Gāluega 12 - Tokelauan New Testament

Kua Fakaatili te lahi o nā Fakahāuāga

¹ E tuha ko te vāitaimi tēnā na kāmata ai nā fakahāuāga a te tupu ko Helota, ki ni tino o te Ekalehia.

² Na ia fakatonua ke tāmate ia Iakopo te uho o Ioane, i te pelu.

³ I te ia kiteaga ko nā tino Iutaia e fiafia ki te mea tēnei, oi fakatonu ai foki e ia ke puke ia Petelu. (Na tupu te mea tēnei i te taimi o te Kaiga Fakamanatu o nā Falaoa hē Fakafefetea.)

⁴ Na uma te puke o Petelu, oi kave ai ki te falepuipui, ma tukulima atu ai ke leoleo e ni vāega fitafita tau toka fa. Na fuafua e Helota ke fai te fakamahinoga o Petelu i mua o tagata, kāfai e uma te Pāheka.

⁵ Oi na tāofi ai lava ia Petelu i te falepuipui; kae ko tagata o te Ekalehia nae tatalo fakatauanau lava ki te Atua mo Petelu.

Kua Tatala ia Petelu mai te Falepuipui

⁶ I te pō lava na tonu ai ia Helota ke kave ia Petelu ki mua o tagata, ko Petelu nae moe i te va o ni fitafita e toka lua. Nae haihai nā lima i nā filifili e lua, ma e i ei nā fitafita nae leoleoa te faitotoka ki te falepuipui.

⁷ Kae nā lava e teki ko he agelu a te Aliki kua tū mai, ma he mālamalama kua huhulu i loto o te potu e i ei ia Petelu. Kua haehae atu te agelu ki te takuau o Petelu, oi ala ai ia Petelu, ma kua lea vē atu te agelu ki ei, “Faivave! Tū loa ki luga!” Ko te taimi lava tēnā na pakukū kehe ai nā filifili nae i ona lima.

⁸ Oi lea atu ai te agelu ki ei, “Fai tō fuhipaku, ma nonoa ō taka.” Na vēnā lava oi fai e Petelu, oi lea vē atu ai te agelu ki ei, “Fai tō kofu loloa, oi hau ai ta olo.”

⁹ Kua mulimuli ki ei ia Petelu ki fafo o te falepuipui, kae hē ia hāfia pe ko te mea a te agelu e fai e moni; na vēake lava ko he fakaaliga te na ia kitea.

¹⁰ Kua fakahao e ki lāua te vāega o nā leoleo muamua vēnā ma tona lua, oi tau atu ai loa ki te faitotoka ukamea e kui ai ki loto o te kakai. Oi matala ai te faitotoka kae e hēai he tino na ia tatala, ma na olo ai ki lāua ki fafo ma havavali kui atu i he auala; kae nā lava e teki ko te agelu kua hē i ei.

¹¹ Na hāfia loa e Petelu te mea kua tupu, oi lea vē ai, “Kua kō iloa i te taimi nei ko te mea na pa au, na tupu moni lava! Kua uga mai e te Atua tana agelu ke fakahao au mai te pule a Helota, ma nā mea uma na vēake ia tagata Iutaia e tutupu.”

¹² Kua ia hāfia te tūlaga kua pa ia ki ei, oi fano ai ki te fale o Malia, te mātua o Ioane Maleko. E tokalahi nā tino nae maopoopo i kinā ma nae fai talohaga.

¹³ Kua tukituki e Petelu te faitotoka pito ki fafo, oi hau ai te kaukauna e igoa ki a Lotē ke kikila pe ko ai.

¹⁴ Na ia matea te leo o Petelu, oi toe vili ai ki lotofale i tona fiafia oi lea ko Petelu e tū i fafo, kae kua hē tatalā te faitotoka.

¹⁵ Kua lea atu ki lātou ki ei, “Ko tō māfaufau e vē e hē lelei!” Kae kua viga lava te kaukauna ko he mea moni te lea ake ai ia. Oi tali vē atu ai ki lātou ki ei, “Ko te agelu la o ia!”

¹⁶ I te taimi tēnā ko Petelu koi tukituki lava te faitotoka, ma i te tatalaga e ki lātou o te faitotoka, na ofo lahi lele i te ki lātou kiteaga o Petelu.

¹⁷ Kua tautala lima atu ia Petelu ki a te ki lātou ke nahe piha, ma na fakamatala e ia ki a te ki lātou te tatalaga o ia e te Atua mai te falepuipui. Oi lea vē atu ai, “Taku ko la te mea tēnei ki a Iakopo ma iētahi uho Kelihiano,” ma na tukua ai loa e ia ia kinā kae fano ki hētahi koga.

¹⁸ I te aho alafaki, na matuā hē hāfia lava e nā leoleo i te falepuipui, pe ko he ā te kua tupu ki a Petelu.

¹⁹ Kua fakatonu e Helota ke hakili ia Petelu, kae e hēki ki lātou maua. Oi hukehuke ai e ia nā leoleo i te falepuipui ma na fakatonu ai e ia ke tāmate nā leoleo iēnei. Kua uma te mea tēnā, oi fano kehe ai ia Helota mai Iutea, ma kua fano oi nofo i Kaihaleia mo he vāitaimi.

Ko te Oti o Helota

²⁰ Na matuā ita lahi lele ia Helota ki tagata o Tulo ma Haitonu, ko te mea ia na olo fakatahi ai na hui mai nā nuku iēnei oi kikila ia Helota. Na ki lātou mua fakakupua ia Palahito, te kaukauna pule i te fale o te tupu, ke fehoahoani ake ki a te ki lātou. Oi olo ai ki a Helota ma fakatagi ki ei mo he fīlēmū, auā ko nā meakai a o lātou nuku e maua mai i te fenua e pule ai te tupu.

²¹ E i ei te aho fakapitoa e kofu ai ia Helota i ona kofu tau tupu, oi nofo ai i tona nofoāliki ma fai tana lāuga ki tagata.

²² Kua taukalalaga vē ia tagata, “E hē ko he tino te tautala kae ko he atua!”

²³ Ko te taimi lava tēnā na fakatauale ai ia Helota e te agelu, ona kua hē ia kavea te vīkiga ki te Atua. Kua kai tona tino e anufe ma na mate ai.

²⁴ I te taimi tēnā ko te kupu a te Atua kua halalau pea lava ma tupu olaola.

²⁵ Kua uma te fakatino e Panapa ma Haulo te mea na ala ai o na olo ki Ieluhalema, oi toe olo kehe ai ma kave e ki lāua ia Ioane Maleko.