Jobu 26 - Tonga Bible 1986

Jobu wasuska Bilidadi kuti wengavi kumovya, kweni iyo wangugomezga Ambuya

¹ Ndipo Jobu wangwamuka, wanguti:

² “Kumbi wamovya uli yo walivi nthazi! Ukulitaska uli janja lakutomboroka!

³ Kumbi ndi fundu uli yo wapaska kumunthu yo walivi zeru! Ndi kumwanduliya umamphavi vinjeru vyamampha!

⁴ Ndi chovyo chakuyani wakambiya mazu, ndipo ndi mzimu wakuyani mu kakambidu kako?

⁵ Wakufwa wanjenjeme pasi pa charu, maji ndi vyose vyakuja mwenimo.

⁶ Muunda we mwazi pa maso paku Chiuta, pharghang'iko lilivi chibenekere.

⁷ Watambasuwa ku nkhonde pachanya pa malo ghambura kanthu, ndi waning'ina charu pa waka.

⁸ Wamanga maji pamoza mu mitambo yake yakukho, ndipo mitambo kuti yiziŵa kukerurika ndi gho cha.

⁹ Wabenekere chisku cha mwezi, ndipo watandika paku wo mtambo wake.

¹⁰ Wazingirizga maji ndi zimphaka, pa mphatukano pa ukweru ndi mdima.

¹¹ Mizati yamu machanya yimbwambwantha, ndi yizizwa ndi machenyu ghake.

¹² Ndi nthazi zake wakugaŵa nyanja, ndi vinjeru vyake wangukoso ŵakujikuzga;

¹³ ndi mzimu wake machanya ghanguchitika ghakutowa janja lake linguswa njoka yakunyongoroka yamu nyanja.

¹⁴ Wonani, ivi ndi vigaŵa vimanavimana, vya nthowa zake; ndipo ehe, vyo tituvwa vimana ukongwa! Kweni kugunda kwa nthazi zake ndiyani wangawamo?”