1 Kolinito 10 - Tokelauan New Testament

Fakaeteete i nā Tupua

¹ Te kau uho, e fia fakamanatu atu e au ki a te koutou te mea na tupu ki nā tupuna o ki tātou na mulimuli ki a Mohe. Nae i lalo uma ki lātou o te puipuiga a te ao, ma na kui loto uma ki lātou o te Tai Kukula ma te haogalēmū.

² I loto o te ao ma loto o te tai, na papatiho uma ki lātou ma hoko o Mohe.

³ Na kakai uma ki lātou ki te falaoa fakateagaga e tahi

⁴ ma inu uma i te vai fakateagaga e tahi mai te papa fakateagaga na olo fakatahi ma ki lātou; ma ko te papa tēnā ko Keliho.

⁵ Kae e ui i tēnei, ko te Atua e hēki fiafia ki te tokalahi o ki lātou, ma na fakaumatia ki lātou i te toafa.

⁶ Ko nā mea uma iēnei ni fakatakitakiga mo ki tātou, kae ke fakaeteete ai ki tātou i te faia o nā mea e kino, e vē ona ki lātou faia,

⁷ ke nahe ifo ai ki nā tupua, e vē ona faia e iētahi o ki lātou. E vē oi leamai te tuhituhiga paia, “Kua nonofo ki lalo ia tagata ke kakai ma inu, oi tutū ai ki luga kua hihiva i mua o te tupua.”

⁸ E hē tatau ke fai e ki tātou nā uiga mātagā, e vē ona fai e iētahi o ki lātou — i te aho e fokotahi, e toka luahefulutolu afe ki lātou na pakukū ma feoti.

⁹ E hē tatau ke tuku atu e ki tātou ia Keliho ki te tofotofoga, e vē oi fai e iētahi o ki lātou — na fakaumatia ki lātou e nā gata.

¹⁰ E hē tatau ke faitio ki tātou, e vē oi fai e iētahi o ki lātou — na fakaumatia ki lātou e te Agelu o te Oti.

¹¹ Ko nā mea uma iēnei na tutupu ki a te ki lātou ke fai ma fakatakitakiga ki iētahi tino, ma na tūhia ki lalo kae ke fai ma mea ke fakaeteete ai ki tātou. Auā kua pili mai i te taimi nei e ola ai ki tātou, te ikuga o mea uma.

¹² Kāfai koutou e manatu e mau lelei autou tutū, fakaeteete la nā koutou e pakukū.

¹³ Ko nā tofotofoga kua pa koutou ki ei ko te itūkāiga lava e tahi e maua ai foki ia tagata uma. Kae ko te Atua e tauhi ki tana folafolaga, ma e hē ia tukua koutou ki he tofotofoga e hili atu i lo te koutou mālohi ke mau lelei ai autou tutū; i te taimi e tofotofo ai koutou, ka fōki atu e ia te mālohi ke maua ai e koutou te onohai, ma mafai ai ke hao kehe koutou.

¹⁴ Ko te mea ia, te kau uho pele, koutou ke kalo kehe mai te ifo ki tupua.

¹⁵ Ko au e tautala vēnei atu ki a te koutou ko koutou ni tino e mālamalama; fakamāhinohino ifo e koutou nā kupu e tautala ai au.

¹⁶ Kāfai ki tātou e inu ki te ipu o te Fakamanatuga tēia e lea ki tātou ki te Atua ke fakamanuia, e hē ko te inu fakatahi nei tēnā o ki tātou ki te toto o Keliho? Kāfai ki tātou e kakai ki te falaoa e tavaevae e ki tātou, e hē ko te kakai fakatahi nei tēnā o ki tātou ki te tino o Keliho?

¹⁷ Ona e fokotahi te falaoa, ko ki tātou uma, e ui e tokalahi, kae e tahi i te tino, auā ko ki tātou uma e kakai ki te falaoa e fokotahi.

¹⁸ Tātou māfaufau ake ki tagata o Ihalaelu; e hē kakai nei nā tino i te fata faitāulaga ki nā mea kakai e ofo atu ma tāulaga ki te Atua?

¹⁹ Ko te uiga nei la o taku lea atu, ko he tupua pe ko nā meakai e ofo atu ki ei, e i ei he uiga?

²⁰ Hēai! Ko te uiga o taku lea atu, ko nā mea e ofo atu ma tāulaga e tagata fakapaupau, e ofo atu ki nā tēmoni kae hē ki te Atua. Ko au e hē fofou ko koutou ke fai ma hoa o nā tēmoni.

²¹ E hē mafai koutou ke inu ki te ipu a te Aliki ma inu foki ki te ipu a tēmoni; e hē mafai koutou ke kakai i te laulau a te Aliki ma kakai foki i te laulau a tēmoni.

²² Pe ko ki tātou e fofou ke fuā te Aliki? E mālolohi nei ki tātou i lo te Aliki?

²³ E lea nā tino, “E taga ki tātou ke fai ho he mea.” Io e hako, kae e hē vēakē ko mea uma e lelei. “E taga ki tātou ke fai ho he mea” — kae e hē ko mea uma e fehoahoani ke ati ake ai.

²⁴ Nahe i ei he tino o koutou e hakili ki hona lava ia lelei, kae hakili ki he lelei mo iētahi tino.

²⁵ E taga te kakai o koutou ki ho he mea mai te māketi e fakatau ai nā kanofi manu, e aunoa ma he fakafehili ona ko outou lotofuatia.

²⁶ Auā e vē oi leamai te tuhituhiga paia, “Ko te lalolagi ma nā mea uma e i ei, e a te Aliki.”

²⁷ Kāfai koe e valakaulia e he tino fakapaupau ke kakai ma ia ma kua talia e koe tana kalaga atu, kai ki ho he meakai e laulau atu ki ō mua, e aunoa ma he fakafehili ona ko tō lotofuatia.

²⁸ Kae kāfai he tino e lea atu, “Ko te meakai tēnei na ofo atu mo nā tupua,” nahe kē kai la ki ei auā te tino tēnā kua lea atu, ma auā foki lava te lotofuatia —

²⁹ ko te uiga o taku lea atu, e hē ko tō lotofuatia, kae ko te lotofuatia o tētahi tino. E ono fehili vē he tino, “He ā la te ka fua tauanoa ai te haolotoga ia te au ke fai ai ho he mea, ki te lotofuatia o hētahi tino?

³⁰ Kāfai au e fakafetai ki te Atua mo aku meakai, he ā la te faitio tauanoa mai ai he tino ki a te au e uiga ki nā meakai kua uma toku fakafetai ai?”

³¹ Ko te mea ia, pe he ā lava ta koe e fai, pe ko koe e kai pe inu, fai uma nā mea iēnei mo he vīkiga o te Atua.

³² Nahe koutou faia he mea e tauhūai ai nā tino Iutaia pe ko tagata nukukehe pe ko te Ekalehia a te Atua.

³³ Fakatakitaki oioti ki nā mea e kō faia; e taumafai lava au ke fakamaliegia ia tagata uma i nā mea e kō faia, e aunoa ma he manatu ki he lelei mo oku lava, ka ko he lelei mo tagata uma, kae ke fakaola ai ki lātou.