1 TIKRONIKA 17 - BIBELE Mahungu Lamanene

Muprofeta Natani a tivisa Davhida makungu ya Xikwembu

¹ Loko Davhida a tshamisekile emutini wa yena, a byela muprofeta Natani, a ku: “Vona, sweswi ndzi tshama endlwini yo akiwa hi timhandze to saseka ta kedari, kasi Areka ya Ntwanano wa HOSI yona yo va entsongeni!”

² Kutani Natani a hlamula Davhida a ku: “Hiswona, endla hinkwaswo leswi mbilu ya wena yi ku byelaka swona, hikuva Xikwembu xi na wena.”

³ Kambe hi vusiku byebyo, HOSI Xikwembu xi vulavula na Natani, xi ku:

⁴ “Famba u ya byela nandza wa mina Davhida leswaku mina HOSI Xikwembu ndzi ri, a hi yena loyi a nga ta ndzi akela yindlu yo tshama eka yona.

⁵ Hi mpfhuka ndzi humesa Vaisraele etikweni ra Egipta, a ndzi si tshama endlwini ku fikela namuntlha; ndzi rhendzelekile na vona etindhawini to hambana-hambana, ndzi ri karhi ndzi tshama entsongeni.

⁶ Hinkwako lomu ndzi famba-fambeke kona ni Vaisraele hinkwavo, a ndzi vutisanga ni un'we wa vafambisi lava a ndzi va vekile ku risa tiko ra mina, leswaku va endlele yini ku ka va nga ndzi akeli yindlu ya kedari.

⁷ Sweswi u ta byela nandza wa mina Davhida leswaku mina HOSI ya matimba hinkwawo ndzi ri: ‘Ndzi ku hlawurile, ndzi ku susa eku riseni, u tshika ku landzelelana ni tinyimpfu leswaku u ta va mufambisi wa vanhu va mina va Israele.

⁸ Hinkwako lomu u yeke kona, ndzi vile na wena; ndzi herisile valala va wena matlhelo hinkwawo. Kutani sweswi ndzi ta kurisa vito ra wena, ndzi ku endla un'wana wa vanhu lava dumeke emisaveni.

⁹ Ndzi ta lavela vanhu va mina va Israele evutshamo, laha ndzi nga ta va simeka kona, leswaku va tshama endhawini leyi yi nga ya vona ya xiviri. Kona a va nga karhatiwi hi munhu, naswona a va nga ha hlaseriwi hi vanhu va nsele lava a va hamba va va xanisa,

¹⁰ ku sukela eminkarhini ya vaavanyisi lava a ndzi va vekile ku lamulela vanhu va mina va Israele. Wena Davhida, ndzi ta ku hlulela valala va wena hinkwavo. Tlhandlakambirhi, mina HOSI ndza ku tshembisa leswaku ndzi ta ku nyika vatukulu.

¹¹ Loko masiku ya wena ya ku hanya ma ta va ma herile, ni loko u ta va u tietlelele ni vakokwa wa wena, ndzi ta hlawula endyangwini wa wena n'wana wa wena wa xiviri a va hosi, ndzi katekisa mfumo wa yena.

¹² Hi yena loyi a nga ta ndzi akela yindlu, kutani ndzi ta katekisa mfumo wa yena hilaha ku nga heriki.

¹³ Mina ndzi ta va tatana eka yena, yena a va n'wana eka mina; ndzi nga ka ndzi nga tshiki ku n'wi rhandza, ku fana ni leswi ndzi nga tshika ku rhandza loyi a nga ku rhangela evuhosini.

¹⁴ Ndzi ta n'wi nyika vuhosi ehenhla ka vanhu va mina, a fuma tiko ra mina hilaha ku nga heriki; vuhosi bya yena a byi nga vi na makumu.’ ”

¹⁵ Kutani Natani a ya, a ya hlayela Davhida marito lawa hinkwawo, hilaha a hlavuteriweke wona hakona.

Xikhongelo xa Davhida xo nkhensa makungu ya Xikwembu

¹⁶ Kutani hosi Davhida a ya nghena entsongeni wa HOSI Xikwembu a tshama ehansi, a khongela a ku: “We HOSI Xikwembu, a ndzi munhu wa nchumu, naswona ndyangu wa mina a wu tivikani, kambe u ndzi fikisile eka xiyimo lexi ndzi nga eka xona sweswi.

¹⁷ Hambiswiritano, we Xikwembu, mhaka leyi u yi vonile yi ri leyitsongo u tlhela u ndzi hlamusela ta vatukulu va mina nandza wa wena, va minkarhi leyi taka, kutani u ndzi vona ndzi ri munhu wa xiyimo xa le henhla, we HOSI Xikwembu.

¹⁸ Xana mina Davhida ndzi nga vula yini hi mafundzha lawa u ndzi endleleke wona, hikuva wa ndzi tiva mina nandza wa wena.

¹⁹ Hikwalaho ka makungu ya wena we HOSI, u ndzi nyikile vukulu lebyi, mina nandza wa wena, u tlhela u ndzi tivisa ni timhaka letikulukumba.

²⁰ Ku hava la fanaka na wena we HOSI, a ku na Xikwembu xin'wana. Hinkwaswo leswi hi swi tweke, swi seketela mhaka leyi.

²¹ Xana ri kona rixaka rin'wana emisaveni, leri fanaka ni vanhu va wena va Israele xana? Rixaka leri, u yile u ya ri kutsula etikweni ra Egipta we Xikwembu, leswaku ri va ra wena, u tidzunisa ha rona. Loko u ri kutsula, u ri endlele swilo leswikulu leswi chavisaka hi ku hlongola valala emahlweni ka rona.

²² We HOSI, u tihlawulele Vaisraele ku va vanhu va wena hilaha ku nga heriki, kutani u vile Xikwembu xa vona.

²³ Sweswi we HOSI, leswi u swi tshembiseke ehenhla ka mina nandza wa wena ni le henhla ka vatukulu va mina, a swi tiye hilaha ku nga heriki; endla hilaha u vuleke hakona,

²⁴ kutani vito ra wena ri ta twala ri kurisiwa hilaha ku nga heriki; vanhu va ta ku: ‘HOSI ya matimba hinkwawo, hi yona yi nga Xikwembu xa Israele!’ Naswona rixaka ra mina Davhida nandza wa wena ri ta tiyisiwa emahlweni ka wena.

²⁵ We Xikwembu xa mina, ndzi kumile matimba ya ku fikisa xikhongelo xa mina eka wena, hikuva u ndzi tivisile makungu ya wena, u ku: ‘Ndzi ta ku nyika vatukulu!’

²⁶ We HOSI, hi wena Xikwembu u ri wexe, kutani u nyikile mina nandza wa wena switshembiso leswi swa nkoka.

²⁷ Sweswi ke, ndzi kombela leswaku u katekisa rixaka ra mina nandza wa wena, ri ya emahlweni ri ku dzunisa hilaha ku nga heriki. Leswi u swi katekisaka we HOSI, swi tshama swi katekile!”