni misisi ya yena. Kambe loko swi khomisa tingana eka wansati ku titsemeta misisi kumbe ku byewula, a a funengele nchumu enhlokweni!

⁷ Wanuna a nga fanelanga ku tifunengeta nhloko, hikuva yena i xifaniso xa Xikwembu ni ku dzuneka ka xona, kasi wansati i ku dzuneka ka wanuna.

⁸ Wanuna a nga humesiwanga eka wansati, kambe i wansati la humesiweke eka wanuna;

⁹ naswona wanuna a nga vumberiwanga wansati, kambe i wansati la vumberiweke wanuna.

¹⁰ Loko swi ri tano, hikwalaho ka tintsumi, wansati ú fanele ku va ni xikombiso enhlokweni, xa ntikelo wa yena.

¹¹ Kambe hi tlhelo rin'wana, emahlweni ka Hosi wansati a hi nchumu ehandle ka wanuna, na yena wanuna a hi nchumu ehandle ka wansati.

¹² Hikuva kukota leswi wansati a humesiweke ka wanuna, hi mukhuva wolowo na yena wanuna ú velekiwa hi wansati, kambe hinkwaswo swi huma eka Xikwembu.

¹³ Avanyisani hi n'wexe: Xana swa fanela leswaku wansati a khongela Xikwembu a nga funengelanga nchumu enhlokweni ke?

¹⁴ Xana na wona ntumbuluko a wu mi dyondzisi leswaku loko wanuna a ri ni misisi yo leha, swi n'wi nyika xisolo xana?

¹⁵ Kasi wansati loko a ri ni misisi yo leha, xana a swi n'wi nyiki ndzhuti xana? Hikuva ú nyikiwile misisi yo leha ku va xifunengelo xa yena.

¹⁶ Hambiloko munhu a lava ku phika hi swona, hina a hi tolovelanga sweswo, na tona tikereke ta Xikwembu a ti swi tolovelanga.

Swihoxo eku dyeni ka Xilalelo xa Hosi

¹⁷ Loko ndzi ri karhi ndzi mi nyika swileriso leswi, ku ni leswi swi ndzi vilerisaka: Hileswaku tinhlengeletano ta n'wina ta onha ku tlula ku lulamisa.

¹⁸ Xo sungula: Ndzi twa leswaku ku ni ku avana exikarhi ka n'wina loko mi nghena tinhlengeletano ta n'wina; mhaka leyi, hi tlhelo rin'wana ndzi kholwa leswaku yi nga va yona.

¹⁹ (Swa twala, ku hambana ku fanele ku va kona exikarhi ka n'wina, leswaku lava nga va ntiyiso exikarhi ka n'wina na vona va vonaka.)

²⁰ Kutani ke, loko mi nghena tinhlengeletano ta n'wina, lexi mi xi dyaka a xa ha ri Xilalelo xa Hosi;

²¹ hikuva loko mi ta eku dyeni, hinkwenu mo tsutsumela ku dya swakudya swa n'wina, kutani van'wana va kayivela, kasi van'wana va nwa va pyopyiwa.

²² Xana a mi na makaya yo dyela ni ku nwela eka wona xana? Xana mi ta sandza kereke ya Xikwembu, mi khomisa swisiwana tingana xana? Ndzi ta ku yini eka n'wina? Xana ndzi nga mi nkhensa ke? E-e, emhakeni leyi a ndzi mi nkhensi.

Ta Xilalelo xa Hosi

²³ Timhaka leti ndzi ti hundziseleke eka n'wina hi leti ti humeke eka Hosi hi xiviri xa yona: Hileswaku, hi vusiku lebyi a nyiketiweke hi byona, Hosi Yesu ú tekile xinkwa,

²⁴ a nkhensa, a xi phema, a ku: “Leswi i miri wa mina, lowu nyiketiwaka hikwalaho ka n'wina; endlani sweswo hi ku ndzi anakanya.”

²⁵ Hi mukhuva wolowo, endzhaku ka loko va lalerile, a teka ni xinwelo, a ku: “Xinwelo lexi i ntwanano lowuntshwa lowu endliwaka hi ngati ya mina. Minkarhi hinkwayo loko mi nwela eka xona, swi endleni hi ku ndzi anakanya.”

²⁶ Hikuva minkarhi hinkwayo loko mi dya xinkwa lexi, ni loko mi nwela exinwelweni lexi, mi vula rifu ra Hosi, yi kondza yi ta.

Ku dya Xilalelo hi mukhuva lowu nga lulamangiki

²⁷ Hikokwalaho, un'wana ni un'wana la dyaka xinkwa lexi, kumbe la nwelaka exinwelweni xa Hosi hi mukhuva lowu nga lulamangiki, ú ta va ni nandzu wo dyohela miri ni ngati ya Hosi.

²⁸ Munhu ú fanele ku rhanga hi ku tikamba, ku va kona a nga ta dya xinkwa lexi ni ku nwela exinwelweni lexi;

²⁹ hikuva loko munhu a dya ni ku nwa a ri karhi a nga vonisisi swinene ta miri wa Hosi, ú dya ni ku nwa ku avanyisiwa ka yena.

³⁰ Hikokwalaho, ku ni lavo tala exikarhi ka n'wina lava tsaneke ni lava vabyaka, naswona, van'wana va file.

³¹ Loko onge ha tikambisisa, a hi nga ta avanyisiwa;

³² kambe leswi hi avanyisiwaka hi Hosi, ho layiwa leswaku hi ta ka hi nga avanyiseriwi makumu swin'we ni vanhu va misava.

³³ Hikokwalaho, vamakwerhu, loko mi hlengeletana ku ta dya Xilalelo, yimelanani;

³⁴ loko un'wana a ri ni ndlala, a a dye kaya, leswaku ku hlengeletana ka n'wina ku nga mi yisi eku avanyisiweni. Loko ti ri timhaka tin'wana, ndzi ta mi letela tona loko ndzi tile.