गलाती 4 - थुलुङ राई1 लावो गो र्वामु माल्तोम ल्वा ओराम ङा सो़, माम-पापकु खाप्ची ल्वापा मु़चु़ चो़च्चो़ङा बु माला गु खोलेम थोककु हप दु़म लोवो डु़ल्चो़ होप्माम ङा सो़। 2 गु चो़च्चो़ बुलो उमा पापका र्वाम्डिम थ कोति गु रोथिमिमसम्म गुलाई क्रिपा नुङ रेपा मु़चु़का र्वामिम ल्वा थो़मु बासी। 3 आरेसाकाङा गुइ वो चो़च्चो़ बाइडिम थारीका मु़चु़मिमलाई त्वाकु ल्वाडा जु़ल्पा सु़म्दिसेरडा सीसिमिमकु डु़ल्चो़ दु़स्तिम बाइडा। 4 लावो माम्चु़नीका मुलु़ बेम्डिम जो़पा थारी रोक्फाड्डालो गुमीका उनीमा त्वाकु तारापाचो़ थु़र्मिडी। गुमी कोले मेसेमलाम यहूदी डु़म्लागोडा गम्डिम बाइडा। 5 डु़म्लागोडा बाट्पामिमलाई थि सोक्साका वाङ बोमुमा उनीमा जाउमो तारापाचो़ दु़म्बेन्मु लागि गुमीका येशू ख्रीष्टलाई थु़र्मीडिम बाइडा। 6 गानी माम्चु़नीकु जाउमो तारापाचो़ दु़म्निमका गुमीका उनी त्वाकु तारापाचो़कु पेल इकीमा नगोडा थु़र्मिडी, मेराम पेलका माम्चु़नीलाई “ए अब्बा, ए पाप” र्वाक्साका र्वामी। 7 मेम्मिमका आथाडा आनो गानी डु़ल्चो़ मेएँ, माम्चु़नीकु चो़मिम सो़, मा गानी उनीमा चो़ दु़म्निमका गुमीका याचेजेम्डिम ल्वाकु खुन्चु़म खुसिमु ल्वापा दु़म्निम बु। पावलका गलातीमिमलाई लु़म्ला बेड्डु़मिम 8 गानी माम्चु़नीलाई छेमु ङादो हाम ना हामकु नो़पमिमकु डु़ल्चो़ बान्नी, उहेम आच्छाङाकाम मेबायावा। 9 लावो आथा ने गानी माम्चु़नीलाई छेट्निम बु, आरेसाका वो र्वाकी, माम्चु़नीलाम गानी छेला सो़सिट्निम बु। लावो हेसाका गानी हाम ना हामकाम यु़म मेबाट्पा ल्वाकु सीसिथो़ आथावो ख्लोन्सीनी मा मेरामकु डु़ल्चो़ दु़म्मु न बोनी? 10 गानी यहूदी डु़म्ला होम्साकाङा नेममिम, मुनाममिम, जु थारी, ग्वाल थारी नुङ थ-थका दु़म्पा चाड माने बोनी। 11 गो इनीमा लागि बेत्तोङा लेट्पुमिम ब्राम्दु़ल्वा हाम ना हामकाम दु़म डे, र्वाक्पा गोलाई ङिमलु़डा। 12 वा-ल्वाकनी, गो यहूदी डु़म्लाडाम वाङ दु़म्ङोडोमका गानी वो गो होप्माम मेराम डु़म्लाडाम वाङ दु़म्नी र्वाक्साका छो़म र्वाङु। ङादो गानी गोनुङ दु़म्निम थारीका आमा हाम वो मेजो़पा बेन्निम मेबायावा। 13 गानी ओराम ल्वा ने चनिमङा बु, खोत्लेडाम ङादो इनीमाडा जो़पा-सेला थो़बेट्निनिलो गो नो़पा बाङ्डो। 14 मेम्लो गो नो़ङडोमका गानीलाई दु़खा दु़स्ता लोवो गोलाई मेद्वाक्साका हानो-हानोङा मेबेङ्निवा। लावो माम्चु़नीकु कोले पाह्रीचो़ नुङ येशू ख्रीष्टलाई बेन्निम होङ्ङा हुनाखाना बेङ्डिनी। 15 गो गानीनुङ बाङ्डोम थारीका गानी छो़म गेर्सी द्वाक्पा बान्नी। आच्छाङा गो इनीमा दुथाम र्वाङु, इनीमा मिक्सी थान्मुमा गोलाई ग्वामु नु़पा माला ग्वाङिनवा। लावो ओम्लो हेङा इनीमा न कोर्थो़ लस्ता? 16 हाम गो गानीलाई आच्छाङाकाम ल्वा सो़उतोमका गो इनीमा स्वाक्चिमो मु़चु़ दु़म्ङोडोम बु मा? 17 मे लिमा सीसि सीपा मु़चु़मिमका गानीलाई उनी त्वापलाम बोमु लागि छो़म उनी सो हन्पा बाइडा। लावो जो़पा न-गोका बेम्डिम ने मेएँ। मेर्मिमका गानीलाई गोडाम फ्वामुमा उनीमा सीसिडा ख्लोमु लागि सो़। 18 जो़पा ल्वा बोमुडा हेल्लो लोवो सो हन्पा दु़म्मु ने जो़पा ङा सो़, लावो गो गानीनुङ दु़म्ङुलो कोङङा सो हन्बेसी रेम्बोमु ने जो़पा मेएँ। 19 आमा द्वादीबुङ चो़च्चो़ नी, गानी येशू ख्रीष्ट होम्मामङा मेदु़म्निमिमसम्म चो़च्चो़ गमु थारीका मेसेमलाई हिम्बा खेडु़मिम होप्माम दु़खा आथावो गो इम्पुमिम बु। 20 ओम्लो गो गानीनुङ बाङुवामा गानीलाई जो़होमका लु़म्ला बेसाका क्रिमु ल्वाउवा माला जो़पा दु़म्सावा मा गो आरेसाका र्यामुम बुमु मेबासावा। हेङालोने गो इनीमा दुथाम हाम र्वामु-र्वामु दु़म्ङोडोम बु। हागार नुङ सारा 21 गानी मोशाकु डु़म्लागोडा बुमु माल्पामिमका गोलाई र्वाक्नी, डु़म्लाका हाम र्वाक्ताम बु हाम गानी मेचनी? 22 माम्चु़नीकु सिजेमडा र्याक्मा बु, अब्राहामकु नले तारापाचो़ बाच्ची, कोले हागार र्वाक्मा डु़ल्चो़मेलाममिम मा कोङमी ने सारा र्वाक्मा उमा त्वाकु नाइमेलाममिम। 23 डु़ल्चो़मे हागारलाम गक्पा तारापाचो़ ने मु़चु़कु मिरो़म नुङ न होम्साका गस्ताम बाइडा। लावो त्वाकु नाइमे सारालाम गक्पा तारापाचो़ ने माम्चु़नीका याचे जेम्डिम होम्साका गस्ताम बाइडा। 24 ओर्मिम ल्वा ने सीसि सो़म्दी होम्माम सो़ र्वाक्साका गुइ थेसिथेडी, मे नले मेसेमचिपका माम्चु़नीकु नले सो़रख्रेप्सी रेम्बु़। कोले सो़रख्रेप्सी ने सीनै पोप्चङडला ग्वाक्मा डु़म्ला ने डु़ल्चो़ दु़म्मु लागि चो़च्चो़ कक्पा मेसेम हागार ङा र्वाक्पा रेम्बु़। डु़म्लागोडा बाट्पामिमकु चो़-चु़सु़मिमङा डु़ल्चो़मिम सो़। 25 अरब नेब्दीडाम सीनै पोप्चङ ने डु़ल्चो़मे हागार होप्मामङा सो़, मा ओम्लोम यरूशलेम शहरनुङ गुलाई थो़म्मु झाम। हेङालोने मेराम शहरडाम मु़चु़मिम डु़म्लागोडाम डु़ल्चो़ होप्मामङा सो़। 26 लावो कोङमी मेसेम सारा ने पाह्रीलाम यरुशलेमनुङ थो़म्मु झाम। गु ने डु़ल्चो़मे ने मेएँ, गु ने इकीमा माम सो़। 27 माम्चु़नीकु सिजेमडा र्याक्मा बु, “चो़च्चो़ मेकक्पा मेसेम, न-गो भ्रसी बेडा, चो़च्चो़ कमु दु़खा मेलु़लेट्पा मेसेम, इमा न-गोलामका गेर्सी द्वाकामा येसा, हेङालोने वोचु़ बाट्पा मेसेमडाम वो वोचु़का ङेट्पा मेसेमकाम हापा चो़-चु़सु़मिम दु़म्मी।” 28 वा-ल्वाकनी, इसहाक होप्मामङा गुइ वो माम्चु़नीका याचे जेम्डिम चो़-चु़सु़मिम सो़। 29 लावो मेमबिलि मिरो़मकु न होम्साका गक्पा तारापाचो़ इस्माएलका माम्चु़नी-पेलकु यु़मलाम गक्पा इसहाककु थो़मतेर्साड्डु़म बाइडा। मेराम होम्साकाङा ओम्लो वो माम्चु़नी-पेललाम गक्पामिमलाई डु़म्लागोडा बाट्पामिमका दु़खा ग्वामी। 30 लावो माम्चु़नीकु सिजेमका हाम र्वा? “डु़ल्चो़मे नुङ मेरामकु तारापाचो़लाई ख्लुन्सोट्नी, हेङालोने त्वाकु नाइमेलाम गक्पा तारापाचो़का कोङङा उमा पापलाममिम खुन्चु़म रमु ल्वासु़, डु़ल्चो़मेकु तारापाचो़का ने हेल्लो वो रमु मेल्वासु़।” 31 मेम्मिमका वा-ल्वाकनी, गुइ डु़ल्चो़मेलाममिम मेएँ, लावो डु़ल्चो़मे मेदु़म्सावाम नाइमेकु चो़-चु़सु़मिम सो़। |
© Wycliffe Bible Translators, Inc. All rights reserved.
Wycliffe Bible Translators, Inc.