Hebreos 8 - Nuevo Testamento Toba Sombrero Negro

Ñe'me Qadetaĝayaĝanaĝanec jo'ne dajo'tot joñe'me Dios

¹ Chane'eja da'me qat'aqatac jo'ne yaguegue da'me lajo'viyaĝac, nach'eda da'me dojo', eet'oi: yataqata 'uo ñe'me Qadetaĝayaĝanaĝanec jo'ne ne'tague di'me piyem nayi, da'me male na'ña da'me loec joga'me lejaliaĝaiqui joñe'me Dios.

² Qama'le nach'eñe jo'ne yataqata dajo'tot joñe'me Dios, qa'a uetaue di'me tamenaĝaiqui jo'ne ja 'nalegue, 'me ja 'lonata'j jogaa'me jiyaĝa'u dite da'me nach'eñe ñe'me Dios jo'ne ye'et.

³ Yema ga'me netaĝayaĝanaĝanec jo'ne qoyen lajoĝola' gaa'me tamenaĝaiqui lo'ol 'uo da'me 'lonatac jo'ne yanoto joñe'me Dios gaa'me lachitaĝanaqa'te ga'me jiyaĝadipi choqoga'me lajaqajecpi jo'ne qoyigouelo. Qama'le nach'e ena'am joñe'me Dios Lec'oĝot youen ca'li da'me ya'uo jaga'me mach'e lachitaĝanaqate.

⁴ Qalaĝaja ta'le cha'li ue'ta jena'me aleua joñe'me, qama'le ja naqaeñe ta'le qoyen netaĝayaĝanaĝanec, qa'a joote uo'oe jogaa'me tamenaĝaiqui lo'ol jo'ne yedodapeuo gaa'me nachitaĝanaqa'te, nach'eda da'me jo'ne damaĝajoĝolo'te da'me Dios lamaĝajoĝonaĝac 'me qo'mi yanema ca'li joñe'me Moisés.

⁵ Qalaĝaja da'me jo'ne yauote jogaa'me tamenaĝaiqui lo'ol ja naqaeda ta'le chiyaqayi joda'me eja, qa'a ga'me tamenaĝaiqui choqogaa'me jo'ne uetedaue ch'e lequi'il jogaa'me ejoda jo'ne ueda'ague di'me piyem. Qa'a naq'aeta da'me qo'yaĝatem joñe'me Moisés joca'li jetaque ye'et ga'me tamenaĝaiqui, qama'le eetac joñe'me Dios: “Auelo'tegue da'me dojo' jo'ne am japaĝaguenec qama'le auadenaĝat da'me 'loyaĝac ga'me jo'ne aualoĝona ca'li oua'ña jadi'me qajoĝonaĝa.”

⁶ Qalaĝaja nayi ñe'me mach'e Qadetaĝayaĝanaĝanec jo'ne ne'tague di'me piyem male yaconeguet da'me 'nonataĝanaĝac jo'ne p'ajaye, da'me yiyamaĝatetac ga'me onaĝaic jo'ne qat'amaqatenataĝanaĝac qaedi male jaqanatetaq ta'le ñiyamaĝadenaĝaguet joñe'me Dios, qa'a nach'ega jo'ne chiyaqayilo gaa'me onaĝayaqa jo'ne joote qo'mi qoyaloĝonalo.

Da'me 'namaqatenataĝanaĝac jo'ne 'uaechiñe

⁷ Ta'le eja da'me 'uo ga'me chiyaqayi da'me 'namaqatenataĝanaĝac jo'ne 'uaechiñe, qama'le ja qoyouetaque ta'le 'uo ga'me laqaya jo'ne p'ategue.

⁸ Qalaĝaja ñe'me Dios yauana ca'li da'me ja yataqatelo'te q'ae'n ga'me jiyaĝadipi, qama'le eetac: “Uo'oe qomle gaa'me noloqo'ote qom ja'uo ga'me dalaĝaic 'me 'yamaqatenataĝanaĝac qaedi ñiyamaĝadenegueta joga'me lec'oqo'tepi ñe'me Israel choqoñe'me Judá.

⁹ Chane'eja da'me dalaĝaic jo'ne ja'uo qomle, Male ja jen 'te ena'am da'me je'eteque dia'me jo'ne mach'e auachiyoĝoyegueta, Queda'me ena'am ta'le yajoqot'alo naa'me loua' ca'li qaedi jen queda'e di'me aleua jo'ne Egipto. Jogaa'me ja nach'e eta't da'me queteda'ague da'me jo'ne mach'e 'yamaqatenataĝanaĝac, Qama'le da'me jayem male jeca'ae.

¹⁰ Qom male yenoĝodegue jogaa'me noloqo'ote Qama'le naq'aeta da'me 'yamaqatenataĝanaĝac Qaedi ñiyamaĝadenegueta jogaa'me lec'oqo'tepi ñe'me Israel: Janauelo qomle naa'me laqai'go daa'me yamaĝajoĝonaĝaco, Qama'le jedelo'te jogaa'me lai'li; Qa'a naqayem jo'ne mach'e jayem Nedios, Chane'eja joga'me jiyaĝadipi nach'egaua jo'ne mach'e ñejoĝonaqapi.

¹¹ Nataq'aen da'me male ja yitaĝa ta'le youen da'me 'uo ga'me yapaĝaguen Ga'me lequiaĝaua uotaĝa joga'me mach'e laqaya, Da'me qaedi jayem yateton, Qa'a male ena'uac ga'me jiyaĝadipi joote jayem yateton, Chayovida'a gaa'me jo'ne ja 'yaĝayaqa, qama'le nach'e ena'ama jogaa'me 'yaĝayaqa.

¹² Qa'a male japalaĝat da'me naviyaqatague'j jogaa'me, Nataq'aen da'me ja yitaĝa ta'le jenate'talo naa'me ja 'noe'n jo'ne mach'e loeco.” Naq'aeta da'me dojo' jo'ne 'laqatac joñe'me Jaliaĝanec.”

¹³ Chane'eja joñe'me Dios joote 'yaĝatetac ga'me 'namaqatenataĝanaĝac jo'ne dalaĝaic, qama'le ena'am ta'le en toijec da'me jo'ne 'uaechiñe. Qama'le ga'me toijec ja uayaloq qomle da'me pal.