मर्कूस 8 - थुलुङ राईयेशूका ब्ल धु़मसङ (४,०००) मु़चु़मिमलाई पोमु ग्वाम्डिमिम ( मत्ती १५:३२-३९ ) 1 आथावो कोखेप छो़म सेर्पा मु़चु़मिम खोम्सिम्डी। मेकोतिमा मेर्मिमनुङ बाट्पा पोमु थोक वो खोत्लेङा हुक्ल्याड्डा। मेम्मिमका येशूका उनी सीसिपामिम उनीमाथो़ येट्मिडिमा र्वाम्डी, 2 “ओर्मिम मु़चु़मिम रेपुमिलो छो़म आ थो़म भ्र्यो, हेङालोने ओर्मिम गोनुङ बुमिमिम आनेप सुलेम दु़स्ता, मा ओर्मिमनुङ पोमुथोक हाम वो मिबु। 3 ओर्मिम मान्जाङा नेम थु़र्सोक्तोमी माला ने लाम्दीडा ङा उनी न दाम्मा घ्लो़बुम्सिमी, हेङालोने ओर्मिमगोडाम याङ-याङ हापा छु़पाडाम रोम्डिम बु।” 4 सीसिपामिमका गुमीनुङ र्वाम्डी, “हाम वो मेल्वासिमिम आरेप्माम र्याङगो-र्याङगोडा हाम सो़बेमका ओर्मिमलाई लिबेन्मुमी?” 5 गुमीका मेर्मिमनुङ हिला बेम्डी, “गानीनुङ हाले सो़बेम बु?” मेर्मिमका र्वाम्डी, “येतले।” 6 गुमीका मे सेर्पा मु़चु़मिमलाई मे बायडा गन्बेट्मिडी। मेकोतिमा मे येतले सो़बेम रम्डिमा आलासो़ ग्वाम्डिमा चम्डी। मेम्मा मु़चु़मिमलाई दो़न्साट्नी बेम्डिमा उनी सीसिपामिमलाई ग्वाम्डी। मेकोतिमा मेर्मिमका मे मु़चु़मिमलाई दो़साट्मिडी। 7 मेर्मिमनुङ किचो़ कोलोङ याक्केतो ङोमिम वो बाइडा। मेरामलाई वो गुमीका जि ग्वाम्डिमा मे सेर्पा मु़चु़मिमलाई दो़साट्नी बेम्डिमा उनीमा सीसिपामिमलाई ग्वाम्डी। 8 मेकोतिमा मे मु़चु़मिमका पेम्डी, मा खोम्डी। मेम्मा वो क्लेट्मिडिम फ्वाक्चो़लमिम खोप्मिडिलो येतले खचा दु़स्ता। 9 मेसिन्डा ब्ल धु़मसङ (४,०००) कोति मु़चु़मिम बाम्डी। 10 गुमीका मेर्मिमलाई थु़र्सोम्डी मेडे गुमी ने उनी सीसिपामिमनुङ कुबी-बोक्साडा हुम्डिमा दलमनुथाथो़ लम्ल्याम्डी। फरिसीमिमका पाह्रीलाममिम छेखोप रेम्मु माल्मिडिम ( मत्ती १६:१-४ ) 11 फरिसीमिम येशूकाडा रोम्डिमा गुमीनुङ हिलाहिसी बोमु चो़म्मिडी, मा उनीमा न छाम्मु लागि पाह्रीलाममिम कोङ छेखोप रेम्बेट्किनी र्वाम्डी। 12 उनी गोनो धु़प्पा साम खेत्तोङा गुमीका र्वाम्डी, “आथामबिलिम मु़चु़मिमका हेङा छेखोप रेम्मु माल्मिमिम? आच्छाङा गो गानीलाई र्वाङु, आथामबिलिम मु़चु़का उहेम वो छेखोप रेम्मु मेल्वामी।” 13 मेकोतिमा मेर्मिमलाई मेसि पार्जो़ल्मिडिमा गुमी कुबी-बोक्साडला हुम्डी, मा होनो होम्बुथो़ लम्डी। फरिसीमिम नुङ हेरोदकु सीसिडाम वाङ बुमु ( मत्ती १६:५-१२ ) 14 येशूकु सीसिपामिमका सो़बेम कुर्मु प्ल्वाम्चेट्मिडिम बाइडा, मा कुबी-बोक्साडा मेर्मिमनुङ सो़बेम कोलेङा बाइडा। 15 येशूका उनीमा सीसिपामिमलाई आरे र्वाम्डिमा बाबेट्मिडी, “मामा सो़! गानी फरिसीमिम नुङ हेरोदकु लङखामडाम वाङ बानी वो।” 16 गुमीनुङ सो़बेम मेबुमिमका येशूका आरे र्वामिम र्वाक्साका मेर्मिमका उनी त्वाप-त्वापगोनो ङा र्वाबोमु चो़म्मिडी। 17 येशूका ओराम चम्ल्याम्डिमका र्वाम्डी, “गानीनुङ सो़बेम मिबु र्वाक्साका गानी हेङा हिलाहिसी बेबोनिमिम? हाम गानी आथावो मेचनी? थेसिङा मेथेनी? हाम इनीमा न लुङ होप्माम दु़स्ताम बु? 18 हाम इनीमा मिक्सी बात्तो-बात्तो वो गानी मेल्वानिमिम? इनी नोफ्ला बात्तो-बात्तो वो गानी मेथो़निमिम? गानी मेचनी, 19 गो ङोले सो़बेम ङो धु़मसङ (५,०००) मु़चु़मिमगोडा चक्तोलो घ्लेट्पा फ्वाक्चो़लमिम खोप्निमका हाङको खचा देम्स्ताम बाइडा?” मेर्मिमका र्वाम्डी, “को-न (१२) खचा।” 20 मेकोतिमा गुमीका र्वाम्डी, “मे येतले सो़बेम ब्ल धु़मसङ (४,०००) मु़चु़मिमगोडा चक्तोलो घ्लेट्पा फ्वाक्चो़लमिम खोप्निलो हाङको खचा देम्स्ताम बाइडा?” मेर्मिमका र्वाम्डी, “येतले खचा।” 21 गुमीका मेर्मिमलाई र्वाम्डी, “मा वो गानी आथावो थेसिमेथेट्निवाम?” येशूका मिक्सीका मेल्वापा मु़चु़लाई ल्वापा बनेम्डिम 22 मेकोतिमा येशूनुङ उनी सीसिपामिम बेथसेदा देलडा रोम्फाम्डी। मु़चु़मिमका मेसिन्डा मिक्सीका मेल्वापा कोले मु़चु़ उनीमाडा रेट्मिडी, मा मेरामलाई लु़प्नी र्वाम्डिम-र्वाम्डिमङा बेम्डी। 23 गुमीका मे मिक्सीका मेल्वापालाई उमा ल्वाडा जेट्मिडिमा मे देललामका पाखानो लम्डी। मेकोतिमा मेरामकु मिक्सीडा थङकीका बेट्मिडिमा उनीमा ल्वा जु़ल्मिडी, मा र्वाम्डी, “कि-कि हाम-हुम ल्वाना?” 24 मेकोतिमा मेरामका गेले रेप्तोङा र्वाक्ता, “मु़चु़मिम धक्सा होङङा बेपा लाम्दिपाम बाट्पा ल्वाउमी।” 25 मेकोतिमा गुमीका आथावो मेरामकु मिक्सीडा उनी ल्वा जु़ल्मिडी, मा मेरामका रेप्डु़म-रेप्डु़मङा बु़डु़। मेम्मा मेरामकु मिक्सी ङादोम होप्मामङा दु़स्ल्याड्डा, मा खोत्लेमथोक जो़होमका ल्वापा दु़स्ता। 26 मेकोतिमा गुमीका मेरामलाई देलबाडे मेलुक्साका इमा नेम लक्सा बेम्डिमा थु़र्सोम्डी। पत्रुसका येशू ङा ख्रीष्ट र्वाक्साका सो़यु़डु़म ( मत्ती १६:१३-१६ ; लूका ९:१८-२० ) 27 येशू नुङ उनी सीसिपामिम कैसरिया फिलिप्पीडाम देलबाडे लम्डी। लाम्दीडा लक्तोङा बेम्डिलो गुमीका उनी सीसिपामिमनुङ हिलाबेम्डी, “मु़चु़मिमका गो सु़ र्वामी?” 28 मेर्मिमका र्वाम्डी, “कोङ-कोङका कु-रु़दु़म ग्वाक्पा यूहन्ना, याङ-याङका एलिया, मा वाङमिमका माकेम माम्चु़नीलाम जेपागोडामङा कोले र्वामी।” 29 मेकोतिमा गुमीका मेर्मिमनुङ हिलाबेम्डी, “मा गानी ने गोलाई सु़ र्वानी?” पत्रुसका र्वाक्ता, “गानीङा ख्रीष्ट।” 30 मेकोतिमा गुमीका मेर्मिमनुङ र्वाम्डी, “मामा सो़! आमा दुथाम गानी सु़नुङ वो मेसो़नी वो।” येशूका उनी सिमुकु दुथाम सो़म्डिम ( मत्ती १६:२१-२८ ; लूका ९:२२-२७ ) 31 गुमीका आरे र्वाम्डिमा सीमु चो़म्मिडी, “ओराम मिनीचो़का छो़म दु़खा ल्वामु, थेट्पा चक्पामिम, ङाउ डु़म्लाचो़मिम नुङ पातु़म्रीमिमलामका नाप्छु़न्ला सो़सिमु, मा सेन्ला सो़सिमु बासी। मेकोतिमा सुलेम नेम सिमुलाम बम्गेमु बासी।” 32 आरेसाका गुमीका ओराम ल्वा थेसिथेट्पा बेसाका र्वाम्डी। लावो ओराम थो़स्तु़मा पत्रुसका गुमीलाई कोर्थो़ लडु़मिमा आरे मेर्वाक्नी बु़डु़मी। 33 लावो येशू ख्लोम्सिडिमा उनी सीसिपामिमथो़ रेप्तो पत्रुसलाई आरेसाका भुर्मिडी, “शैतान, गोलामका लस्ल्याडा, हेङालोने इमा न माम्चु़नीलाममिम मेएँ, मु़चु़लाममिम रेछा।” 34 मेकोतिमा गुमीका उनीमा सीसिपामिम नुङ मेर्मिमनुङ बाट्पा सेर्पा मु़चु़मिमलाई उनीमाथो़ येट्मिडिमा र्वाम्डी, “उहेमका गोनुङ लाम्दिमु न बु़, मेरामका उमा न होम्साका मेएँ, आमा न होम्साका बु़नु़, मा उमा त्वाकु क्रूस कुर्नु़ मा गोनुङ लाम्दिनु़। 35 हेङालोने उहेमका उमा साम जु़ल्मु न बु़, मेरामका मे मेल्वासु़, लावो जो़पा-सेला नुङ आमा नङकु दुथाम उमा त्वाकु साम ङा वो फ्याक्पाका मेराम ल्वासु़। 36 हेङालोने मु़चु़का खोत्ले सुबुङा उमा ल्वाडा बु़ मा वो उमा साम ने दाम्सोक्तु़ माला मेरामका हाम बु़ मा? 37 मु़चु़का हाम ग्वाक्साका उमा साम ख्लोमु चाप्सु़ मा? 38 ओराम नाम्सु़रु़चो़ नुङ छु़लचो़मिमगोडा उहेम गो नुङ आमा सिजेमडाम उमा क्रो़म लु़, मिनीचो़ वो माम्चु़नी पापकु यु़म-झ्वाक्सीडा माम्चु़नीकु नङका साट्मा पाह्रीचो़मिमनुङ योलो मेरामडाम उमा क्रो़म लु़।” |
© Wycliffe Bible Translators, Inc. All rights reserved.
Wycliffe Bible Translators, Inc.