२ कोरिन्थी 1 - थुलुङ राईपावलकु सेव 1 ओराम सेलाखाजेम माम्चु़नीकु न होम्साका येशू ख्रीष्टकु थु़र्मा दु़म्ङोडोम गो पावल नुङ आकीमा ल्वाक तिमोथीलामका सो़। गो कोरिन्थ शहरडा बाट्पा माम्चु़नीकु मण्डली नुङ अखैयाडा बाट्पा माम्चु़नीकु खोत्ले सेपा मु़चु़मिमलाई ओराम सेलाखाजेम र्याक्तोङा बेउ। 2 माम्चु़नी इकी पाप नुङ ङाचो़ येशू ख्रीष्टका गानीलाई दिदाम नुङ न-भ्रसी ग्वानिमिनु़। खोत्लेडा न बसाक्पा माम्चु़नी 3 माम्चु़नीकु नङ कोसिनु़। गुमी इकीमा ङाचो़ येशू ख्रीष्टकु माम्चु़नी, न-थो़मनुङमा पाप, मा न खोत्ले बसाक्पा माम्चु़नी बुमी। 4 गुमीका गुइलाई खोत्ले दु़खाडा इकी न बसाक्सामी। आरेसाका माम्चु़नीलाम ल्वास्तिम मेराम न बन्सीलामका गुइ वो वाङमिम दु़खाडा दु़म्पा मु़चु़मिमकु न बन्सामु चाप्सी। 5 हेङालोने ख्रीष्टकाम लागि गुइ हाङको हापा दु़खा ल्वासी, मेकोतिङा माम्चु़नीका ख्रीष्टलामका इकीमा न बसाक्सामी। 6 गुकु दु़खा ल्वात्तोकोम ने इनीमा न बन्सी नुङ सेल्सिसीकाम लागि सो़। मेम्मा गुकु माम्चु़नीलाम न-बन्सी ल्वात्तोको माला मेराम वो इनीमा न-बन्सीकाम लागि सो़। ओराम न बन्सीलामका गुकु इम्तोकोम होप्माम दु़खा गानी वो इम्मु चाप्नी। 7 गुकु दु़खा ल्वात्तोकोम होङङा गानी वो दु़खा ल्वानी माला, माम्चु़नीका आकीमा न बसाक्तिकिमिम होङङा इनीमा वो न-बन्सानिमी। गुकुलाई ओराम ल्वाडा आच्छाङा थो़र लु़डाम बु। 8 वा-ल्वाकनी, गुकु एशियाडा दु़खा ल्वात्तोकोम ल्वाकु दुथाम गानी वो चन्जो़ल्नी र्वाक्पा आकीमा न बु। मेसिन्डा गुकु छो़म दु़खा ल्वात्तोको, मेराम गुकु इम्मुङा मेचाप्कुवामका आकी साम जु़ल्मु वो न सेत्तोकोम बाइडा। 9 गुकु ने आच्छाङा सिमु होङङा लु़त्तोकोम बाइडा। गुकु आकी त्वाकु यु़मडा मेएँ, लावो सिपामिमलाई फक्पा माम्चु़नीडा थो़र लु़कुनु़ र्वाक्साका आरे दु़स्ताम। 10 गुमीका गुकुलाई आरेप्माम छो़म ङिमलु़पा सिमुलामका फ्वाक्तिकिमी, मा फ्वाक्सामी वो। गुमीका गुकुलाई हेल्लो लोवो फ्वाकिमी र्वाक्पा नका गुमीडला गुकु आकीमा थो़र जु़ल्तोकोम बु, 11 गानी वो आकीमा लागि सो़म्दी बेसाका ख्लो़किनिम बुकिनी। मेम्मा हापा मु़चु़मिमका इकीमा लागि आलासो़ र्वामी, हेङालोने मेर्मिम हापाकाम सो़म्दी थो़मिमा माम्चु़नीका गुकुलाई जि-वा ग्वाकिमी। पावलका कोरिन्थडा चक्थो़ लक्पा मुलु़ बु़डु़म 12 ओराम सु़म्दिसेरडा कोङङा मेएँ लावो इनीमा ङादोडा वो आकीमा बासी-दोसी सेपा दु़म्बेत्तोकोम बु। ओराम आच्छाङाकाम न गुकु माम्चु़नीलाम ल्वात्तोकोम सो़। ओराम माम्चु़नीकु दिदामका दु़स्ताम, मु़चु़कु नेप्चीलामका ने मेएँ र्वाक्साका गुकु आकी धक्ची ह्वाक्साका सेपा नेप्चीका र्वामु चाम्कु। 13 गानी थेसिथेन्मु मेचापा नुङ डान्मु मेचापा हाम वो ल्वा गुकु गानीलाई मेर्याकु। 14 ओम्लो गानी आकीमा दुथाम किचो़ कोङङा थेसिथेट्निम बु, लावो कोलेम गानी गुकुलाई जो़होमका थेसिथेन्किनी। ङाचो़ येशू योमिमिम नेम गुकु इनीमा दुथाम आकी दाप होर्सिमिम होङङा गानी वो आकीमा दुथाम इनीमा दाप होर्सी र्वाक्साका थो़र बेउतोम बु। 15 गुइ इकी त्वाप-त्वापडा आच्छाङा थेसीथेन्बिइ र्वाक्पा गो लु़ङ्डोमका गानी नक-खेप जि-वा ल्वानी र्वाक्साका आथावो इनीमाडा रोमु न बेउतोम बाइडा। 16 माकेडोनिया लङुलो ङादो इनीमाडा लुङु मा माकेडोनियालामका ख्लोसिङुलो वो इनीमाडा लुङु। मेम्मा गानी गोलाई यहूदियाथो़ थु़र्सोङिनी र्वाक्पा आमा नडा मिम्सिङ्डोम बाइडा। 17 आरे बोमु आमा नडा मिम्तोलो हाम नले न बेउतो मा? हाम गो हाम-हुम बोमु आमा नडा मिम्तोलो सु़म्दिसेरडाम मु़चु़ होङङा कोलेङा ल्वा “आच्छाङा” नुङ “मेएँ” र्वाङु मा? 18 माम्चु़नी थो़रलु़इमिम बुमी। मेम्साकाङा आकीमा सिजेम वो याङलो “आच्छाङा” नुङ याङलो “मेएँ” दु़स्ताम मिबु। 19 गो, सिलास नुङ तिमोथीका गानीलाई थो़बेत्तोकोम माम्चु़नीकु तारापाचो़ येशू ख्रीष्टडा “आच्छाङा” नुङ “मेएँ” र्वाक्पा ल्वा मेबायावा। लावो गुमीडा हेल्लो लोवो “आच्छाङा” कोङङा दु़म। 20 माम्चु़नीका खोत्ले याचे जेम्डिम ल्वामिम “आच्छाङा” र्वाक्साका ख्रीष्टडा रोक्थिड्डा। मेम्मिमका ख्रीष्टलामका माम्चु़नीकु नङ डोक्पु दु़म्नु़ र्वाक्साका गुइ “आमेन” र्वाकी। 21 माम्चु़नीका गानी नुङ गुकु खोत्लेलाई ख्रीष्टडा सो ग्वाक्साड्डामिम बु। गुमीकाङा गुकुलाई थुत्तिकिमिम सो़। 22 गुइ गुमीकाम ङा र्वाक्साका गुमीका गुइडला उनीमा छेखोप ओप्मिडिम बु मा ङादो ग्वाक्पा बैना होप्मामङा इकीमा न-गोडा माम्चु़नी-पेल ग्वाक्साड्डामिम बु। 23 माम्चु़नीलाई आमा दुथाम सो़पा मिम्साका गो आच्छाङा र्वाङु, गानीलाई आथावो हापा दु़खा मेग्वानिनी र्वाक्साका गो कोरिन्थडा ख्लोसिक्साका मेरोङुवा। 24 इनीमा थो़रलु़सीडला गुकु साखाम थो़मु लागि मेएँ, लावो इनीमा न भ्रम्सिमु लागि गानीनुङ खारी बोमु न बोकु, हेङालोने इनीमा थो़र छो़म सोनुङमा बु। |
© Wycliffe Bible Translators, Inc. All rights reserved.
Wycliffe Bible Translators, Inc.