2 TIHOSI 2 - Xitsonga (Bibele)

Ta ku tlhandluka ka Eliya etilweni. Elixa.

¹ Kakuloko Yehovha, a tlhandlukisa Eliya etilweni hi xihuhuri, Eliya a a sukile eGiligala, a ri na Elixa.

² Eliya a ku eka Elixa: “Tshama la, hikuva Yehovha u ndzi rhumela eBetele.” Elixa a ku: “Yehovha wa hanya, ni moya wa wena wa hanya, ndzi nga ka ndzi nga ku tshiki.

³ Kavaloko va ngirimela eBetele.” Vana va vaprofeta lava ngi va ri eBetele va huma va ta eka Elixa, va ku eka yena: “Xana wa swi tiva leswaku namuntlha Yehovha u ta tlakusa hosi ya wena ehenhla?” Kutani a ku: “Ndza swi tiva na mina: miyelani.”

⁴ Kutani Eliya a ku eka yena: “Wa nga tshama la, wee Elixa, hikuva Yehovha a ndzi rhuma eYeriko.” Yena a hlamula, a ku: “Yehovha wa hanya, ni moya wa wena wu hanya, ndzi nga ka ndzi nga ku tshiki.” Kavaloko va fika eYeriko.

⁵ Kutani vana va vaprofeta lava ngi va ri Yeriko, va tshinelela Elixa, va ku eka yena: “Xana wa swi tiva leswaku namuntlha Yehovha u ta tlakusela hosi ya wena ehenhla?” Kutani a ku: “Ndza swi tiva na mina: miyelani.”

⁶ Kutani Eliya a ku eka yena: “Wa nga tshama la, hikuva Yehovha a ndzi rhuma eYordani.” Yena a hlamula, a ku: “Yehovha wa hanya ni moya wa wena wa hanya, ndzi nga ka ndzi nga ku tshiki.” Kutani va famba swin'we.

⁷ Kutani vanhu va ntlhanu wa makume va vana va vaprofeta va ta, va yima emahlweni ka vona va ri ekulenyana; loko va ri vona havambirhi va yima eribuwini ra Yordani.

⁸ Kavaloko Eliya a teka jasi ra yena, a ri petsa, a ba ha rona mati ya nambu, kutani ma avana hala ni hala; va pela havambirhi laha ku omeke.

⁹ Kuteloko va perile, Eliya a ku eka Elixa: “Kombela lexi u xi rhandzaka ku endleriwa hi mina, ndzi nga si tlakuriwa, ndzi hambana na wena.” Elixa a ku: “Ndzi kombela ku averiwa moya wa wena kambirhi.”

¹⁰ Eliya a ku: “U kombele xilo lexikulu! Kambe loko u ndzi vona ndzi tlhandlukisiwa, u ta endleriwa sweswo; kambe loko u nga ndzi voni, swi nga ka swi nga vi tano.”

¹¹ Kakuloko va ha famba va vulavula, ku ta golonyi ya ndzilo, ni tihanci ta ndzilo swi va hambanyisa kutani Eliya a tlhandlukela etilweni exihuhurini.

¹² Elixa a ri karhi a n'wi languta, a huwelela a ku: “Tatana, tatana! Golonyi ya Israele ni tihanci ta yona!” Kutani a nga ha n'wi voni. Kavaloko Elixa a khoma tinguvu ta yena a ti handzula hi le xikarhi.

¹³ Kutani a teka jasi ra Eliya leri a ri tshikeke ri wa ehansi, a tlhela, a ya yima eribuwini ra Yordani.

¹⁴ Kavaloko a teka jasi ra Eliya leri weke, a ba ha rona mati, a ku: “Yehovha, Xikwembu xa Eliya, u kwihi xana?” Sweswo a ba na yena mati, kutani ma avana hala ni hala, Elixa a pela.

¹⁵ Vana va vaprofeta lava ngi va ri eYeriko va langutene na yena, kuteloko va n'wi vona, va ku: “Moya wa Eliya wu tshame eka Elixa.” Va ya hlangana na yena, kutani va khinsama ehansi emahlweni ka Yena.

¹⁶ Va ku eka yena: “Waswivo, exikarhi ka malandza ya wena, ku ni vavanuna va matimba va ntlhanu wa makume; u nga va pfumelela ku ya lava hosi ya wena, hikuva kumbe moya wa Yehovha wu n'wi vutlile, wu ya n'wi hoxa etintshaveni, kumbe enkoveni.” Yena a ku: “Mi nga tshuki mi va rhuma.”

¹⁷ Kambe va n'wi sindzisa ngopfu, kutani a ku: “Va rhumeni.” Va rhuma vavanuna va ntlhanu wa makume va ya n'wi lava hi masiku manharhu, kambe a va n'wi kumanga.

¹⁸ Kuteloko va vuyile eka Elixa la tshameke eYeriko, a ku eka vona: “Xana a ndzi mi byelanga, ndzi ku: ‘Mi nga tshuki mi ya.’?”

Ta Mati ya Yeriko.

¹⁹ Kavaloko vanhu va muti va ku eka Elixa: “Ku sasekile ku tshama emutini lowu, hilaha hosi yanga yi swi vonaka hakona, ntsena mati ma bihile ni tiko i ra nyumba.”

²⁰ Kutani a ku: “Ndzi tiseleni nkambana lowuntshwa, mi chela munyu eka wona.” Va n'wi tisela wona.

²¹ Kavaloko a huma, a ya exihlobyeni xa mati, a hoxa munyu kona, a ku: “Yehovha u vurisa sweswo, a ku: ‘Ndzi sasekisa mati lawa. Ku nga ka ku nga ha humi rifu eka wena ni ndlala.’ ”

²² Kutani mati ma sasekisiwa, ma va manene ku fika namuntlha, hilaha Elixa a nga vula hakona.

Ta varisanyana va Betele.

²³ A suka kona, a ya eBetele, kutani kakuloko a tlhandluka hi ndlela, varisanyana va huma emutini, va n'wi hleka, va ku: “Tlhandluka, wee mpandhla! Tlhandluka wee mpandhla!”

²⁴ Yena a hundzuluka, a va vona, a va rhukana hi vito ra Yehovha. Kutani tibere timbirhi ti huma exihlahleni, ti handzulela varisanyana va mune wa makume na vambirhi exikarhi ka vona.

²⁵ A suka kona, a ya entshaveni ya Karmele, kutani a tlhela a ya eSamariya.