Gálatas 5 - Nuevo Testamento Toba Sombrero Negro

Qo'mi uojotedañi q'ae'n ñe'me Jesucristo

¹ ¡Yataqachiñe eja da'me male qo'mi uojotedañi, qa'a nach'eñe ñe'me Jesucristo qo'mi yejodegue! Chane'eja ena'te oquiya'e da'me dojo' ami qoyejodegue, uotaĝa ta'le a'viyelaqaiya da'me yitaĝa ami lelataqa daa'me namaĝajoĝonaĝaco.

² Qalaĝaja 'uo da'me jetaque ami ja'aĝatema: qom ami yitaĝa auacoñiyeguet da'me nichaĝajoĝonaĝac, qama'le da'me 'lonatac ca'li ñe'me Cristo male ja ami 'te lecochiyalo.

³ Yitaĝa ji'iyelaĝatalegue ami jaqateque, queda'me gamachaqaega yaconeguet ga'me 'nanaĝajet ga'me lo'oc qama'le yitaĝa qoyepagaqatetec da'me que'teguelo ena'uaque daa'me namaĝajoĝonaĝaco.

⁴ Jogaa'me jo'ne eetedapega Dios yaconegueta queda'me que'teguelo daa'me namaĝajoĝonaĝaco, de'uotedapeguet da'me loqopich'i ñe'me Dios qama'le ja yemetede'eguet ñe'me Cristo.

⁵ Qo'mi qamqa'me, ñe'me Dios Lepaqal 'me ja 'nalegue qo'mi yayataĝade'teque da'me Dios qo'mi yaconegueta qomle, jouaĝat da'me jep'iyaqa ñe'me Cristo.

⁶ Qom joqotaĝaguet ñe'me Cristo, male ja p'ajaye da'me joote jaconaĝaguet ga'me 'nanaĝajet 'me nichaĝajoĝonaĝac uotaĝa qom ja naq'aeta. Da'me jo'ne p'ajaye ta'le jep'iyaqa ñe'me Cristo, nataq'aen da'me dojo' qadepi'iyaĝac qo'mi tauelo q'ae'n da'me qadoqopitalo jogaa'me qadaqaya'olqa.

⁷ Ami onaĝaic mañaĝa da'me adajoĝoqui: ¿jach'e ga'me nauaneguet da'me oqui'tegue da'me yataqatelegue 'naqataĝanaĝac?

⁸ Dojo' ja chiyaqayi ñe'me Dios, qa'a nach'eñe ami nepoda'tape qaedi auoqochiiya.

⁹ 'Noota qom ja auoqoleguechi da'me dojo': queda'me qom 'uo ga'me paĝaguenataĝanaĝaic 'me ja yataĝalegue qama'le 'naĝat yema ga'me napaĝaguenataĝanaĝac.

¹⁰ Qalaĝaja ja joqoleguet da'me a'uamaqachiñe ga'me yelnataĝac, qa'a qademe'teguet ñe'me Cristo. Qom 'uo ga'me ja ami 'te yalemaĝa't, qama'le ja joqoleguet da'me Dios ya'uo ne'uaĝanaguec joga'me.

¹¹ Ami yaqaya'olqa, ta'le japaĝaguenataĝatapec da'me auoviñetaque da'me auacoñiyeguet da'me nichaĝajoĝonaĝac, qama'le gaa'me yaute'upi male ja jayem 'te yecaatedac nataq'aen da'me yapaĝaguenataĝanaĝac jo'ne 'yaĝatetac da'me leleuaĝa ñe'me Cristo male ja yalemataĝanaĝa'n jogaa'me.

¹² Qama'le gaa'me jo'ne ami yeloiquiaĝa'tape, ¡'noota qom mach'egaua yema yichaĝadegue naa'me lapa'che lael!

¹³ Ami yaqaya'olqa, Dios ami yiyaĝanalo qaedi ami uojotedañi. Qalaĝaja ena'te aueñetapela't adoĝochi da'me ami uojotedañi ta'le taue q'aen da'me a'vichi ga'me ja no'en. Dite da'me anecochiyapega't qa'a 'uo da'me adoqopich'ii.

¹⁴ Qa'a onolec ga'me lamaĝajoĝonaĝac ñe'me Dios yemata'a't yema gaa'me namaĝajoĝonaĝaco: “Adoqopitalo jogaa'me adaqaya'olqa nach'e naq'aeta na'le anoqopitela't.”

¹⁵ Qalaĝaja qom mach'e ami da'me aueloiquiitapega't nataq'aen a'naĝachela't qama'le achiya'aguet ta'le yovita da'me analachiyapega't.

Da'me 'noyaĝac 'me chiyoqo'ot ñe'me Dios Lepaqal 'me ja 'nalegue

¹⁶ Qo'che' ami jaqateque da'me auoqochiiya ñe'me Dios Lepaqal qama'le ja auauoyi lamaic ga'me ja no'en ta'le a'vichi.

¹⁷ Qa'a gaa'me ja 'noe'n lamaico yataqata ja yauaĝa ga'me yepaquetapega ñe'me Dios Lepaqal, nataq'aen ñe'me Dios Lepaqal ja yauaĝalo gaa'me ja 'noe'n namaico. Chane'eja ami ja auaqanachichi ta'le auauoyi ga'me yepaquetapega da'me anejiyaĝauayaĝaqui.

¹⁸ Qalaĝaja qom auauoyi ga'me yepaquetapega ñe'me Dios Lepaqal, male ja naqaegaua gaa'me namaĝajoĝonaĝaco auajoitalo'te.

¹⁹ Qaya'te laqalaic nale qoyec'ate'n gaa'me quetapegue'to daa'me lapa'che lamaico; ja yataĝalegue da'me 'lonáĝac, 'uo ga'me lequejeguetaĝa, nataq'aen yauapiye gaa'me paĝachiguilo ja 'noe'n namanaĝanaĝaco.

²⁰ Netamenoto gaa'me qop'iya'alo 'me ja ejoda, napaĝagueta da'me 'uo ga'me napinec qaedi pi'yoĝo'n nataq'aen ja yeuote'n gaa'me laqaya'. Mach'egaua deloiquitapega't, c'alaĝanaĝayaqa nataq'aen gamachaqaega yalemataĝanaĝa'n. Mach'e niyamaĝadetapela'ajalo, nach'e eta't necotayapega't, nataq'aen jogaa'me chiyaqayilo da'me male onolqa'tape uo'oe naa'me mach'e tayapegue'galo.

²¹ Yataqachiñe p'aguenataĝanaĝayaqa jogaa'me, chayovida'a yala't gaa'me laqaya'; yacota ga'me lataĝa qama'le taĝayaqa, nale yovita ga'me nolo' da'me yauote ga'me netonaĝa'j qama'le yacota ga'me laláĝa'j na'le deualaĝai'tape, nataq'aen qayoĝode' gaa'me ja 'noe'n yauo'oe. Ami jaqatalo, naq'aeta ga'me joote ami janema ca'li, da'me gaa'me jo'ne naq'aeta ga'me yauote qama'le ja yaqanate't ta'le tadoue da'me lejaliaĝa ñe'me Dios.

²² Qalaĝaja ñe'me Lepaqal ñe'me Dios qo'mi noqopitaĝanaĝaneque jogaa'me qadaqaya'olqa, nach'e eta't jouaqataue da'me qo'mi made'tape nataq'aen jouaqataue da'me qat'emaĝac da'me jouaqa'tajopa gaa'me qadaqaya'. Qo'mi e'n ñapogaĝadenaq nataq'aen qo'mi qopitaĝanaqataqayaqa, nataq'aen nach'e eta't 'noota ga'me je'etaĝaque jogaa'me qadaqaya', jep'iyaqa ñe'me Dios.

²³ Qo'mi joĝodayaqa, nataq'aen jayatenaq da'me ñomata' gaa'me ch'e qadamaico. Qom naq'aeta da'me qat'oyaĝac, qama'le ja qoyouetaque ga'me namaĝajoĝonaĝac.

²⁴ Qama'le qo'mi da'me joote jouaqa'tot ñe'me Jesucristo joote jenaĝa yeleualegue jaga'me sodoso da'me qanejiyaĝauayaĝac loecoyaĝac nataq'aen gaa'me ja 'noe'n lamaico.

²⁵ Ta'le ñe'me Dios Lepaqal yadalaĝat da'me loec da'me qat'oyaĝac, 'noota qom yema joqochaĝa.

²⁶ 'Noota qom ja qo'mi 'te 'yoĝodenaĝayaqa, ena'te qo'mi chiyaqayilo da'me 'uo ga'me yalemataĝanaĝatac uotaĝa 'uo da'me lep'aguenataĝanaĝac ga'me qadaqaya, qom jenaĝa qadelnataĝac da'me qo'mi 'noote' ja jenaqa'am ga'me qadaqaya.