रेम्बेट्मिडिम ल्वा 21 - थुलुङ राईलाले यरूशलेम 1 मेम्मा लाले सुबु नुङ लाले पाह्री गो ल्वाउतो, हेङालोने ङादोम सुबु नुङ ङादोम पाह्री दाम्स्ल्याड्डाम बाइडा मा दिरिदिन वो मेबायावा। 2 सेपा शहर, लाले यरूशलेम पाह्रीलामका माम्चु़नीलाम योक्तोङा बेपा गो ल्वाउतो, मेराम शहर वोचु़काम लागि ब्ल्वासाका झो़म्सिबेट्मा लारेमा होप्माम बाइडा। 3 मेम्मा साखाम थो़पा गन्खोपलामका आरे र्वाक्पा डोक्पु लो़लाम गो थो़उतो, “रेप्नी, माम्चु़नीकु बाखोप मु़चु़मिमनुङ बु, मा गुमी मेर्मिमनुङ बुमी। मेर्मिम उनीमा मु़चु़मिम दु़म्मी मा माम्चु़नी उनी त्वापङा मेर्मिमकु माम्चु़नी दु़म्साका मेर्मिमनुङ दु़म्मी। 4 गुमीका मेर्मिम खोत्लेकाम मिक्सीडाम प्ल बम्सामी। मेर्मिम आथा ने मेसिमी, मेख्राम्मी मेदुमी मा उनी थो़म्बोक ख्वाक्पा दु़खा मेदु़म, हेङालोने ङादोम ल्वामिम दाम्स्ल्याड्डाम बु।” 5 साखाम थो़पा गन्खोपडा गन्तासिट्पा माम्चु़नीका गोलाई आरे र्वाम्डी, “खोत्ले गो लाले बनेबेउमी।” मेम्मा गुमीका र्वाम्डी, “ओर्मिम र्याका, हेङालोने ओर्मिम ल्वा थो़रलु़इमिम नुङ आच्छाङा सो़।” 6 गुमीका गोनुङ र्वाम्डी, “खोत्ले बोम्सोमु दु़स्ता। अल्फा नुङ ओमेगा, खोत्ले चो़म्सी बेट्पा नुङ हुक्सोक्पा गोङा। सु़ कोरा सि गो मेराम मु़चु़लाई त्वारो़म ग्वाक्पा कु पुन्खोपलामका पुट्पा कु मेडेङा थो़पु। 7 उहेम घ्ल्वा, ओर्मिम खोत्ले मेरामकाम दु़म मा गो मेरामकु माम्चु़नी दु़म्ङु मा मेराम आमा चो़ दु़म। 8 लावो ङिजो़ल्पा, थो़र मेलु़पा, घ्रामलु़पा खारी बेपा, मु़चु़ सेट्पा, वाङमिम मेसेमनुङ अम्पा, मुनाङका थो़पा सो़र्मुनुङमा, ङाटा सेव साट्पा नुङ खोत्ले लिमाचो़मिम ने गन्धक वाक्तोङा बेपा ङिमलु़पा मुकु भुल्मु गोडा दु़म्मी। ओराम ननोम सिसि सो़।” 9 मेम्मा मु़चु़ सेट्पा चङडाम येतले दु़खा थारीमिमका देम्पा येतले कान्चु़रेमिम जेथाक्पा येतले पाह्रीचो़मिमगोडाम कोलेका रोक्ता मा गोनुङ आरे र्वाक्ता, “बिका, गो गानालाई भेन्दाचो़कु नाइमे, लारेमा रेम्बेनी।” 10 मेम्मा माम्चु़नी-पेलका गो लु़न्सिल्याङ्डो, मा पाह्रीचो़का गोलाई डोक्पु येप्पा पोप्चङडला लङडी मा पाह्रीलामका माम्चु़नीलाम योक्तोङा बेपा सेपा शहर, यरूशलेम रेम्बेट्ङिडी। 11 माम्चु़नीकु यु़म-झ्वाक्सी मेरामडला झ्वाक्ताम बाइडा। मेरामकु झ्वाक्सी हापा थिकाम बिल्लौर लुङ नुङ सोरलुङ होप्माम छ्याङलो-छ्याङलोम बाइडा। 12 मेराम शहरकाम को-न लाम्चोकोनुङमा डोक्पु नुङ येप्पा ब्रोलुङ बाइडा मा मे को-न लाम्चोकोमिमडा को-न पाह्रीचो़मिम बाम्डी। मे लाम्चोकोमिमडा इस्राएलकु को-न दोचो़मिमकु नङ र्याक्मा बाइडा। 13 नेम्सुङ ओपाथो़ सुले, नेम्सुङ गाम्पाथो़म सुले, जेजु़थो़ सुले, नुङ रायलाथो़ सुले लाम्चोकोमिम बाम्डी। 14 मे शहरकु ब्रोलुङकाम को-न उनी फारमिमकाम लुङ बाइडा। मेरामडला भेन्दाचो़कु को-न थु़र्मामिमकु नङ र्याक्मा बाइडा। 15 मे शहर, मेरामकु लाम्चोको नुङ ब्रोलुङ थो़पा सो़नाकु डु़लु़म्चो़ गोनुङ जेपा मे पाह्रीचो़नुङ बाइडा। 16 मे शहरकु भाप्सी नुङ दु़सी कोहोप्माम बाइडा। पाह्रीचो़का डु़लु़म्चो़का मे शहर थो़प्डु़लो न-ब्ल सङ (२,४००) किलोमिटर बाइडा। शहरकु दु़सी, भाप्सी नुङ येप्सी कोहोप्माम बाइडा। 17 गुका मे शहरकु ब्रोलुङ वो थो़प्डु़ मा मे पाह्रीचो़का थो़प्डु़म मु़चु़कु थो़प्सीका रुङो मिटर कोको बाइडा। 18 मे ब्रोलुङ हापा थिकाम बिल्लौरकाम बाइडा मा मे शहर ने सिसा होप्माम छ्याङलो-छ्याङलोम सो़नाकाम बाइडा। 19 मे शहरकु ब्रोलुङकाम उ फार हापा थिकाम लुङका बनेबेम्मा बाइडा। कोनोम उ फार बिल्लौरकाम, ननोम मामासे मणिकाम, सुनोम गिगिम लुङकाम, ब्लनोम पन्ना लुङकाम, 20 ङोनोम आनिक्स र्वाक्मा लुङकाम, रुनोम लालाम लुङकाम, येतनोम ओम ओमयाम लुङकाम, लेतनोम बेरुज र्वाक्मा मामासे-गिगिम लुङकाम, गुनोम पुष्पराज र्वाक्मा ओम ओमयाम लुङकाम, को धु़मनोम लसुने र्वाक्मा गिगिम लुङकाम, को-कोनोम लालाम सुन्तले लुङकाम, को-ननोम गेगेम-चक्लेम लुङकाम बाइडा। 21 मे को-न लाम्चोकोमिम को-न दिरिल्यकाम बाम्डी, खोत्ले लाम्चोको कोले कोले दिरिल्यकाम बाइडा। मे शहरकु डोक्पु लाम्दी छ्याङलो-छ्याङलो दो़पा सिसा होप्माम जो़पा सो़नाकाम बाइडा। 22 मेराम शहरडा गो सो़रनेम मेल्वाउवा, हेङालोने खोत्लेडलाम यु़मनुङमा मिप्रङमा माम्चु़नी नुङ भेन्दाचो़ङा शहरडाम सो़रनेम सो़। 23 मे शहर छ्याङ-छ्याङया बोमु नेम्सुङ, ख्लो़मु मेबासी, हेङालोने माम्चु़नीकु यु़म-झ्वाक्सीकाङा छ्याङ-छ्याङया बु़, मा मेसिन्डाम धिप्री ने भेन्दाचो़ सो़। 24 मे शहरकु ओलका मु़चु़मिम लाम्दिमी, मा सुबुडाम हपमिमका उनी खाप्ची मेसिन्डा रेन्मी। 25 बामनेम वो मे शहरकु लाम्चोको मेचसी, हेङालोने मेसिन्डा सिन्था मेदु़मङा। 26 खोत्ले मु़चु़मिमका उनी डोक्पु दु़म्सी नुङ उनी त्वापनुङ बाट्पा जो़पा ल्वामिम मेसिन्डा रेन्मी। 27 घ्रामलु़पा मु़चु़, ङाटा सेव साट्पा क्रो़मलु़पा खारी बेपा नुङ लिमाचो़ मेराम शहर गोडा हाम्सी वो मेहुमी। लावो त्वारो़मकु खाजेम, भेन्दाचो़कु खाजेमडा नङ र्याक्मा मु़चु़मिम कोङङा मेगोनो हुमी। |
© Wycliffe Bible Translators, Inc. All rights reserved.
Wycliffe Bible Translators, Inc.