Hebreos 9 - Nuevo Testamento Toba Sombrero Negro

Jogaa'me najaqajel toye's jo'ne qaya'te ta'le chiyaqayilo

¹ Qa'a da'me 'uaechiñe 'namaqatenataĝanaĝac yataqata 'uo da'me lajoĝoc da'me qoye'et nale qoya'uo ga'me nemaĝac, qama'le 'uo ca'li ga'me tamenaĝaiqui 'me 'lonata'j ga'me jiyaĝadipi.

² Joca'li ñe'me tamenaĝaiqui, da'me 'uaechiñe lalec lenaĝat qoyen da'me 'Lachaqa' da'me Ja 'Nalegue, jo'ne neta'ña jaga'me coyadaĝanaqate nataq'aen joga'me niqui'yaĝala' 'me uetedalegue gaa'me pan jo'ne qoyano't joñe'me Dios.

³ Qama'le ga'me laqaya nequepaĝanaĝat nach'ega jo'ne qoyen lenaĝat da'me 'Lachaqa' da'me Yataqata Ja 'Nalegue,

⁴ nach'ega jo'ne ueta'ña ga'me nec'atoĝonaĝala' jo'ne oro, 'me 'lachaqa' da'me qoyigoue ga'me jo'ne jama ga'me laeta, nataq'aen jaga'me 'namaqatenataĝanaĝac lae't, jogaa'me lael ualo'te jaga'me oro. Nataq'aen di'me na'ña jaga'me 'namaqatenataĝanaĝac lae't uoja'e ga'me yomaĝaiqui jo'ne oro 'me uetañgui jaga'me maná, qama'le nach'e ena'am ga'me laje'l ñe'me Aarón, ga'me jo'ne nolel joca'li, nataq'aen jogaa'me nedaĝanaĝala'te jo'ne uetalo'te daa'me namaĝajoĝonaĝaco 'me chiyoqodayi da'me 'namaqatenataĝanaĝac.

⁵ Nataq'aen ga'me p'ajeguem jaga'me lae't, netedalegue jogaa'me lequi'il jogaa'me piyem laje' jo'ne uayo'tape 'me dos, nach'egaua jo'ne yelotede'eguet da'me lovidaĝac joñe'me Dios, qama'le naa'me loua' jogaa'me qoyachedalegue joga'me lapo'. Qalaĝaja nayi cha'li ja yitaĝa ta'le ja'aĝataqatac da'me eeta naa'me naajo' jo'ne uo'oe.

⁶ Chane'eja naq'aeta da'me male yem da'me niyamaqatague'j naa'me naajo' jo'ne uo'oe, qama'le jogaa'me netaĝayaĝanaĝanaqa male nach'e eta't da'me tadoue ga'me 'uaechiñe lalec joga'me emec qaedi yemeda'a da'me 'lonataĝanaĝa'j jo'ne chiyaqayi da'me qo'nonaĝachigui joñe'me Dios.

⁷ Qalaĝaja ga'me jo'ne p'ategue lalec joga'me emec, nach'eñeta joñe'me lajoĝola' jogaa'me netaĝayaĝanaĝanaqa da'me taue, qalaĝaja ch'e onolec ga'me nolo' joga'me uo'e da'me taue, da'me yedo't jaga'me jiyac letauo' qaedi male qoyapalaĝa't gaa'me mach'e loeco, choqogaa'me loeco joga'me jiyaĝadipi jo'ne ja nomegueta.

⁸ Chane'eja joñe'me Dios Lepaqal qo'mi yayatenaĝanaĝaneque queda'me yatemaliaĝa queta da'me 'uaechiñe tamenaĝaiqui, qama'le cha'li ja qoyaloĝon da'me qadadic ta'le jaĝaue di'me p'auo jo'ne yataqata ja 'nalegue.

⁹ Qama'le nayi naa'me naajo' noloqo'ote, nach'eda jenjo' qoyen qadaloqotenaĝanac, qa'a gaa'me nachetaqataĝanaqatel nataq'aen jogaa'me najaqajel jo'ne qoyigouelo da'me qoyanoto joñe'me Dios, ja naqaegaua ta'le yaqanate't da'me en yataqatelo'te q'ae'n gaa'me lai'li jogaa'me jiyaĝa'u, qom naq'aeta da'me li'yoĝodenataĝanaĝa'j.

¹⁰ Yema da'me dojo' jo'ne qoya'uo joca'li, nach'edaua daa'me namaĝajoĝonaĝaco jo'ne ch'e yelotede'eguet da'me jiyaĝaua lapachiaĝac, da'me 'uo da'me niqui'yaĝac nataq'aen da'me yomaĝac, choqodaa'me niyoĝoco jo'ne yodapecache, da'me dojo' jo'ne te'me 'uo da'me lajo'viyaĝac chayovida'a qom Dios yadalaĝa't yemeda jogaa'me uo'oe.

Joga'me najaqajec dalaĝaic

¹¹ Qama'le joote novi' joñe'me Cristo, mach'e Qadetaĝayaĝanaĝanec jo'ne p'ajaye. Naqaeñe qo'mi yanema ga'me onaĝaic jo'ne joote 'uo, qa'a joote yenoĝoneuo'o joga'me tamenaĝaiqui laqaya jo'ne p'ajaye nataq'aen yataqatelegue, qa'a ja naqaegaua gaa'me jiyaĝa'u ta'le 'lonata'j, queda'me ja neta'ña jena'me jenjo' aleua.

¹² Ñe'me Cristo joote yenoĝoneuo'o ga'me p'auo jo'ne lenaĝat da'me 'Lachaqa' da'me Yataqata Ja 'Nalegue, qama'le ja yedouo jaga'me letauo' ga'me quetaq uotaĝa ga'me uaca c'oĝot, dite da'me ena'am ta'le yedouo jaga'me mach'e letauo', qama'le ch'e onolec da'me yenoĝoneuo, qa'a joote ya'uo da'me qadec'alaĝa jo'ne qaya'te loiquiaqa'.

¹³ Yataqachiñe eja da'me 'uo da'me chiyaqayi jaga'me letauo' ga'me quetaq nataq'aen ga'me uaca c'oĝot, choqoga'me jalo jo'ne lojoche jaga'me uaca lec'oqote jo'ne qoyigoue da'me uetalegue ga'me c'atoĝonaĝala', da'me qoyequetegaĝalo'te nale jogaa'me jiyaĝa'u jo'ne ena'am ta'le paĝachiguilo, qama'le 'uo da'me lañoqotaĝanaĝac da'me dojo' jo'ne qoya'uo qaedi jogaa'me ena'am ta'le qoye'n yoqovite', qaedi male yaqanate't ta'le tadoue ga'me tamenaĝaiqui.

¹⁴ Chane'eja qom naq'aeta da'me dojo', qama'le jalcote da'me yaguegue da'me lañoqotaĝanaĝac jaga'me letauo' joñe'me Cristo, qa'a chiyaqayi ñe'me Dios Lepaqal jo'ne nach'e eta't da'me 'uo, ñe'me Cristo mach'e nemenot joñe'me Dios, da'me ena'am ta'le najaqajec jo'ne qaya'te lejepaĝanaĝa. Chane'eja jaga'me letauo' da'me yataqata e'n yoqovite' naa'me mach'e qadai'li, nach'eda da'me jo'ne ja yaqanatet ta'le chiyaqayilo jogaa'me najaqajel toye's, qama'le nayi yataqata jaqanatetaq da'me jo'onataĝanaĝauo'o ñe'me Dios jo'ne nach'e eta't da'me nec'aletaye.

Da'me 'namaqatenataĝanaĝac dalaĝaic

¹⁵ Chane'eja ca'li yeleu joñe'me Jesucristo, male yiyamaĝatetac da'me 'namaqatenataĝanaĝac jo'ne dalaĝaic. Qa'a chiyaqayi da'me leleuaĝa joñe'me, male qoyapalaĝa't jogaa'me loeco joga'me jiyaĝadipi, jogaa'me lejamaĝataĝaco jo'ne e'n 'naĝa't da'me 'namaqatenataĝanaĝac jo'ne 'uaechiñe. Chane'eja nach'egaua ga'me jiyaĝadipi jo'ne joote qoyiyaĝanalo, male yaqanate't ta'le yacoteguet da'me 'noota jo'ne qaya'te loiquiaqa', da'me jo'ne joote qo'yaĝatema joca'li.

¹⁶ Qa'a qom 'uo ga'me ye'et jaga'me nede jo'ne lomalate da'me eeta da'me qoyadegue yemeda gaa'me mach'e loqo'te, qama'le qoyouen da'me qo'yaĝat da'me leleuaĝa joga'me jiyaĝaua jo'ne ye'et.

¹⁷ Qa'a joga'me qoyedelegue jaga'me nede, ja yaqanatet ta'le yepaquichigui qom maliaĝa nec'aletaye ga'me jo'ne ye'et, dite da'me qom joote yeleu.

¹⁸ Qama'le nach'e ena'am da'me 'uaechiñe 'namaqatenataĝanaĝac, joca'li qoye'et qama'le qoyouen da'me qoyen naliñi jaga'me netauo'.

¹⁹ Chane'eja ñe'me Moisés, ca'li yem da'me 'yaĝatema yemeda daa'me lamaĝajoĝonaĝaco joñe'me Dios ena'uaque jogaa'me noyaqa, qama'le yacona jaga'me lepee jaga'me epaq lenaĝat hisopo 'me 'uo ga'me 'naĝanaĝate layoĝot jo'ne tomaĝadaic, qama'le yijomiñgui jaga'me uaca lec'oĝot letauo' jo'ne yaleeguet joga'me noĝop chaqaga'me quetaq letauo', qama'le yequetegaĝalegue jaga'me nede jo'ne uetedaue daa'me namaĝajoĝonaĝaco, qama'le nach'e ena'ama yema joga'me jiyaĝadipi.

²⁰ Qama'le eetac: “Janjo' jiyac letauo' nach'ana jo'ne en yepaquichigui da'me 'namaqatenataĝanaĝac jo'ne Dios damaĝajoĝolegue qaedi male a'uamaqachiñe.”

²¹ Qama'le ñe'me Moisés nach'e ena'am ñitaĝatoue jaga'me jiyac letauo' joga'me tamenaĝaiqui lauel, nataq'aen yema jogaa'me 'nonataĝanaqa'te jo'ne qot'onataĝanalo nale 'uo ga'me nemaĝac.

²² Da'me chiyaqayi da'me namaĝajoĝonaĝac, nach'ana jana'me jiyac letauo' jo'ne e'n yoqovite' yema gaa'me uo'oe, qama'le nach'e ena'am da'me qaya'te ta'le yapalaĝa't jogaa'me qadoeco qom ja qoyen 'te naliñi jaga'me netauo'.

Da'me najaqajec jo'ne p'ajaye

²³ Chane'eja 'uo da'me youetaque da'me 'uo ga'me najaqajec qaedi yiyo'y qoye'n jogaa'me uo'oe jo'ne ch'e lequi'il gaa'me jo'ne yoĝodache 'me ueda'ague di'me piyem. Qalaĝaja gaa'me yoĝodache jo'ne ueda'ague di'me piyem, youetapiye ga'me najaqajec jo'ne onaĝaic, 'me ja ena'ama gaa'me jo'ne qoyauo'oe nale.

²⁴ Qa'a ñe'me Cristo ja taue ga'me tamenaĝaiqui jo'ne 'lonata'j jogaa'me jiyaĝa'u, ga'me jo'ne ch'e lequi'i ga'me tamenaĝaiqui jo'ne yataqatelegue, dite da'me yec'adije'ma di'me piyem, nach'edi di'me jo'ne ua'ague nayi, da'me male dajoya'aguet joñe'me Dios qaedi qo'mi nachoĝodetapelo'te.

²⁵ Qama'le ja naqaeda ta'le nach'e eta't 'viyelaĝalegue da'me yenoĝoje'ma di'me piyem, qaedi yitaĝa ya'uo ga'me lajaqajec; ja ena'am ga'me lajoĝola' gaa'me judiopi letaĝayaĝanaĝanaqa jo'ne onolqa'tape naa'me 'uoidi da'me taue ga'me netamenaĝaiqui qaedi 'yaĝateuo jaga'me jo'ne ja mach'e letauo'.

²⁶ Ta'le naqaeda jo'ne eeta qama'le Cristo uotaĝa nach'e eta't 'viyelaĝalegue da'me yeleu, chiyoqotelegue ca'li yemta qoye'et jena'me aleua. Qalaĝaja ja naq'aeta, dite da'me male yovita da'me mach'e loiquiaqa't jogaa'me noloqo'ote, qama'le Cristo male onolec da'me 'naĝatela't, da'me nach'eñe jo'ne najaqajec qaedi doĝotaĝaneque naa'me qadoeco.

²⁷ Joote qoyediñe joca'li onolec da'me qadeleuaĝa, qama'le da'me yem da'me dojo' male qoya'uo da'me nec'atenaĝanaĝac.

²⁸ Chane'eja nach'e ena'am ñe'me Cristo onolec da'me qo'yaĝateuo, qama'le qoyen najaqajec jo'ne onolec, qaedi doĝotaĝaneque gaa'me loeco jogaa'me jiyaĝa'u jo'ne qayoĝode'. Qama'le qom'che male yitaĝa di'yoq, male ja naqaenaua naa'me qadoeco ta'le nec'atalo, dite da'me male nec'alaĝatedegue jogaa'me jo'ne yeuatetedaque.