Mataio 23 - Tokelauan New Testament

Kua Fakailoa e Iehu te Hehē o nā Faiakoga o te Tūlāfono ma te kau Falehaio

¹ Oi lea atu ai ia Iehu ki te kaifenua ma nā hoko o ia.

² “Ko nā faiakoga o te Tūlāfono ma te kau Falehaio, ni tino kua mālamalama i te Tūlāfono a Mohe.

³ Ko koutou la e tatau ke fakalogo ma mulimuli ki nā mea uma e lea atu ai ki lātou ke koutou faia; kae ia koutou lele nā fakatakitaki ki a lātou mea e fai, auā e hē fakatinoa e ki lātou a lātou kupu e tautatala ai.

⁴ E tanoa e ki lātou nā kavega mamafa ma amo gatā ki nā tua o tagata, oi kae e hē fia fehoahoani lele ki te amoga o nā kavega iēnā.

⁵ Ko a lātou mea uma e fai kae ke kitea ai ki lātou e tagata. Kikila ki te fuaefa o nā taga ei loto ai nā fuaikupu mai nā tuhituhiga paia e tanoa ki o lātou muāulu ma o lātou lima, vēnā ma te loloa o nā mea e fakapipiki ki nā pito o nā kofutatao, ke fakailoa ai ko ki lātou e fakatuatua ki te Atua!

⁶ E fiafia oi nonofo i nā nofoa tāua i nā kaiga lalahi ma tāofi mo ki lātou nā nofoa fakapitoa i loto o nā hūnako;

⁷ e fofou foki ke fakafeiloaki aloakia ake ki lātou e tagata i nā māketi, ma ke takua ki lātou ni ‘Faiakoga.’

⁸ Kae ko koutou e hē takua lele ni ‘Faiakoga,’ auā e tutuha uma koutou, ma e fokotahi oioti lava te koutou Faiakoga.

⁹ Ia koutou foki nahe lea lele ki he tino i te lalolagi nei ‘Te Tamana,’ auā e fokotahi oioti lava te koutou Tamana i te lagi.

¹⁰ Ke vēnā foki ona hē takua lele koutou ni ‘Takitaki,’ auā e fokotahi oioti lava te koutou takitaki ko te Mehia.

¹¹ Ko te tino e hili te tāua ia te koutou, e tatau ke fai ia ma autou kaukauna.

¹² Ko ai lava e loto fakamaualuga ka fakamaulalogia, ka ko ai lava e lotomaulalo, ka fakaeke ki luga ma kavea ma tino takutakua.

Ko te Fakagutugutulua o nā Faiakoga o te Tūlāfono ma te kau Falehaio

^13-14 “Kae hāloa la koutou nā faiakoga o te Tūlāfono ma te kau Falehaio! Ko koutou ni tino fakagutugutulua. E koutou tapunia te faitotoka ki te Mālō o te lagi ki tagata, ka ko koutou e hē mafai ke olo ki loto, ma e hē koutou fakataga foki nā tino e taumafai ke olo ki loto.

¹⁵ “Kae hāloa la koutou faiakoga o te Tūlāfono ma te kau Falehaio! Ko koutou ni tagata fakagutugutulua. E faimalaga koutou i luga o te moana ki te lahi o atunuku, ke koutou maua he tino e fokotahi ke fakaliliu ki te koutou talitonuga; kae kāfai e maua e koutou, ko autou akoakoga ka fakaluaina ai te faigōfie oi fano te tino tēnā ki kēna, e vē foki lava ko koutou.

¹⁶ “Kae hāloa la koutou nā takitaki tāuaho! E akoako e koutou vēia, ‘kāfai he tino e tautō i te igoa o te Mālumalu, e hē fuhifuhia i tana tautōga; kae kāfai e tautō i te igoa o nā aulo i loto o te Mālumalu, e fuhifuhia.’

¹⁷ Koutou tagata vālelea ma te tāuaho. Ko he ā te hili atu te tāua, ko nā aulo pe ko te Mālumalu e fakapaiagia ai nā aulo?

¹⁸ E akoako foki e koutou vēia, ‘Kāfai he tino e tautō i te igoa o te fata faitāulaga, e hē fuhifuhia i tana tautōga; kae kāfai e tautō i te igoa o te meaalofa i luga o te fata faitāulaga, e fuhifuhia.’

¹⁹ Kai te tāuaho ātili o koutou! Ko he ā te hili atu te tāua, ko te meaalofa pe ko te fata faitāulaga e fakapaiagia ai te meaalofa?

²⁰ Ko te mea ia, kāfai he tino e tautō i te igoa o te fata faitāulaga, e aofia ai lava ma nā meaalofa uma i luga;

²¹ ma kāfai he tino e tautō i te igoa o te Mālumalu, e aofia ai ma te Atua, e nofo i kinā;

²² ma kāfai he tino e tautō i te igoa o te lagi, e tautō ia i te igoa o te nofoāliki o te Atua, ma tē e tiketike ai.

²³ “Kae hāloa la koutou nā faiakoga o te Tūlāfono ma te kau Falehaio. Ko koutou ni tagata fakagutugutulua. E fōki e koutou mo te Atua te tahi vaehefulu o nā mea fakamanogi meakai e vē ko te mineti, te tili ma te kumini, kae kua hē mulimuli koutou ki nā akoakoga tāua o te Tūlāfono, vē ko te fakatutuha o tagata uma i te tūlāfono, te agalelei ma te fakamāoni. Ko nā mea iēnei e tatau ke fai e koutou, kae hē tiakia ai iētahi mea.

²⁴ Koutou nā takitaki tāuaho! E fakamamā kehe e koutou he lago mai autou vai inu, kae e folo e koutou he kāmela e aunoa ma te koutou iloagia!

²⁵ “Kae hāloa la koutou nā faiakoga o te Tūlāfono ma te kau Falehaio! Ko koutou ni tagata fakagutugutulua. E fufulu e koutou ia fafo o autou iputi ma autou ipukai, kae ko loto e tumu i nā mea na koutou maua i te tuinanau ma te mānumanu.

²⁶ Koutou nā Falehaio tāuaho! Fufulu muamua ia loto o autou iputi ma autou ipukai, oi ka mamā ai foki ma fafo!

²⁷ “Kae hāloa la koutou nā faiakoga o te Tūlāfono ma te kau Falehaio! Ko koutou ni tagata fakagutugutulua! Ko koutou e vēia ko nā tugamau kua vali paepae, e manaia mai ia fafo ka ko loto e tumu i te pogāivi ma nā tino oti kua pala.

²⁸ E vēnā foki lava te kikila atu ki a te koutou i fafo, e āmiotonu i te kikilaga a tagata, ka ko loto e tumu i te fakagutugutulua ma te agahala.

²⁹ “Kae hāloa la koutou nā faiakoga o te Tūlāfono ma te kau Falehaio! Ko koutou ni tagata fakagutugutulua! E fau e koutou nā tugamau mānanaia mo nā pelofeta ma teuteu nā mea ke fakamanatu ai ki lātou nae ola āmiotonu;

³⁰ ma lea vē koutou, ‘Anei ki mātou na ola ake i nā aho o ō mātou tupuna, e hēki kau fakatahi ki mātou ma ki lātou i te tāmatega o nā pelofeta.’

³¹ Ma kua takutino lava e koutou, ko koutou ni lāpuna e o nā tino na tāmate e ki lātou nā pelofeta!

³² He ā la te koi fakatali ai koutou, fai fakauma nā mea na kāmata e o koutou tupuna!

³³ Koutou nā gata ma fānau a gata! E vēhea nei ona fakahao koutou mai te afi o kēna.

³⁴ Ko te mea ia, ka kō uga atua ki a te koutou nā pelofeta ma nā tino popoto ma nā faiakoga; ka koutou tāmatea iētahi o ki lātou, ka fakahātaulo iētahi, ma kini iētahi i loto o nā hūnako ma tuli mai tētahi kakai ki tētahi kakai.

³⁵ Ona ko te mea tēnei, ka pakū atu ai ki o koutou luga te fakahalaga mo te fakamaligiga o te toto o nā tino āmiotonu i te lalolagi, mai te toto o Apelu e aunoa ma hana hala ki te toto o Hakalia te ataliki o Palakia, na koutou tāmatea i te va o te fata faitāulaga ma te Nofoaga Paia i loto o te Mālumalu.

³⁶ E takutino atu e au ki a te koutou: ko te fakahalaga mo nā tāmate tino uma iēnei, ka pakū lava ki luga o nā tino o nā aho nei!

Ko te Alofa o Iehu mo Ieluhalema

³⁷ “Ieluhalema, Ieluhalema! Kua tāmate e koe nā pelofeta ma fetogi nā kavefekau kua uga atu e te Atua ki a te koe! E lahi lele nā taimi na fia ōpoipoi mai ai i oku lima au fānau, e vē oi fakamāopoopo mai e te kaumatua moa tana ōfaga ki lalo o ona kapahau, kae ko koutou e mumuhu!

³⁸ Ma ko te mea ia ka tīaki ai te Mālumalu o koe ma hē toe i ei ni tino e olo ki loto.

³⁹ Auā e lea atu au ki a te koe, e kāmata atu nei, ka hē toe kē kiteagia au, heiloga kua pa ki te taimi e lea vē ai koe, ‘Ke fakamanuia e te Atua tē e hau i te igoa o te Aliki’ ”