इबरानिओ 5 - बुक्सा

¹ हर एक बड़ो पुजारी लोगौ मै सै छाँटो जावै है और लोगौ के बदले परमेसर की सेवा कन्‍नै के ताँई रखो है, जिस्सै कै बौ चढ़ाबो और पाप की माफी के ताँई बलि चढ़ाऐ।

² बौ उनके संग अच्‍छो बरताब करै है, जो अनजाने मै पाप करै हैं और जो भटके भए हैं। कैसेकै बौ खुद बी कमजोर है और पाप मै पड़ सकै है।

³ इसताँई जैसे बौ दूसरौं के पापौं के ताँई बलि चढ़ाबै है बैसेई बाकै अपने पापौं के ताँई बी बलि चढ़ानी पड़ै है।

⁴ किसी बी आदमी कै बड़ो पुजारी को औहदा अपनी मरजी सै ना मिलै है पर परमेसर के बुलाए जानै के दुआरा मिलै है जैसे हारून कै।

⁵ बैसेई मसी नै बी बड़ो पुजारी बन्‍नै के ताँई खुद कै ऊँचो ना करो पर बाकै परमेसर नै ठैराओ, जैसो परमेसर नै कैई ही कै, “तू मेरो लौंड़ा है, और आज मैं तेरो अब्बा बनो हौं।”

⁶ ऐंसेई बौ एक और जघै मै कैबै है कै, “तू बी मलकीसदेक के हाँई हमेसा के ताँई पुजारी है।”

⁷ जब ईसु सरीर मै जिन्‍दो हो तौ बानै चिल्‍ला-चिल्‍लाकै और रो रो कै परमेसर सै बिनती करी, जो बाकै मौत सै बचा सकै हो और ईसु की भक्‍ति की बजै सै बाकी पिराथना सुनी गई।

⁸ परमेसर को लौंड़ा होते भए बी ईसु नै दुख झेल झेल कै बाको हुकम माननो सीको।

⁹ और बौ बड़ो पुजारी बनकै उन सबई लोगौ के ताँई हमेसा की मुक्‍ति को सोता बन गओ, जो बाकी बातौं कै मानै हैं।

¹⁰ और मलकीसदेक की परम्परा के हिसाब सै परमेसर के दुआरा ईसु कै बड़ो पुजारी ठैराओ।

नास के बारे मै चितौनी

¹¹ जाके बारे मै कैनै के ताँई मेरे धौंरे भौत कुछ है, पर जिनकै समजानो मुसकल है, कैसेकै तुमरी बुद्‍धि कमजोर हो गई है।

¹² तुमकै अबी तक तौ सिकानै बारो बन जानो चँईऐ। पर तुमरे ताँई तौ अबी बी ऐंसे लोगौ की जरूरत है जो तुमकै परमेसर के बचनौ को गियान सुरू सै दे सकैं। तुमकै रोटी ना चँईऐ पर छोटे बालक के हाँई दूदई चँईऐ है।

¹³ कैसेकै जो दूद पीवै है बौ बालक के हाँई है कैसेकै उनकै सई और गलत को पतो ना है।

¹⁴ पर खानो तौ उन सिआनेऔ के ताँई है, जो समज को अभियास करते करते भले बुरे की पैचान करै हैं।