Jobu 14 - Tonga Bible 1986

¹ “Munthu wakupapika ndi munthukazi mazuŵa ghake ngamanavi gheni, wakuzazika ndi visuzgu.

² Watuwa nge ndi luŵa, ndi wafota; wachimbiya nge nchiduduzi, kuti walutiriya cha,

³ kumbi mujura maso ghinu ndi kumulereska munthu wa viyo, ndi kumutole kukweruzgika ndi imwe?

⁴ Ndiyani wangato chinthu chakutowa mukati mu chinthu chakufipa? Palivi nanga njumoza.

⁵ Pakuti mazuŵa ghake ngakugota, ndi unandi wa mazuŵa ghake we ndi imwe ndipo ndimwe mwamika chigoti chake kuti wareke kujumpha,

⁶ rekani kumulereska, mwakuti wakondwere zuŵa lake limoza, nge ngwanchitu wakulipirika.

⁷ “Chifukwa chilipo chigomezgu chachimuti, kuti chingana chatemeke pasi chikabukanga so, ndi kuti mphanda zake kuti zikamiranga cha.

⁸ Chingana msisi wake ungakota mu dongo ndi chisana chake chimire pasi,

⁹ ndipuuli pa mununkhu wa mutika chikabukanga ndi kume mphanda nge ndi muti uteta.

¹⁰ Kweni munthu watufwa pa wawonda ukongwa, watuta kwakumariya, ndipo wepani?

¹¹ Nge ndimo maji gha mu nyanja ghaphwiya ndi msinji utuphwa ndi kukamuka,

¹² viyo munthu wagona pasi ndipo kuti wayuka so cha; mpaka penipo mitambo yikaŵangapo so cha, iyo kuti wakayukanga cha, pamwenga kuyuskika mutulo twake.

¹³ Okwe, mphanyi mwandibisa mumuunda mundisunge ku ubende mpaka ujumphe ukari winu, mundimikiye nyengo yakutemeka kuti mundikumbuke.

¹⁴ Asani munthu wafwa, kumbi wakaŵanga so wamoyo? Mphanyi ndarindizga mazuŵa ghose gha uteŵeti wangu, mpaka kuzi kufwatulika kwangu.

¹⁵ Mphanyi mungudana, nditinge ndimumukeninge, mwatinge mukhumbe nchitu ya manja ghinu.

¹⁶ Viyo ndipo mwatinge muŵerengenge michapo yangu, kuti mwatinge mulereske pa uheni wangu cha,

¹⁷ mamphuru ghangu ghatinge ghasoneke mukati mu thumba, ndipo kuti mwatinge muvunikiriye uheni wangu cha.

¹⁸ “Kweni mapiri ghatuwa ndi kumara, ndi jarawi lituzgikapo pa malo ghake;

¹⁹ maji ghasusuntha mya; maji ghakwenda kwanthazi ghasukuluwa nyata ya charu, viyo muparghang'a chigomezgu cha munthu.

²⁰ Mazuŵa ghose mutimuruska, ndi waruta, musintha kawonekedu kake ndi muti mutuma kutali.

²¹ Ŵana ŵake ŵatuza ku ulemu kweni iyo kuti waziŵa cha, ŵasiskikiya pasi, kweni iyo kuti watichiwona cha.

²² Watuvwa kuŵaŵa kwaliŵavu lakepe, ndipo wajaliriya yija.”