कुलुसिऔं 4 - बुक्सा1 मालिकौं, तुम अपने नौकरौ के संग सई और अच्छो बरताब करिओ, कैसेकै जौ बात याद रक्खौ कै सुरग मै तुमरो बी एक मालिक है। पौलुस की ओर सै सला 2 तुम लोग पिराथना मै चौकस होकै लगे रौह, और परमेसर को धन्नबाद करते रौह। 3 और जाके संग-संग तुम हमरे ताँई बी पिराथना करौ, जिस्सै परमेसर हमकै बचन सुनानै के ताँई ऐंसी रस्ता खोल दै कै, हम मसी की बा गुप्त बात के बारे मै बता सकैं जिसकी बजै सै मैं कैद मै हौं। 4 तुम पिराथना करौ कै मैं बा गुप्त बात कै साप ढंग सै बता सकौं, जिसकै बतानो मेरे ताँई ठीक है। 5 जो लोग बिसवासी ना हैं तुम उनके संग सोच समजकै बरताब करौ और मौके को सई फाएदा उठाऔ। 6 तुमरी बोली हमेसा किरपा सै भरी और मीठी होए, जिस्सै कै तुमकै हर एक आदमी कै सई तरीका सै जबाब देनो आ जाय। आखरी नमस्कार 7 तुखिकुस जो परभु मै मेरो पियारो भईया और परभु को सच्चो सेवक और सेवा मै मेरो संगी साती है, बौ तुमकै मेरे बारे मै सिगरी बातौं कै बता देगो। 8 बाकै मैंनै तुमरे धौंरे इसताँई भेजो है कै तुमकै हमरी हालत को पतो लग जाय और बौ तुमरे दिलौ कै सान्ति देए। 9 और बाके संग भरोसेमंद और पियारे भईया उनेसिमुस कै भेज रओ हौं जो तुमरे हिंयई सै है, बे तुमकै हिंया की सिगरी बात बता दंगे। 10 अरितरखुस, जो मेरे संग जेल मै कैद है और मरकुस जो बरनबास को चचेरो भईया लगै है, बाकी ओर सै बी तुमकै नमस्कार; और मरकुस के बारे मै मैंनै तुमकै पैलेई जौ आगियाँ देर खाई ही कै जब बौ तुमरे धौंरे आगो तौ तुम बाको सुआगत करिओ। 11 और ईसु जिसकै यूसतुस बी कैबै हैं, बौ तुमकै नमस्कार कैबै है; और यहूदी बिसवासी लोगौ मै सै परमेसर के राज कै बढ़नै के ताँई बस जेई लोग मेरे संग काम कर रए हैं और इनई की बजै सै मैंकै सान्ति मिली है। 12 इपफरास जो तुमरे हिंया को है, बौ मसी ईसु को सेवक है, तुमकै नमस्कार कैबै है। बौ तुमरे ताँई हमेसा जौ पिराथना करतो रैहबै है कै तुम परमेसर की सिगरी मरजी के बारे मै पूरे तरीका सै समजकै और पक्के होकै टिके रौह। 13 मैं बाकी जा बात को गभा हौं कै बौ तुमरे ताँई और लौदीकिया के लोगौ के ताँई और हिरापुलिस जघै के लोगौ के ताँई हमेसा बड़ी मैहनत करतो रैहबै है। 14 हमरे पियारे बैद लूका और देमास की ओर सै तुमकै नमस्कार। 15 लौदीकिया मै रैहनै बारे भईयौ और बहन नुमफास कै और बाईके घर मै जुड़नै बारी बिसवासिऔ की मंडली कै नमस्कार। 16 और जब तुम जा चिट्ठी कै पढ़कै सुना दोगे; तौ तबई जौ लौदीकिया के बिसवासिऔ की मंडली मै बी पढ़कै सुनाई जाय, और बौ चिट्ठी जो लौदीकिया बारौ कै मैंनै भेजी ही बाकै तुम बी पढ़िओ। 17 और तुम अरखिपुस सै ऐंसे कैईयो कै, “जो सेवा परभु नै तेकै दई है बाकै पूरी कन्नै के ताँई होसिआर रैहईए।” 18 मैं पौलुस, खुद अपने हात सै तुमकै जौ नमस्कार लिख रओ हौं। जौ बात याद रखिओ कै मैं जेल मै हौं और तुमरे ऊपर परमेसर की किरपा होती रैह। |
New Life Compute Institute [NLCI] - CC BY-NC-ND 4.0