1 कुरन्थियों 5 - बुक्साबिसवासिऔ की मंडली मै कुकरम 1 तुमरे बारे मै मैंनै जौ तक सुनो है कै, तुमरे बीच मै कुकरम होवै हैं, पर ऐंसो जो गैर यहूदी लोगौ मै बी ना पाओ जावै है, कै एक लौंड़ा अपने अब्बा की बईयर कै रख लै। 2 का तुमकै जा बात को दुख बिलकुल ना है। तुमरे बीच मै ऐंसे बुरे काम कन्नै बारौ कै बाहार लिकान्नै की बजाए तुम घमंड करौ हौ। 3 मैं सरीर सै तौ तुमसै दूर हौं, पर आत्मा सै तुमरे संगई हौं। और ऐंसो मानौ कै मैं तुमरे संगई रैहते भए ऐंसो गलत काम कन्नै बारे आदमी के खिलाप जौ फैसला सुना चुको हौं। 4 जब तुम हमरे परभु ईसु मसी के नाम सै इखट्टे होबौ हौ और मैं बी आत्मा के संग तुमरे धौंरे हौं, तौ ऐंसे आदमी कै, परभु ईसु मसी की सकति सै, 5 बाके सरीर कै नास होनै के ताँई सैतान कै सौंपो जागो, जिस्सै कै परभु ईसु के बापस आनै के दिन मै बाकी आत्मा कै मुक्ति मिलै। 6 तुमरो घमंड कन्नो ठीक ना है। का तुम जौ ना जानौ हौ, कै थोड़ो सो बासी चून सिगरे नए माड़े भए चून कै खट्टो बना देवै है। 7 बासी खट्टो चून कै लिकार फैंकौ, जिस्सै कै तुम नए माड़े भए चून के हाँई सुद्द बन जाऔ, जैसे तुम हकिकत मै हौ, कैसेकै मसी फसै को मैमना है, जिसको बलिदान करो गओ है। 8 इसताँई बुराई और धोके के बासी खट्टे चून सै ना पर सीदाई और सच्चाई के नए चून की रोटी सै खुसी के संग जौ तौहार मनाऔ। 9 मैंनै अपनी चिट्ठी मै तुमकै लिखो हो कै, बैबिचार कन्नै बारौ सै मेल-जोल ना रक्खौ। 10 मेरो कैनै को जौ मतलब ना है कै तुम जा दुनिया मै दूसरी बईयरौं से गलत काम कन्नै बारे और लालची, ठगनै बारे या मूरती पूजा कन्नै बारे लोगौ के संग कोई मतलब ना रखिओ। कैसेकै इस हाल मै तौ तुमकै जौ दुनियाई छोड़नी पड़ती। 11 मेरो कैनै को मतलब जौ है कै अगर कोई बिसवासी भाई बईयरौं सै गलत काम कन्नै बारो, लालची, या मूरती पूजा कन्नै बारो, चुगली कन्नै बारो, सरापी या धोकेबाज है, तौ ऐंसे आदमी के संग मेल-जोल रखनो तौ दूर बाके संग रोटी बी ना खइओ। 12 कैसेकै दूसरे लोगौ को नियाय कन्नै को काम मेरो ना है। तुम तौ उनको नियाय करिओ जो बिसवासिऔ की मंडली के लोग हैं। 13 पर दूसरे लोगौ को नियाय परमेसर करैगो, इसताँई उस कुकरमी कै अपने बीच मै सै लिकार दो। |
New Life Compute Institute [NLCI] - CC BY-NC-ND 4.0