Gāluega 9 - Tokelauan New Testament

Kua Liliu ia Haulo ma Talitonu ki a Iehu

¹ I te taimi tēnā, koi fai lava ia hāuāga a Haulo ma fakamataku e ia i te oti, nā tino kua talitonu ki te Aliki. Kua fano ki te Ulu Ohitāulaga

² ma lea ki ei mo ni tuhi ke fakailoa atu ai ia ki nā hūnako i Tamaheko, kae ke ia pukea ai ho he tino e i loto o te maopoopoga e takua ko te Ala o te Aliki i kinā, ko taulelea ma fafine, ma fakafoki ki Ieluhalema.

³ Ka koi faimalaga ia Haulo i tona auala ki te kakai ko Tamaheko ma kua tafapili atu ki ei, kae nā lava e teki ko he mālamalama mai te lagi kua huhulu fakatakamilo ia te ia.

⁴ Na pakū ia Haulo ki lalo ma na ia lagona atu ai he leo e lea vē ake ki a te ia, “Haulo, Haulo! He ā te kua fakahāuā mai ai koe ki a te au?”

⁵ Kua fehili atu ia Haulo, “Te Aliki, ko ai koe?” Kua tali mai te leo, “Ko au ko Iehu tē kua fakahāuā koe ki ei.

⁶ Kae tū ki luga oi fano ki te kakai, ko kinā ka taku atu ai ki a te koe tau mea e tatau ke fai.”

⁷ Ko nā tamāloa nae malaga fakatahi ma Haulo kua tutū ma kua hēai he tino e vaivaia; na ki lātou lagona te leo kae e hēki ki lātou kitea he tino.

⁸ Kua tū ake ia Haulo ki luga, kua pupula ona mata kae kua hē ia kitea he mea. Oi takitaki ai e ki lātou i te lima ki Tamaheko.

⁹ E tolu ia aho na hē mafai ai ke ia kitea he mea, oi e hēki kai foki pe inu i te taimi tēnā.

¹⁰ Nae i Tamaheko he tino kua talitonu ki te Aliki e igoa ki a Anania. Na ia kitea he fakaaliga na vāgana vē ake ai te Aliki ki a te ia, “Anania!” Kua tali atu ia, “Te Aliki, ko au tēnei.”

¹¹ Kua vāgana atu te Aliki ki ei, “Hāuni oi fano ki te auala e igoa ko te Auala Hako, ma i te fale o Iuta, lea ki ei ko koe e fia feiloaki ki he taulealea mai Taheha e igoa ki a Haulo. Ko te taulealea e tatalo,

¹² ma i he fakaaliga, na ia kitea ai he tino e igoa ki a Anania kua ulu ake ma fakauta ona lima ki ona luga, kae ke mafai ai ke toe kikila ona mata.”

¹³ Kua tali atu ia Anania, “Te Aliki, e tokalahi nā tino kua lea mai ki a te au e uiga ki te tagata tēnei ma ana fakahāuāga ki ō tagata i Ieluhalema.

¹⁴ Ma kua hau ki Tamaheko ma te pule mai nā ohitāulaga hili, ke puke fakapagotā ai ki lātou uma e tāpuaki atu ki a te koe.”

¹⁵ Oi vāgana atu ai te Aliki ki ei, “Fano, auā kua kō filifilia te tagata tēnā ke kaukauna mai ki a te au, ma ke ia fakailoa atua toku igoa ki tagata nukukehe ma tupu, ma ki tagata Ihalaelu.

¹⁶ Ma ka kō fakahinoa ki ei te lahi o nā puapuagā ka pa ia ki ei, ona ka ia fakailoagia toku igoa ki tagata.”

¹⁷ Oi fano ai loa ia Anania, kua ulu atu ki te fale nae i ei ia Haulo, ma fakaeke ona lima ki luga o Haulo ma lea vē atu ki ei, “Haulo toku taina, ko au kua uga mai e te Aliki ko Iehu. Ko ia te na fakaali atu ki a te koe i te auala ka kua tāli pa mai koe ki kinei. Na ia uga maia au kae ke mafai ke toe kikila ō mata ma ke fakatumugia koe i te Agaga Paia.”

¹⁸ I te taimi lava tēnā na malili ifo ai nā mea e vē ni unafi i nā mata o Haulo, ma toe mafai ai ke kitea e ona mata. Na tū loa ki luga ia Haulo ma na papatihogia ai;

¹⁹ ma i te umaga o te kai oi toe maua ai e ia te mālohi. Na nofo ia Haulo mo ni nai aho i Tamaheko fakatahi ma nā tino kua talitonu.

Kua Folafola te Tala Lelei e Haulo i Tamaheko

²⁰ Ma i loto o nā hūnako, na folafola atu e ia ki tagata, ko Iehu ko te Ataliki o te Atua.

²¹ Ko nā tino uma na ki lātou lagona ia Haulo, na ōfo lele ma fakatau fehili vē, “E hē ko te tagata tēnei te nae ia tāmatea nā tino nae tāpuaki ki te tino e igoa ko Iehu i Ieluhalema? E hē ko te māfuaaga ia na hau ai ki kinei, ke puke fakapagotā nā tino iēnei ma kave ki te kau ohitāulaga hili?”

²² Kae kua ātili ai te mālohi o te faiga o te tālakiga a Haulo, ma ko te mautū o nā fakamāoniga a ia ko Iehu ko te Mehia, kua hē mau tali ai ki ei nā tino Iutaia nae nonofo i Tamaheko.

²³ Kua teka atu nā aho e lahi, oi maopoopo fakatahi ai nā tino Iutaia ma tau pulepule ke tāmate ia Haulo;

²⁴ kae na iloa e Haulo a lātou tau pulepulega iēnei. Nae tautuku e ki lātou nā faitotoka o te kakai i te ao ma te pō, ke ki lātou maua ia Haulo ke tāmate.

²⁵ Kae i tētahi pō, na kave ai ia Haulo e tana vāega ma tukutuku ifo ki lalo i loto o he polapola, mai he pu i te pa puipui o te kakai.

Kua Toe foki ia Haulo ki Ieluhalema

²⁶ I te pa atuga o Haulo ki Ieluhalema, oi taumafai ai ke fano ki loto o te maopoopoga a nā hoko o Iehu. Kae e hēki talitonu ki lātou ko Haulo kua kavea ma hoko, ma nae mātataku uma ki lātou ia te ia.

²⁷ Kae na fehoahoani ia Panapa ki a Haulo, ma na ia kavea ke feiloaki ma te kau apohitolo. Na fakamālamalama e ia ki a te ki lātou te kiteaga e Haulo o te Aliki i luga o te auala, ma te tautalaga o te Aliki ki ei. Na ia takua foki ki a te ki lātou te hē mataku o Haulo oi tālaki i te igoa o Iehu, ki tagata i Tamaheko.

²⁸ Ma na nofo ai loa ia Haulo fakatahi ma ki lātou, ma na olo ki itū uma o Ieluhalema ma tālaki atu ma te hē mātataku, i te igoa o te Aliki.

²⁹ Na ia folafola foki e uiga ki a Iehu Keliho ki nā tino Eleni e tautatala i te gagana Iutaia ma nae fai a lātou fefīnauakiga, kae na taumafai lava ki lātou ke tāmate ia Haulo.

³⁰ I te iloaga o te mea tēnei e nā tino kua talitonu, oi kave ai e ki lātou ia Haulo ki Kaihaleia, ma uga ai ke fano ki Taheha.

³¹ Ma ko te mea ia na hēki toe maua ai te Ekalehia i Iutea, Kalilaia ma Hāmālia kātoa i ni fakahāuāga. Na tuputupu pea te tokalahi o tagata o te Ekalehia ma ola mātataku i te Aliki, e ala i te fehoahoani o te Agaga Paia.

Kua Fano ia Petelu ki Lūtā ma Iopa

³² Ko Petelu nae femalagaaki ki ho he kakai, ma i tētahi taimi na fano ai oi āhi ia tagata o te Atua nae nonofo i Lūtā.

³³ I kinā na fetaui ai ma he tino e igoa ki a Ainea, he tino nae mate ni vāega o tona tino ma kua kātoa te valu tauhaga e hē mafai ke fano kehe mai tona moega.

³⁴ Oi lea vē atu ai ki ei ia Petelu, “Ainea, ko koe ka fakamālōlō e Iehu Keliho i te taimi nei. Tū ki luga oi fefetu tō moega.” Ko te taimi lava tēnā na tū ai ki luga ia Ainea kua mālohi.

³⁵ Ko nā tino uma nae nonofo i Lūtā ma Halona na ki lātou kitea ia Petelu, na liliu ma na talitonu ki te Aliki.

³⁶ I Iopa, nae i ei he fafine kua talitonu ki te Aliki e igoa ki a Tapita. (Ko Toka i te gagana Eleni, ma ko tona uiga “he aila”.) Nae fakafano tona taimi uma i te faiga o nā gāluega lelei ma fehoahoani ki tagata mātitiva.

³⁷ I te vāitaimi tēnā na maua i he tauale, ma na oti ai lava. Na fakatākele tona tino oi fakatakoto ai i he potu i te falealuga.

³⁸ Ko Iopa e hē mamao lahi te va ma Lūtā, ma i te lagonaga e nā tino kua talitonu i Iopa ko Petelu e i Lūtā, oi uga ai e ki lātou ni taulelea e toka lua ki ei ma he fekau e vēnei, “Fakamolemole ko, hau fakavave ki kinei.”

³⁹ Na hāuni ai loa ia Petelu ma na olo ai ma ki lāua. Na pa atu lava ia Petelu oi kave ai e ki lātou ki te potu i te falealuga. I kinā na hiko fakatāmilo ai ia e fafine uma kua feoti a lātou tāne; e faitatagi lava ma fakahino ki ei nā kofutino ma nā kofutatao na hui e Toka ka koi ola ai.

⁴⁰ Kua uga e Petelu ia tagata uma ki fafo o te potu, ma tōtuli ai ki lalo ma tatalo; oi māfuli atu ai ki te tinooti ma lea vē atu ki ei, “Tapita, tū ki luga!” Na pupula loa ia mata o te fafine, ma i te ia kitea atuga o Petelu, oi nofo ai ki luga.

⁴¹ Kua papae atu ia Petelu oi fehoahoani ki ei ke tū ki luga. Oi kalaga ai ki nā tino kua talitonu ki a Iehu fakatahi ma fafine kua feoti a lātou tāne, ma ia tuku atua ai ki a te ki lātou te fafine kua toe ola mai.

⁴² Kua halalau te tala tēnei i Iopa kātoa, ma e tokalahi ia tagata na talitonu ki te Aliki.

⁴³ Na nofo ia Petelu i Iopa i ni aho e lahi i te fale o Himona, he tino gaohi mea mai nā pakumanu.