Yesaya 25 - Tonga Bible 1986

Sumu ya chipozomosko

¹ Ambuya mwe, ndimwe Chiuta wangu; ndikakuzganga imwe, ndikarumbanga zina linu, pakuti imwe mwachita vinthu vya kuziziswa, vyakwata vyamwaka, vyamagomekezgeka ndi vyauneneska.

² Pakuti muzi mwauchita chiza, msumba wa malinga waŵa phasulu; nyumba ya ufumu ya ŵalendo sono ndi muzi so cha, kuti ukazengekanga so cha.

³ Chifukwa ichi ŵanthu vilimbi ŵakakankhuskanga imwe; misumba ya mitundu ya nkhaza yopenge imwe.

⁴ Pakuti imwe mwaŵa linga la ŵasauchi, linga la mukavu musuzgu yake, musasa waku lirondo ndi muduzi ku chifundizi; pakuti kuphwanya kwa ŵankhaza kwe nge nkhuputa kwa lirondo pa linga,

⁵ uli nchifundizi mu malo ghayumu. Imwe muthereska chiwawa cha ŵalendo, uli nchifundizi ku muduzi wa mtambo, viyo sumu ya wankhaza yikanizgika.

⁶ Pa phiri lenili Ambuya ŵa maŵanja akachitiyanga ŵanthu wose dghera la vyakututuŵa, dghera la vinyo wapa visika, la vinthu vyakututuŵa vya mafuta ghakubwituka, la vinyo pa visika vyakukung'untha umampha.

⁷ Ndipo pa phiri lenili akabwanganduwanga chakuvunikiliya cho chikupong'eka pa ŵanthu wose, chivwinkhu cho chikutandikika, pa mitundu yose.

⁸ Akameziyanga limu nyifwa muyaya, ndipo Ambuya Chiuta wakaleskanga masozi ku visku vyose, ndipo soni ya ŵanthu ŵake wakatuzgangamo mu charu chose chapasi; pakuti Ambuya ndiwo akamba.

⁹ Kukanenekanga mu zuŵa leniliya, “Ehe, uyu ndi Chiuta widu, tamulindizganga, mwakuti watitaske, Yaŵa mba Mbuya; taŵalindizganga, tiyeni tikondwe ndi kusekere muutaksi wawo.”

¹⁰ Pakuti janja la Ambuya likapumuwanga pa phiri ili, ndipo Moabu wakapwatikiyanga pasi mu malo ghake, uli ndimo uteka upwatikiya pasi mu zenje la ndowa.

¹¹ Ndipo wakatambaruwanga manja ghake mukati mwake uli ndimo wakasambira pa maji watambaruliya manja ghake pakusambira, kweni Ambuya akasiskiyanga pasi kujikuzga kwake pamoza ndi upusu wa manja ghake.

¹² Ndipo utali wa vimati vya malinga ghake akasiskiyanga pasi, kuŵa vifupi, kuvipong'a pasi, ndi ku fuvu viyo.