२ कोरिन्थी 11 - थुलुङ राईपावल नुङ थु़र्मा लिसिक्पामिम 1 गो किचो़ नेप्ची मान्थिम दु़म्साका र्वाङुलो गानी इम्नी र्वाक्पा आमा न बु। आच्छाङा गानी मेम्साका इम्सिट्नी। 2 माम्चु़नीका इनीमा दुथाम हेल्लो लोवो मिम्ताम-सो़र्ताम बेन्निममिम होम्साका गो वो इनीमा दुथाम मिम्ताम-सो़र्ताम बेउ। सेपा लारेमा होप्माम गानीलाई कोलेङा लारेपा ख्रीष्टनुङ लालीकुन्दा बोन्सानिनी र्वाक्साका गो याचे जेङडोम बु। 3 ब्लोका उमा मेजो़पा नका हव्बालाई वायम डस्तु़म होङङा ख्रीष्टडलाम सेपा नुङ आच्छाङाकाम रिखाम बेपा इनीमा न ताङताहेरथो़ ल डे र्वाक्साका गोलाई ङिमलु़डाम बु। 4 कोङनिम मु़चु़ इनीमाडा रोम्डिमा गुकु र्वाक्तोकोमडाम वो वाङमिङा येशूकु दुथाम सो़म्डी माला गानी गेर्सी द्वाक्तो थो़नी रेछा। ङादो गानी ल्वान्निम पेल नुङ जो़पा-सेलाडाम वो वाङमिङा पेल नुङ वाङमिङा सेला गानी जो़होमका ङा रनी रेछा! 5 त्वापङा डोक्पु दु़म्पा मे थु़र्मामिम लिसिक्पामिमडाम गो कि-किम वो याक्के मेबुङु। 6 गो जो़होमका जेमु मेथेट्पा बुङु लोवो गोनुङ नेप्ची बु। ओराम नेप्ची गुकु हेल्लो लोवो खोत्ले खारीडा गानीलाई जो़होमका रेम्बेत्तोकोम बु। 7 माम्चु़नीकु जो़पा-सेला गानीलाई हाम वो मेरसाका मेडेङा थो़बेट्निनिमा गो आ त्वाप याक्के दु़म्ङोडो मा गानीलाई डोक्पु दु़म्बेट्निनी। हाम आरे बेउतोमका गो छु़ल बेउतो? 8 गो इनीमा चापे-डुपे बोमु लागि वाङमी मण्डलीलामका खउलुङ रउतो। मेराम ने गानीलाई ख्लो़मु वाङमिम मण्डलीकु खउलुङ गो रोत्तोमिम होप्माम दु़स्ता। 9 गो गानीनुङ बाङडोलो खेरेखेरे दु़म्ङोडोम बाइडा, लोवो गानी सु़लाई वो दु़खा मेग्वाक्निनिवा। गो खेरेखेरे दु़म्ङोडोलो माकेडोनिया क्षेत्रलामका रोक्पा थो़रलु़पामिमका गोलाई हाम चाहेदु़स्ताम मेराम ग्वाङ्डिमी। मेम्मिमका ओराम ल्वाडा गो गानीलाई हेल्लो वो दु़खा मेग्वानिनिवा मा दिफु वो दु़खा मेग्वानिनी। 10 ख्रीष्टकु आच्छाङाकाम ल्वा गोनुङ बुमिमका गो र्वाङु, आरेप्माम ल्वाकु दुथाम डोक्पु लिसिमुडा अखैया इलाकाडाम सु़का वो गोलाई भोम्मु मेचाम्ङिमी। 11 हेङा गो आरे बेउतोम? गो गानीलाई रिखाम मेबोनिनिमिमका मा? गो गानीलाई रिखाम बोनिनी र्वाक्पा ल्वा माम्चु़नीका चमी। 12 गो बेउतोम खारी बेउहोमङा बुङु। मेम दु़स्तामका मे उनी त्वाकाङा कोसिक्साका थु़र्मा लिसिक्पा मु़चु़मिमका गुकु होप्मामङा खारी बेत्तोको र्वाक्साका डोक्पु लिम्सिमु मेल्वामी। 13 आरेप्माम मु़चु़मिम ने थु़र्मा लिसिक्पामिम नुङ लिमा थेसाका खारी बेपामिम, मा ख्रीष्टकु थु़र्मामिम होप्माम ल्वाला सो़सिक्पामिम सो़। 14 ओराम इकीमा लागि ङाङाया दु़म्बेट्पा ल्वा मेएँ। शैतान वो ओलडाम पाह्रीचो़ होङङा लिम्सिमु चाप्सु़। 15 मेम्मिमका शैतानकु डु़ल्चो़मिमका वो माम्चु़नीकु न होप्माम डु़ल्चो़ होङङा रेम्बेसिक्पा ल्वाडा ङाङाया दु़म्मु मेबासी। मेर्मिम ने हाम ल्वामुका घ्रेट्पा बुमी मेराम दिफु ल्वामी। पावलका उ दु़खामिमकु दुथाम धक्ची ह्वाकु़मिम 16 गो आथावो र्वाङु, सु़का वो गोलाई नेप्ची मान्थिम मेमिम्ङिमिनु़। लावो गानी गोलाई नेप्ची मान्थिम मिम्ङिनी माला वो नेप्ची मान्थिमङा मिम्साका गोलाई रङिनी, मेम्मा गो वो किचो़ डोक्पु लिसिमु ल्वाउनु़। 17 मेप्माम डोक्पु लिसिसी ने ङाचो़लाममिम मेएँ, लावो ओम्लो गो नेप्ची मान्थिम मु़चु़ होप्माम दु़म्साका जेत्तोङा बेउ। 18 हापा मु़चु़मिमका सु़म्दिसेरडाम बेसी होङङा डोक्पु लिसिम्डिमका गो वो डोक्पु लिङ्सिङु। 19 नेप्ची मान्थिम मु़चु़मिमकु ल्वा गेर्सी द्वाक्तो थो़प्साक्पा गानी हाङको छो़म नेप्चीनुङमा मु़चु़मिम! 20 कोङनिम मु़चु़का गानीलाई डु़ल्चो़ होङङा बोनी लोवो, इनी खउलुङ पोन्सानी लोवो, पेरडा फिनिमी लोवो, गानीलाई डनिमी लोवो, इनी कलडा फोनिमी लोवो गानी इम्नी रेछा। 21 र्वामु क्रो़म लु़पा लोवो गो सो़मु बास्ता, गुकु छो़म ङिजो़ल्पा दु़म्तोकोमका मेर्मिम होङङा बोमु मेचाप्कुवा। मेर्मिमका उहेम ल्वाडा डोक्पु लिसिमी आथावो गो वो नेप्ची मान्थिम दु़म्साका मेराम ल्वाडा ङा डोक्पु लिसिङु। 22 हाम मेर्मिम हिब्रू? गो वो हिब्रू ङा। हाम मेर्मिम इस्राएलीमिम? गो वो मेङा। हाम मेर्मिम अब्राहामकु चो़ चु़सु़मिम? गो वो मेङा। 23 हाम मेर्मिम ख्रीष्टकु डु़ल्चो़मिम? गो नेप्ची मान्थिम होङङा जेत्तोङा लेट्पु। गो मेर्मिमडाम हापा जो़पा डु़ल्चो़। गो हापा ब्राम्दु़ल्वा बेउतो। हापा खेप चसिङडोमा बाङडो। हापा इम्मु मेचापा बेसाका कोक्तेकु रिबाका याल्ला सो़सिङडो। हापा खेपङा र्वाप्डा सिङडो। 24 यहूदीमिमका सु-गु (३९) खेपकु याल्सी कोक्तेकु रिबाका गोलाई ङो खेप याल्ङिडिमी। 25 सु-खेप गोलाई डु़लु़म्चो़का याल्ङिडिमी, कोखेप लुङका ओप्ङिडिमी, गो हुङडोम डोक्पु कुबी-बोक्सा सु खेप जस्ता। कोखेप ने कोलेम नुङ को सिन्था दिरिदिनडा वो बाङडो। 26 गो हापाखेप दु़पा लाम्दी लाम्दिङ्डोलो ब्लोकुडाम, खुचु़वामिमडाम, आमा त्वाकु सामा यहूदीमिमडाम, वाङसामामिमडाम गोलाई हापा ङिम बाइडा। शहरडा, सो़ब्दीडा, दिरिदिनडा मा थो़रलु़पा लिसिक्पामिमडाम वो हापा ङिम बाइडा। 27 गो छो़म मेझापा नुङ घ्रु़म्पा खारी बेउतो मा हापा खेप मेअम्ङुवा। गो क्रु़म कोडा सिङडो मा हापा खेपङा पोमुडुमु मान्थिम दु़म्ङोडो। ये-सेम मान्थिम दु़म्ङोडो मा जुका क्रो़न्ङिडी। 28 ओर्मिमडाम वो वाङमिम ने खोत्ले मण्डलीमिमकु दुथाममिम मिम्ताम-सो़र्ताम गो हेल्लो लोवो इम्थाक्पुमिम बु। 29 कोङनिम मेचापा दु़म माला गो वो मेचापा दु़म्ङु। कोङनिम मु़चु़का कोङनिमलाई छु़ल बेबेड्डु़ माला गो छोक्चोका मु होप्मामङा दु़म्ङु। 30 गो डोक्पु लिसिमु बासी माला वो गो मेचापा बुङु र्वाक्पा रेम्बोमु लागि ङा डोक्पु लिसिङु। 31 ङाचो़ येशूकु माम्चु़नी नुङ पापकाम हेल्लो लोवो नङ कोसिनु़, गो लिमा मेथेट्पु र्वाक्पा ल्वा गुमीका चमी। 32 गो दमस्कस शहरडा बाङडोलो हप अरितसकु साखामचो़का गोलाई चु़म्बेन्मु लागि सिपाहीमिमलाई शहरकु लाम्चोको लाम्चोकोडा लन्बेड्डु़मिम बाइडा। 33 लावो आमा ङोप्सो़मिमका शहर खिर्मा ब्रोलुङकु कोले दोचिमलामका तोफ्रिमगोयु़ फिक्साका गोलाई पाखायु़ ख्लुङ्डिमी, मेम्मा गो मेर्मिम साखामचो़डाम स्वाङडो। |
© Wycliffe Bible Translators, Inc. All rights reserved.
Wycliffe Bible Translators, Inc.