1 Corintios 9 - Nuevo Testamento Toba Sombrero Negro

Da'me lañoqotaĝanaĝac joñe'me Pablo

¹ Qalaĝaja jayem uojotañi qaedi ja'uo ga'me jo'ne jepaquetapega, queda'me jayem lamaĝajec ñe'me Jesús; joote auayachiñe da'me 'uo jo'me nolo' ca'li jauana ñe'me Qadejaliaĝanec Jesús. Qama'le nach'e ami jo'ne ami jachiyoĝotayilo da'me 'yonataĝanaĝac queda'me jo'onataĝaneuo'o ñe'me Jaliaĝanec. ¿Qo'li ja naq'aeta?

² Uotaĝa uo'oe jogaa'me ja jayem 'te 'yamaqate'n da'me jayem lamaĝajec ñe'me Jesús; ami qamqa'me jayem auacoñiyeguet, qa'a da'me at'oyaĝaqui dalaĝaic nach'eda yaloĝon queda'me jayem lamaĝajec ñe'me Jesús.

³ Chane'eja ja'ategueta nayi gaa'me jo'ne ja jayem 'te 'yamaqatetedac.

⁴ Qo'mi jo'ne mach'e lamaĝa's ñe'me Jesús yataqachiñe 'noota ta'le qo'mi auañema ga'me jaliguinaq nataq'aen ga'me ñiyomaĝaye.

⁵ Nataq'aen chimaqachiñe ta'le ñaigaqatapegue'to gaa'me qadoua' nale jeuoqotac, nach'e naq'aeta nale da'me ya'uo ñe'me Pedro nataq'aen jogaa'me laqayadejoda ñe'me Jaliaĝanec nataq'aen jogaa'me mach'e lamaĝa's.

⁶ Uotaĝa, ¿qo'li jayem nataq'aen Bernabé nach'e qo'mite' da'me ja chimaqachiñe ta'le qo'mi yanema ga'me jouenaqataque joga'me p'etaqadaiquipi, nach'e naq'aeta jogaa'me jiyaĝa'u laqaya'?

⁷ Qa'a qaya'te nalada't lo'o ta'le mach'ega nejetela't qom yec'ata ga'me nalataĝac, nataq'aen qaya'te naĝanaĝaic ta'le ja yalic ga'me jala joga'me lanec, nataq'aen qaya'te neteloqo'te jaga'me quetaĝapi ta'le ja niyomigui jaga'me lochi' jo'ne chiyaqayi jogaa'me.

⁸ Naajo' uo'oe jo'ne ami ja'aĝatetapema ja jaldata ta'le ch'e jiyaĝaua 'laqataqa, dite da'me nach'e ena'am 'yaĝa'tape naa'me nedii's jo'ne lamaĝajoĝonaĝaco ñe'me Dios.

⁹ Qa'a queda'me Moisés naq'aeta da'me yediñe, ca'li yedidiñe daa'me lamaĝajoĝonaĝaco ñe'me Dios, 'me enaac: “Ena'te auojomoue limic necoñetaĝaiqui ga'me uaca qom auapiaĝalegue ga'me trigo nale aviyota'a ga'me lo'oc.” Qalaĝaja ca'li enaac da'me dojo' ñe'me Dios ja naqaeda lelnataĝac ta'le netela'alo joga'me uacapi,

¹⁰ dite da'me naqaqo'mi uenate'talo. Tade'to' qoyediñe da'me namaĝajoĝonaĝac joca'li qa'a jouaĝat qo'mi. Chane'eja ga'me jo'ne yolaĝat jena'me aleua, 'noota ta'le 'uo da'me leuataqataĝanaĝac da'me ua'ajop lae ga'me chiyaqayi da'me 'lonataĝanaĝac, nach'e naq'aeta ga'me yiyota'a ga'me trigo lo'oc, 'noota ta'le nach'e ena'am 'uo da'me leuataqataĝanaĝac.

¹¹ Chane'eja, qom naqaqo'mi da'me janaĝaiñe da'me 'laqataĝanaĝac ñe'me Dios ca'li ami jouaqa'tajopa, ¿qo'li ja chimaqachiñe da'me jaconaĝaguet qomle ga'me lae da'me adaqataĝanaĝaqui?

¹² Qom uo'oe gaa'me laqaya' jo'ne chimaqachiñe da'me yacoteguet da'me adecochaĝaqui, da'me qo'mi ¿qo'li ja p'ajaye chimaqachiñe? Qalaĝaja, ja ami 'te joñiyaqa'toto, dite da'me yema ñapogaĝadenaĝaguet qaedi ja jaqalanaqapiye't da'me ja'aĝataqatac joda'me 'naqataĝanaĝac jo'ne 'yaĝatetac ñe'me Cristo.

Joda'me chiyaqayi da'me ni'yoĝodela't ñe'me Pablo

¹³ Nataq'aen gaa'me jo'ne t'onataĝadoue ga'me tamenaĝaiqui, ga'me yali'j nale joga'me auayachiñe queda'me nach'ega ga'me tamenaĝaiqui chiyaqaue; nach'e naq'aeta nale gaa'me jo'ne yachedalegue ga'me c'atoĝonaĝala' ga'me najaqajec, jogaa'me yali'j nale ga'me lapat 'me qoyiyota'ya.

¹⁴ Nach'e naq'aeta da'me damaĝajoĝolegue ñe'me Jaliaĝanec, qaedi gaa'me jo'ne 'yaĝatetedac da'me onaĝaic 'naqataĝanaĝac qoyanema nale ga'me jo'ne youetedaque.

¹⁵ Qalaĝaja, jayem qamqa'me ja naqaeda ta'le jepitaqatenac qaedi yachiyoĝotayi yema da'me dojo' yajo'viyaĝac, qama'le nayi da'me yelnataĝac ja ami 'te jedaĝanalo qaedi 'uo ga'me jayem auañem. Qama'le nach'eda naq'aeta da'me male qodoĝotaĝanec ga'me chiyaqayi da'me ji'yoĝodetac, ja jajeta da'me dojo'. ¡Jepaquetaĝa ta'le jeleu!

¹⁶ Da'me chiyaqayi da'me ji'yoĝodetac ja jaldata da'me ja'aĝatetac da'me onaĝaic 'naqataĝanaĝac, qa'a jayem qoyamaĝalegue qaedi je'et; chane'eja ¡degueja da'me yachoĝodec ta'le ja je'et!

¹⁷ Qom da'me dojo' je'et chiyaqayi da'me mach'e yelnataĝac, chane'eja 'uo ga'me ñejetenaguec; qalaĝaja eja queda'me ja naq'aeta da'me yelnataĝac joca'li, qama'le je'et qa'a Dios jayem 'yelopec.

¹⁸ Chane'eja, qom naq'aeta qama'le da'me jayem machiñe q'aen chiyaqayi da'me ja jepaquetapega ta'le jayem qoyejeten da'me japaĝaguenataĝan, qaedi da'me onaĝaic 'naqataĝanaĝac qaya'te lajo'vi da'me qoyaconeguet. Qo'che' ja jepitaqatenac mate mane'e chimaqachiñe ta'le jayem qoyanem ga'me jouetaque.

¹⁹ Mate mane'e ja jayem 'te lelatac gamachaqaega, qalaĝaja jayem je'etec da'me 'yoyaĝac da'me ena'am ta'le ena'uaque ami jayem adelataqui, qaedi da'me yomataĝanaĝac jen p'etaqadaiquipi ga'me jiyaĝadipi.

²⁰ Ca'li jouetauelo ga'me judiopi, qama'le da'me 'yoyaĝac jene'tem ga'me judío le'ec, qaedi ga'me judiopi nach'egaua yomataĝanaqa'te; jogaa'me equeguelo gaa'me namaĝajoĝonaĝaco jo'ne chiyoĝogueta di'me Moisés, chane'eja jayem nach'e ena'am joqocha'alo, mate mane'e ja jayem 'te qopaquetapegue', qaedi gaa'me jo'ne yoqocha'alo naajo' namaĝajoĝonaĝaco nach'egaua yomataĝanaqa'te.

²¹ Nataq'aen nale jouetauelo gaa'me jo'ne ja que'teguelo daa'me lamaĝajoĝonaĝaco ñe'me Dios, da'me 'yoyaĝac naqaeda ta'le jena'ama jogaa'me, mate mane'e ja jeca'ae gaa'me lamaĝajoĝonaĝaco ñe'me Dios, dite da'me jauo'oe daa'me lamaĝajoĝonaĝaco ñe'me Cristo, qaedi gaa'me jo'ne ja equeguelo daa'me lamaĝajoĝonaĝaco ñe'me Dios nach'egaua yomataĝanaqa'te.

²² Nataq'aen nale jouetauelo gaa'me jo'ne ja 'uañaĝaic da'me lepe'e', da'me 'yoyaĝac je'etem ta'le ena'ama jogaa'me, qaedi jogaa'me nach'egaua yomataĝanaqa'te. Chane'eja da'me 'yoyaĝac je'etem da'me yema jena'am, qaedi yema jachiyoĝotayi q'aen da'me uo'oe gaa'me ñec'alaĝatedegue.

²³ Ena'uaque gaa'me jauo'oe, ja'uo qaedi qoyelagaĝategue da'me qo'yaĝatetac da'me onaĝaic 'naqataĝanaĝac, qa'a jetaque nach'e ena'am ñapeteguet joga'me.

²⁴ Ami yataqachiñe auayachiñe nale 'uo ga'me noqomida'at, uo'oe gaa'me naqalego' nale, qalaĝaja onolec ga'me mataĝanaĝaic. Chane'eja, ami nataq'aen 'noota qom anaqalegoqoi qaedi naq'aeta da'me auomataĝañi.

²⁵ Nataq'aen yema ga'me qomitaĝaiquipi jalcote da'me qoyapaĝague'n qaedi naqachiñe ga'me lomataĝanaĝat jo'ne ch'e epaq layoqote 'me paja'a daqaqa; qo'mi qamqa'me ñapaĝaguenaĝala't qaedi ñaqatajoĝoñi ga'me qadomataĝanaĝat jo'ne ja yitaĝa pal.

²⁶ Qo'che' jayem, ena'am ta'le ñaqalegoqot'a ga'me loiquiaqa' da'me qomitaĝac, nataq'aen da'me yeloiquiaĝac 'noota, ja je'uaĝatapeguet ga'me layat.

²⁷ Chane'eja ja'uo lachoĝodec da'me ch'e ñejiyaĝauayaĝac loec nataq'aen ñomat, qaedi ja yijamaĝajaye da'me japaĝague'n gaa'me jiyaĝa'u laqaya', ta'le ja jayem 'te qoyapeteneuo.