लूका 4 - बुक्सा

ईसु कै परखनो

¹ फिर ईसु पबित्‍तर आत्‍मा सै भरो भओ यरदन नद्‍दी सै लौहटो और आत्‍मा उसकै बियाबान जघै मै ले गओ,

² और सैतान उसकै बहाँ चालीस दिन तक परखतो रैहओ। उन दिनौ मै बानै कुछ ना खाओ और जब बे दिन पूरे हो गए, तौ उसकै भूँक लगी।

³ और सैतान नै उस्सै कैई, “अगर तू परमेसर को लौंड़ा है, तौ इस पत्‍थर सै कैह, कै रोटी बन जाय।”

⁴ ईसु नै उसकै जबाब दओ कै, “पबित्‍तर सास्तर मै लिखो है, आदमी सिरप रोटी सैई जिन्‍दो ना रैहगो।”

⁵ तब सैतान उसकै भौत ऊँचे मै ले गओ और पलभरमैई सैरी दुनिया के देस दिखा दए।

⁶ और सैतान नै उस्सै कैई, “मैं इन देसौ के ऊपर सब बातौं को हक और धन-दौलत तेकै दे दंगो, कैसेकै बौ मैंकै सौंपो गओ है: और जिसकै मैं चाँहौ हौं, उसई कै दे देमौं हौं।

⁷ इसताँई, अगर तू मेरे अग्गे झुक जाय, तौ जौ सब तेरो हो जागो।”

⁸ ईसु नै उसकै जबाब दओ, “पबित्‍तर सास्तर मै जौ बी लिखो है; कै तू अपने परभु परमेसर केई अग्गे झुक; और सिरप उसई की पिराथना कर।”

⁹ तब सैतान ईसु कै ऐरूसलेम के मन्‍दर मै ले गओ और सबई सै ऊँची चुटिया मै खड़ो कर दओ, और ईसु सै बोलो, “अगर तू परमेसर को लौंड़ा है, तौ हिंया सै अपने आपकै नीचे गिरा दे।

¹⁰ कैसेकै पबित्‍तर सास्तर मै लिखो है कै, “परमेसर तेरे बारे मै अपने सुरगदूतौं कै हुकम देगो कै, बे तेरी सायता करैं।

¹¹ और बे तेकै हातौ हात उठा लंगे कहीं ऐंसो ना हो कै तेरे पाँऐ मै पत्‍थर सै चोट लगै।”

¹² तब ईसु जबाब देते भए बोलो, “पबित्‍तर सास्तर मै जौ बी लिखो है कै तू अपने परभु परमेसर कै ना परखिए।”

¹³ जब सैतान, ईसु कै सब बातौं मै परख चुको तौ थोड़े टैम के ताँई उसके धौंरे सै चलो गओ।

ईसु के कामौ की सुरूआत

¹⁴ फिर ईसु आत्‍मा की सकति सै भरो भओ गलील मुलक कै लौहटकै आओ और बाकी चरचा सैरे मुलक मै फैल गई।

¹⁵ और बौ यहूदी पिराथना घरौं मै उनकै उपदेस बतातो रैहओ, और सब उसकी बड़ाई करै हे।

¹⁶ फिर बौ नासरत सैहर मै आओ जहाँ बौ पलो बढ़ो हो। और बौ अपने रीती के हिसाब सै यहूदिऔं के आराम कन्‍नै बारे दिन पिराथना घर मै जाकै पढ़नै के ताँई खड़ो भओ।

¹⁷ तौ बाकै यसाया नबी की किताब देई गई, और बानै किताब खोलकै, बौ जघै लिकारी जहाँ जौ लिखो पड़ो हो।

¹⁸ “परभु की आत्‍मा मैं मैई समाई है और उसनै मैंकै चुनो है जिस्सै मैं गरीबौ कै अच्‍छी खबर सुनाऔं। और मैं इसताँई भेजो गओ हौं कै कैदिऔ कै छुटकारे को और अन्धौ कै देखनै की अच्‍छी खबर बताऔं और दबे भएऔं कै छुड़ाऔं

¹⁹ और लोगौं के ऊपर परभु के दया कन्‍नै बारे साल को परचार करौं।”

²⁰ तब बानै किताब बन्‍द करकै एक सेवक के हात मै दे दई, और बैठ गओ और पिराथना घर के सब लोगौं की आँख उसके ऊपर टिकी पड़ी हीं।

²¹ तब बौ उनसै कैललगो, “आजई किताब मै लिखी भई जौ बात तुमरे सामने पूरी भई है।”

²² सब उसकी बड़ाई कर रए हे। बाके मौह सै मीठे बोल सुनकै, बे सब हैरान हे। बे बोले, “का जौ यूसप को लौंड़ा ना है?”

²³ बानै उनसै कैई, “तुम मेरे ऊपर जौ कहाबत जरूर कैऔगे, कै हे बैद, अपने आपकै ठीक कर, कै जो कुछ हमनै सुनो है कै कफरनहूम मै तैनै करो है बाकै हिंया अपने मुलक मै बी कर।”

²⁴ और बानै कैई, “मैं तुमसै सच कैरओ हौं, कोई नबी अपने सैहर मै इज्‍जत ना पावै है।

²⁵ और मैं तुमसै सच कैरओ हौं कै, एलिया के दिनौ मै जब साड़े तीन साल तक आसमान सै पानी ना बरसो, और हिंया तक की सैरे मुलक मै भयंकर अकाल पड़ गओ हो, बहाँ ईसराइल मै भौस्सी राँड़ हीं।

²⁶ पर एलिया उनमै सै किसी के धौंरे ना भेजो गओ, बौ सिरप दूसरे देस के सैदा परदेस के सारपत सैहर मै एक राँड़ के धौंरे भेजो गओ हो।

²⁷ और एलीसा भबिसबानी कन्‍नै बारे के टैम ईसराइल मै भौत से कोढ़ी हे, पर सीरिया देस के नामान नाम के कोढ़ी के अलाबा और कोई ठीक ना करो गओ।”

²⁸ जे बात सुनतेई जितने आदमी पिराथना घर मै हे, सब घुस्सा सै भर गए।

²⁹ और उठकै बाकै सैहर सै बाहार ले गए, और जिस पहाड़ मै उनको सैहर बसो पड़ो हो, उसकी चुटिया मै ले गए, कै बहाँ सै बाकै नीचे गिरा दैं।

³⁰ पर बौ उनके बीच मै सै लिकरकै चलो गओ।

गंदी आत्‍मा को लिकारो जानो

³¹ फिर बौ गलील के एक सैहर कफरनहूम मै पौंचो और आराम कन्‍नै बारे दिन लोगौ कै उपदेस देल लगो।

³² लोग उसकी सिक्‍छा सै हैरान हे, कैसेकै बाको सन्देस अधकार के संग हो।

³³ बहीं पिराथना घर मै एक आदमी हो जिसमै दुसट आत्‍मा चिपटी पड़ी ही। बौ ऊँची अबाज मै चिल्‍लाई,

³⁴ “हे ईसु नासरी तू हम सै का चाँहै है? का तू हमरो नास कन्‍नै आओ है? मैं जानौ हौं तू कौन है: तू परमेसर को पबित्‍तर आदमी है।”

³⁵ ईसु बाकै डाँटकै बोलो, “चुप रैह, और उसमै सै लिकर जा” तब दुसट आत्‍मा उसकै बीच मै पटक कै, बिना नुकसान पौंचाए उसमै सै लिकर गई।

³⁶ इस बात सै सबई कै बड़ो अचम्बो भओ, और बे आपस मै बात करकै कैललगे, “जौ कैसो बचन है? कै बौ अधकार और सकति के संग गंदी आत्‍माऔ कै हुकम देवै है, और बे बाहार लिकर जावै हैं।”

³⁷ और चारौ लंग बाकी धूम मच गई।

ईसु दुआरा भौस्से बेमारौं को ठीक होनो

³⁸ तब ईसु पिराथना घर सै उठकै समौन के घर मै गओ बहाँ समौन की सास कै बुखार चढ़ो पड़ो हो, और उनौनै उसके ताँई ईसु सै बिनती करी।

³⁹ ईसु नै उसके धौंरे खड़े होकै बुखार कै डाँट लगाई और बुखार उस्सै उतर गओ और बौ तुरन्‍त उठकै उनकी खातरदारी करल लगी।

⁴⁰ दिन छिपे के टैम लोग उन सबई जनी कै ईसु के धौंरे लिआए जो तरै-तरै की बेमारिऔ मै पड़े भए हे, और बानै एक-एक के ऊपर हात रक्‍कै उनकै चंगो करो।

⁴¹ और दुसट आत्‍मा चिल्‍लाती और जौ कैती भई भौतौं मै सै लिकर गंई कै, “तू परमेसर को लौंड़ा है!” कैसेकै बे जानै हीं कै जौई मसी है। इसताँई बौ उनकै डाँटतो और बोलन ना देवै हो।

⁴² जब दिन लिकरो तौ बौ बहाँ सै किसी एक सुनसान जघै मै चलो गओ। पर भीड़ बाकै ढूंड़ते-ढूंड़ते बहीं जा पौंची जहाँ बौ हो। और उसकै रोकल लगी कै हमरे धौंरे सै ना जा।

⁴³ पर बानै उनसै कैई, “मैंकै परमेसर के राज की अच्‍छी खबर दूसरे सैहरौं मै बी पौंचानी है कैसेकै मैं इसई ताँई भेजो गओ हौं।”

⁴⁴ और बौ यहूदिया के पिराथना घरौं मै परचार करतो रैहओ।