Filipenses 3 - Nuevo Testamento Toba Sombrero Negro

'Noota qom yataqata jatetonaq joñe'me Cristo

¹ Chane'eja, ami yaqaya'olqa, 'noota qom yataqata ami made'tape, yajouaĝat da'me ademii'teguet joñe'me Jaliaĝanec. Yataqata ja jouala da'me ji'iyelaĝatelegue da'me joote jediñe ca'li, qa'a qom naq'aeta da'me ja'uo qama'le yataqata ami qo'yañaqateneque.

² ¡Achiya'agueta gaa'me jiyaĝa'u jo'ne ja yataĝalo'te nale! Yataqata ja no'en da'me 'loyaĝa'j, ena'am ta'le ch'e pioĝodipi, qama'le jetaque ch'e yichaqatapiye joga'me mach'e lapa't.

³ Qa'a mach'e qo'mi jo'ne yataqata qo'mi qoye'n Dios lec'oqo'tepi. Qalaĝaja da'me dojo' ja chiyaqayi da'me ch'e qoyichaĝaye na'me qadapat, dite da'me chiyaqayi joñe'me Dios Lepaqal jo'ne qo'mi uetauelo. Naqaeñe jo'ne qo'mi yaqataĝata'ajalo qaedi 'ñonaĝataĝaye joñe'me Dios nataq'aen e'n qo'mi made'tape jouaĝat da'me jouaqa'tajop joñe'me Jesucristo.

⁴ Da'me jayem, te'me ñi'yoĝodela't jouaĝat da'me jalchi'ena jepaquetelegue ga'me jo'ne naeda'ac ga'me judiopi. Qama'le qom 'uo ga'me jiyaĝaua jo'ne jetaque naya'ac da'me dojo', ja yaqanatet ta'le jayem napacalegue.

⁵ Qa'a jayem qoyichaq ca'li yemta jauelo jaa'me ocho noloqo'ote da'me ñiyiñe, yataqata jachiyoĝogueta joga'me Israel lec'oqo'tepi, mach'e yet'alpi jodi'me c'oqo'tepi di'me Benjamín, yataqata jayem hebreo le'ec. Qama'le jalchi'ena joqocha'alo naa'me Dios lamaĝajoĝonaĝaco da'me jayem fariseo ca'li.

⁶ Ca'li yataqata jequetapegue' da'me dojo' jo'ne naeda'ac ga'me judiopi, chayovida'a da'me jecaa'tape jogaa'me p'etaqadayaqa; qama'le ta'le ga'me jiyaĝaua yiyamaĝaden ñe'me Dios jouaĝat da'me yoqocha'alo naa'me namaĝajoĝonaĝaco, da'me jayem qaya'te yepatenaĝanaĝac.

⁷ Qalaĝaja nayi, ja yitaĝa jen p'ajaye da'me dojo' jo'ne jequetapegue' ca'li, qa'a male jayaten da'me qaya'te ta'le chiyaqayi. Nach'edata da'me jequetapegue' joñe'me Cristo jo'ne napacalegue ena'uac.

⁸ Qama'le yema jo'me 'yonataĝanaĝac ca'li, yataqata jaĝañi nayi, qa'a jouaĝat da'me male yataqata jateton joñe'me Jesucristo mach'e Yejaliaĝanec, qama'le nach'ena na'me yatetonaĝanaĝac jo'ne yataqata onaĝaic. Chane'eja joote jaĝañi yema da'me 'yonataĝanaĝac ca'li, qa'a yataqata jen ja no'en, qaedi jepitaqatenac da'me male joue'tajop joñe'me Cristo

⁹ nataq'aen yataqata jeme'teguet joñe'me. Qama'le nayi da'me jayem yichoĝoden ñe'me Dios qaedi jayem yaconeguet, ja ta'le jouaĝat joda'me mach'e 'yonataĝanaĝac nale jauo'oe naa'me namaĝajoĝonaĝaco, dite da'me jouaĝat joda'me yataqata jep'iya'a joñe'me Cristo, qa'a naq'aeta jena'me jenjo' jo'ne mach'e yataqata yepaquetapega joñe'me Dios.

¹⁰ Qama'le nayi nach'edata da'me yataqata jetaque jateton ñe'me Cristo, qaedi yataqata ñauela't da'me lañoqotaĝanaĝac, nach'eda jo'ne chiyaqayi da'me nec'alijeguem ca'li joñe'me, qama'le qom 'uo ga'me yachoĝodec qomle, jetaque jena'am joñe'me ca'li yataqata qoya'uo da'me lachoĝodec, nataq'aen joda'me leleuaĝa ca'li, nach'e ena'am jetaque jena'am qomle da'me jayem,

¹¹ qa'a qom naq'aeta qama'le yataqata 'uo da'me yeuataqataĝanaĝac queda'me jayem qo'niyelaĝachijeguem jo' qomle, jachiyaqauelo jodia'me napa'lpi.

'Uo di'me qat'achaqa' jo'ne na'ague di'me piyem

¹² Ena'te aueñetapega ta'le joote joma't yema naa'me naajo', uotaĝa ta'le joote ja jayem 'te 'nalegue; ja naq'aeta, qama'le nach'edata da'me maliaĝa yataqata jeque'tague joda'me 'noota ladic qaedi yataqata jomataĝan jo' qomle, qa'a nach'eda da'me lelnataĝac joñe'me Jesucristo ca'li 'uaechiñe da'me jayem nec'alaĝategue.

¹³ Ami yaqaya'olqa, ja jeetapega ta'le joote jacona joga'me ñomataĝanaqate, qalaĝaja ja jenate'ta jogaa'me joote jauo'oe, dite da'me yataqata jenate'ta joga'me maliaĝa ja jomat da'me je'et.

¹⁴ Qama'le yataqachiñe 'ñañaĝat da'me yataqata ja jaĝañi jenjo' jelo'tegue jo'ne 'yonatac ladic, qaedi joñe'me Dios male jayem yanem joga'me ñomataĝanaqate, nach'ega jo'ne jayem yiyaĝana qaedi jona'ague di'me piyem, jouaĝat da'me yataqata jeme'teguet joñe'me Jesucristo.

¹⁵ Chane'eja yema da'me qo'mi jo'ne joote maqachaĝa t'añi joda'me qat'oyaĝac nayi da'me qo'mi p'etaqadayaqa, jetaque 'noota qom naq'aeta joga'me qadelnataĝac. Qalaĝaja qom 'uo joga'me adelnataĝaqui laqaya qama'le Dios ami yaloĝonalo qomle da'me yataqatelegue.

¹⁶ Nach'edata da'me dojo' jo'ne qoyouetaque: 'noota qom qolaqa'tegue da'me qadepe'e ladic jo'ne joote jedaqalegue.

¹⁷ Ami yaqaya'olqa, 'noota qom jayem auadenaĝachi, nataq'aen aueloyegueta jogaa'me jo'ne queteda'ague da'me 'noota ladic 'me joote ami japaĝaguenaĝaque.

¹⁸ Joote qauayac da'me ami ja'aĝatema jogaa'me jo'ne ja no'en da'me yauote nale, qalaĝaja nayi 'uo da'me ñoyenaĝac da'me ji'iyelaĝatelegue naa'me 'yaqataqa, qa'a nach'egaua gaa'me jo'ne ja yacoteguet da'me jo'ne chiyaqayi da'me leleuaĝa joñe'me Cristo ca'li qoyep'elegue jaga'me sodoso.

¹⁹ Da'me dojo' jiyaĝadipi male ta'teda di'me 'lachaqa' joñe'me payac, nach'edata da'me liqui'yaĝac jo'ne uenateteda'a, qama'le yataqata ni'yoĝodetedapiye da'me ja no'en jo'ne mach'e 'lonataĝanaĝa'j, qa'a yataqata qaya'te lepocoĝo, qama'le yemeda'a da'me ja no'en jo'ne uapi'ña jena'me aleua.

²⁰ Qalaĝaja da'me qo'mi, yataqata joote 'uo jodi'me qat'achaqa' jo'ne na'ague jodi'me piyem, qama'le yataqata jalcote da'me jeuataqataque joñe'me Qadec'alaĝaiqui da'me chiyaqaje'ma di'me piyem, nach'eñe joñe'me Qadejaliaĝanec Jesucristo.

²¹ Jena'me jenjo' qadapachiyaĝac jo'ne choĝolaĝaic male qoyapalaĝat qomle, qalaĝaja joñe'me male en nec'alijeguem jena'me jenjo' qadapat, qama'le qoyen yataqata onaĝaic, chayovida'a neleguemaĝata da'me 'loyaĝac joñe'me. Yataqata 'uo da'me lañoqotaĝanaĝac qaedi ya'uo da'me dojo', qa'a nejaliaĝatelo'te yema jogaa'me uo'oe.