तीतस 1 - थुलुङ राई1 माम्चु़नीकु डु़ल्चो़ नुङ येशू ख्रीष्टकु थु़र्मा गो पावलका ओराम सेलाखाजेम र्याक्तोङा बेउ। उनीमा मु़चु़मिमलाई छो़म थो़र लु़बेसाका नुङ आच्छाङाकु सिजेम थेसिथेन्बेसाका उनीमा लाम्दीडा लाम्दिबेन्मु लागि माम्चु़नीका गोलाई थु़र्ङिडिमिम। 2 ओराम थो़र नुङ आच्छाङाकु सिजेम थेसिथेट्पा नेप्चीलाम मेर्मिमका त्वारो़म ल्वामु लागि लथाक्पा दु़म्मी। मेराम त्वारो़म हेल्लो वो लिमा मेथेट्पा माम्चु़नीका सु़म्दिमोलोङा याचे जेम्डिम बाइडा। 3 जो़पा-सेला थो़बेसीलामका गुमीका मुलु़ बेम्डिम जो़पा थारीका मु़चु़मिमलाई ओराम ल्वा चबेट्मिडी। गुमीका मेराम खारी बेबेट्ङिडिमी मा गुइलाई सेल्पा इकी माम्चु़नीका बेबेट्ङिडिमिम होम्साका गो बेउतो। 4 गो थो़र लु़ङुमिम येशू ख्रीष्टडा ङा गाना वो थो़र लु़न्नामका आमा तारापाचो़ होङङा लु़ङुमिम तीतसलाई ओराम सेलाखाजेम र्याक्तोङा बेउ, माम्चु़नी इकी पाप नुङ गुइलाई सेल्पा येशू ख्रीष्टलामका गाना दिदाम नुङ न-भ्रसी ल्वानानु़! क्रेट टापुडा तीतसकु खारी 5 इकी बोम्द खारी बेसोका, मा खोत्ले शहरडा एल्डरमिम थुडामी र्वाङडोमा गानालाई क्रेट टापुडा पार्जो़ल्निम। गो गानालाई र्वाङडोम ल्वा मेप्ल्वासा वो। 6 एल्डर मुमा बेन्ला मेसो़सिक्पा, कोलेङा नाइमे बाट्पा दु़म्मु बासी। मेरामकु चो़मिम थो़रलु़पा, उनी हाम बेबेद्वा मेराम मेबेपा, मा र्वाकिमिम थो़पा दु़म्मु बासी। 7 हेङालोने एल्डर ने माम्चु़नीकाम खारी बेपामिमका मुमा बेन्ला मेसो़सिक्पा दु़म्मु बासी। उ त्वाकु न होङङा बेपा, दाला छोक्चो बक्पा, डु़का सेट्पा, क्वाल्बा बेपा, खउलुङ ल्वामु लागि हाम लोवो बेपा दु़म्सिमेनु़। 8 लावो बोच्चो़कु चापे-डुपे बेपा, जो़पा खारी बोमु द्वाक्पा, मिम्साका खारी बेपा, सु़डला वो चोमिक्सी मेबेसाका निया बेपा, न-गो सेपा मा त्वाका त्वापलाई जो़होमका जु़ल्मु चापा दु़म्मु बासी। 9 गुलाई सीट्मा थो़रलु़इमिम सिजेमडा गु छो़म थो़र लु़मुम बुमु बासी। मेम बेसाका गुका आच्छाङाकु सीसिका वाङमिमकाम उनी सो हन्बेन्सामु मा आच्चाङाकाम सीसिकु कोर्थो़लाम बक्पा मु़चु़मिम लिमा बुमी र्वाक्साका रेम्बोमु चापा दु़म्बेट्नु़। 10 हाम ना हामकु ल्वा बेपा, वाङमिमलाई लु-फेले बेपा मा र्वाकिमिम मेथो़पा मु़चु़मिम हापाङा दु़म्मी। सेल्सिमु लागि खिरिरि-क्रिप्सी बोमुङा बासी र्वाक्पामिमगोडाम आरेप्माम मु़चु़मिम ने हापाङा बुमी। 11 मेर्मिमलाई भोम्मुमि बासी, हेङालोने सीसि मेनु़पा लिमा ल्वा सीसाका मेर्मिमका हापा मु़चु़मिमलाई थो़रलु़सीलामका ताङताहेरथो़ ख्लोम्डिम बु। मेर्मिमका खउलुङकाम लागि कोङङा मेम बोमी। 12 क्रेट टापुडा बाट्पा मेर्मिमकु माम्चु़नीलाम-जेपा कोले मु़चु़का वो मेर्मिमकु दुथाम आरे र्वाक्ताम बु: “क्रेटडाम खोत्ले मु़चु़मिम लिमा थेट्पा, सो़ब्दीडाम ङिमलु़पा हादीबारामिम होप्माम, मा भ्रेपा पोमसामिम सो़।” 13 मेर्मिमकु माम्चु़नीलाम-जेपा मु़चु़का सो़यु़डु़म ल्वा आच्छाङा सो़। मेम्मिमका मेर्मिमलाई छो़म ख्र्वाकामी, मा मेर्मिम छो़म डोक्पु थो़रनुङमा दु़म्मिनु़। 14 मेम्मा यहूदीमिमकाम हाम ना हामकु ल्वाडा नुङ येशू ख्रीष्टकु दुथाममिम सीसि थो़मु मेद्वाक्पा मु़चु़मिमका र्वामिमिम ल्वाडा न मेसोमिनु़। 15 न-गो सेपा मु़चु़मिमकाम लागि खोत्लेङा सेपा दु़म। लावो मेजो़पा न-गोनुङमा नुङ थो़र मेलु़पा मु़चु़मिमकाम लागि ने हाम वो सेपा मेदु़म। हेङालोने मेर्मिमकु न नुङ नेप्चीङा मेजो़पा दु़स्ताम बु। 16 मेर्मिम मु़चु़का माम्चु़नीलाई छेत्तोकोम बु ने र्वामी, लावो उनी खारी बेसीलामका माम्चु़नीलाई मेछेमिमिम रेम्बोमी। मेर्मिम मु़चु़मिम माम्चु़नीलाई मेद्वाक्पा नुङ गुमीका र्वामिमिम मेथो़पा, मा जो़पा खारी हाम वो बोमु मेघ्रेट्पा सो़। |
© Wycliffe Bible Translators, Inc. All rights reserved.
Wycliffe Bible Translators, Inc.